ನವದೆಹಲಿ: ಕೆಲ ದಿನಗಳ ಹಿಂದೆಯಷ್ಟೇ ಜಮ್ಮು-ಕಾಶ್ಮೀರದ ಮುಖ್ಯಮಂತ್ರಿ ಒಮರ್ ಅಬ್ದುಲ್ಲಾ, ಖ್ಯಾತ ಪತ್ರಕರ್ತೆ ನಿಧಿ ರಜ್ದಾನ್ ಜೊತೆ ಮದುವೆಯಾಗಿದ್ದಾರೆ. ಈ ಸುದ್ದಿ ಈಗ ದೇಶಾದ್ಯಂತ ದೊಡ್ಡ ಚರ್ಚೆತ ವಿಷಯವಾಗಿ ಮಾರ್ಪಟ್ಟಿದೆ.
ಇಬ್ಬರೂ ತಮ್ಮ ನೂತನ ವೈವಾಹಿಕ ಜೀವನ ಆರಂಭಿಸಲು ಸಜ್ಜಾಗುತ್ತಿರುವ ಬೆನ್ನಲ್ಲೇ, ಈ ಮದುವೆ ಈಗ ಧಾರ್ಮಿಕ ವಿವಾದಕ್ಕೆ ಕಾರಣವಾಗಿದೆ. 'ಆಲ್ ಇಂಡಿಯಾ ಮುಸ್ಲಿಂ ಜಮಾತ್' ಅಧ್ಯಕ್ಷ ಮೌಲಾನಾ ಮುಫ್ತಿ ಶಹಾಬುದ್ದೀನ್ ರಜ್ವಿ ಬರೇಲ್ವಿ, ಈ ಮದುವೆ ಇಸ್ಲಾಮಿಕ್ ನಿಯಮಗಳ ಪ್ರಕಾರ ಮಾನ್ಯವಲ್ಲ ಎಂದು ಬಾಂಬ್ ಸಿಡಿಸಿದ್ದಾರೆ.
ಒಮರ್ ಅಬ್ದುಲ್ಲಾ ಅವರ ಮದುವೆ ವಿಷಯ ಹೊರಬಿದ್ದ ಕೆಲವೇ ಗಂಟೆಗಳಲ್ಲಿ ಮಾಧ್ಯಮಗಳ ಮುಂದೆ ಬಂದ ಮುಫ್ತಿ ಶಹಾಬುದ್ದೀನ್ ರಜ್ವಿ, ಈ ವಿವಾಹವನ್ನು ಇಸ್ಲಾಂ ಧರ್ಮ ಒಪ್ಪುವುದಿಲ್ಲ ಎಂದು ವಾದಿಸಿದ್ದಾರೆ. ಶರಿಯಾ ಕಾನೂನಿನ ಪ್ರಕಾರ, ನಿಕಾಹ್ ಮಾನ್ಯವಾಗಬೇಕಾದರೆ ವಧು ಮತ್ತು ವರ ಇಬ್ಬರೂ ಮುಸ್ಲಿಮರಾಗಿರಬೇಕು.
ಇಲ್ಲಿ ಒಮರ್ ಅಬ್ದುಲ್ಲಾ ಮುಸ್ಲಿಮರಾಗಿದ್ದರೂ, ನಿಧಿ ರಜ್ದಾನ್ ಮುಸ್ಲಿಂ ಸಮುದಾಯಕ್ಕೆ ಸೇರಿದವರಲ್ಲ. ಹಾಗಾಗಿ, ಇಸ್ಲಾಮಿಕ್ ತತ್ವಗಳ ಪ್ರಕಾರ ಈ ಸಂಬಂಧವನ್ನು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ ಎನ್ನುವುದು ರಜ್ವಿ ಅವರ ವಾದವಾಗಿದೆ.
ಇಷ್ಟಕ್ಕೇ ನಿಲ್ಲದ ಅವರು, "ಮದುವೆಗೆ ಮುಂಚಿತವಾಗಿ ನಿಧಿ ರಜ್ದಾನ್ ಇಸ್ಲಾಂ ಧರ್ಮ ಸ್ವೀಕರಿಸುವಂತೆ ಒಮರ್ ನೋಡಿಕೊಳ್ಳಬೇಕಿತ್ತು. ಅವರು ಮತಾಂತರಗೊಂಡು, ಇಸ್ಲಾಮಿಕ್ ಸಂಪ್ರದಾಯದಂತೆ ನಿಕಾಹ್ ಆಗಿದ್ದರೆ ಮಾತ್ರ ಈ ವಿವಾಹಕ್ಕೆ ಶರಿಯಾ ಮಾನ್ಯತೆ ಸಿಗುತ್ತಿತ್ತು. ಆದರೆ ಹಾಗಾಗದ ಕಾರಣ, ಇಸ್ಲಾಂ ಪ್ರಕಾರ ಇದು 'ನಜಾಯಾಜ್' (ಅಸಿಂಧು ಅಥವಾ ಕಾನೂನುಬಾಹಿರ)" ಎಂದು ಕಟುವಾಗಿ ಹೇಳಿದ್ದಾರೆ.
ಮುಫ್ತಿ ಅವರ ಈ ಕಟು ಹೇಳಿಕೆ ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಕಾಡ್ಗಿಚ್ಚಿನಂತೆ ಹಬ್ಬಿದ್ದು, ಪರ-ವಿರೋಧ ಚರ್ಚೆ ಜೋರಾಗಿದೆ. ಒಂದು ಕಡೆ ಧಾರ್ಮಿಕ ಸಂಪ್ರದಾಯಗಳನ್ನು ಪಾಲಿಸಬೇಕು ಎನ್ನುವವರು ಮುಫ್ತಿ ಪರ ನಿಂತಿದ್ದರೆ, ಮತ್ತೊಂದೆಡೆ ಇಬ್ಬರು ಪ್ರಬುದ್ಧ ವ್ಯಕ್ತಿಗಳ ವೈಯಕ್ತಿಕ ಆಯ್ಕೆ ಮತ್ತು ಪ್ರೀತಿಗೆ ಧರ್ಮದ ಕಟ್ಟುಪಾಡುಗಳನ್ನು ತರುವುದು ಎಷ್ಟು ಸರಿ ಎಂದು ನೆಟ್ಟಿಗರು ಪ್ರಶ್ನಿಸುತ್ತಿದ್ದಾರೆ. ಯಾರನ್ನು ಮದುವೆಯಾಗಬೇಕು ಎಂಬುದು ಅವರವರ ವೈಯಕ್ತಿಕ ಹಕ್ಕು, ಅದರಲ್ಲಿ ಧರ್ಮಗುರುಗಳ ಹಸ್ತಕ್ಷೇಪ ಅನಗತ್ಯ ಎಂಬ ಅಭಿಪ್ರಾಯ ಜೋರಾಗಿ ಕೇಳಿಬರುತ್ತಿದೆ.
ಧರ್ಮಗುರುಗಳು ಎಷ್ಟೇ ಫತ್ವಾ ಅಥವಾ ಧಾರ್ಮಿಕ ತೀರ್ಪುಗಳನ್ನು ನೀಡಿದರೂ, ಭಾರತದ ಕಾನೂನಿನ ಮುಂದೆ ಅವುಗಳ ಮೌಲ್ಯ ಎಷ್ಟು ಎಂಬ ಪ್ರಶ್ನೆ ಇಲ್ಲಿ ಮುಖ್ಯವಾಗುತ್ತದೆ. ಭಾರತ ಒಂದು ಜಾತ್ಯತೀತ ದೇಶವಾಗಿದ್ದು, ಇಲ್ಲಿ ಸಂವಿಧಾನವೇ ಸರ್ವೋಚ್ಚವಾಗಿದೆ.
ಭಾರತೀಯ ಕಾನೂನಿನ ಪ್ರಕಾರ, ವಿಭಿನ್ನ ಧರ್ಮಗಳ ಇಬ್ಬರು ವ್ಯಕ್ತಿಗಳು ತಮ್ಮ ಧರ್ಮವನ್ನು ಬದಲಾಯಿಸದೆ 'ವಿಶೇಷ ವಿವಾಹ ಕಾಯ್ದೆ' (Special Marriage Act) ಅಡಿಯಲ್ಲಿ ಮದುವೆಯಾಗಲು ಸಂಪೂರ್ಣ ಕಾನೂನುಬದ್ಧ ಹಕ್ಕಿದೆ. ಯಾವುದೇ ಧಾರ್ಮಿಕ ನಾಯಕರು ಕೊಡುವ ತೀರ್ಪು ಅಥವಾ ಫತ್ವಾಗಳು ದೇಶದ ಸಂವಿಧಾನ ಮತ್ತು ಕಾನೂನಿಗಿಂತ ದೊಡ್ಡದಲ್ಲ. ಮದುವೆಯ ಸಿಂಧುತ್ವವನ್ನು ದೇಶದ ನ್ಯಾಯಾಲಯಗಳು ಮತ್ತು ಕಾನೂನುಗಳು ನಿರ್ಧರಿಸುತ್ತವೆಯೇ ಹೊರತು, ಧರ್ಮಗುರುಗಳ ವೈಯಕ್ತಿಕ ವ್ಯಾಖ್ಯಾನಗಳಲ್ಲ, (ಏಜೆನ್ಸೀಸ್).