ಮುಂಬೈ: ಇತ್ತೀಚೆಗೆ ನಟ ಸಂಜಯ್ ದತ್, ಕಾಮೆಡಿಯನ್ ಶೇಖರ್ ಸುಮನ್ ಅವರ ಪಾಡ್ಕಾಸ್ಟ್ನಲ್ಲಿ ಗಾಂಧಿ ಜಯಂತಿ ಪ್ರಯುಕ್ತ ವಿಶೇಷ ಅಥಿತಿಯಾಗಿ ಆಗಮಿಸಿದ್ದ ಸಂದರ್ಭದಲ್ಲಿ ಭಾರತದ ಕುರಿತು ನೀಡಿದ್ದ ಹೇಳಿಕೆಯೊಂದು ವಿವಾದಕ್ಕೆ ಕಾರಣವಾಗಿತ್ತು. ಈಗ ಅದಕ್ಕೆ ನಟ ಸಂಜಯ್ ದತ್ ಸ್ಪಷ್ಟನೆ ನೀಡಿದ್ದಾರೆ.
ಬಾಲಿವುಡ್ನಲ್ಲಿ ಸಂಜು ಬಾಬಾ ಎಂದೇ ಖ್ಯತಾರಾಗಿರುವ ನಟ ಸಂಜಯ್ ದತ್ ಗಾಂಧಿ ಜಯಂತಿ ದಿನದ ವಿಶೇಷ ಕಾರ್ಯಕ್ರಮದಲ್ಲಿ ಕಾಮೆಡಿಯನ್ ಶೇಖರ್ ಸುಮನ್ ಅವರ ಪಾಡ್ಕಾಸ್ಟ್ನಲ್ಲಿ ಕಾಣಿಸಿಕೊಂಡಿದ್ದರು. ಈ ಸಂದರ್ಭದಲ್ಲಿ ಸಂಜಯ್ ದತ್, ತಮ್ಮ ಖ್ಯಾತ ಮುನ್ನಾಭಾಯ್ ಶೈಲಿಯಲ್ಲಿ ದೇಶದ ಪ್ರಧಾನಿ ಮೋದಿ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬಗ್ಗೆ ಹಾಸ್ಯಾತ್ಮಕವಾಗಿ ಮಾತನಾಡಿದ್ದರು.
ಇದೇ, ವೇಳೆ ದೇಶದಲ್ಲಿ ಮೊದಲಿನಂತೆ ಶಾಂತಿ ಇಲ್ಲದಾಗಿದೆ. ದೇಶದಲ್ಲಿ ಮೊದಲಿದ್ದ ಶಾಂತ ವ್ಯವಸ್ಥೆ ಮತ್ತೆ ಮರಳಬೇಕಿದೆ ಎಂದು ಸಂಜಯ್ ದತ್ ನೀಡಿದ್ದ ಹೇಳಿಕೆ ವಿವಾದದ ರೂಪ ಪಡೆದುಕೊಂಡಿತ್ತು. ಈಗ ಈ ಹೇಳಿಕೆ ವಿವಾದ ತೀವ್ರವಾಗುತ್ತಿದ್ದಂತೆ ನಟ ಸಂಜು ಸ್ಪಷ್ಟನೆ ನೀಡಿದ್ದಾರೆ.
ಹಾಗೆಯೇ, ನಾನೇನಾದರೂ ದೇಶದ ಪ್ರಧಾನಿ ಆದರೆ, ವಿದೇಶಗಳನ್ನು ಸುತ್ತುತ್ತಾ ಇರುವುದಿಲ್ಲ, ಬದಲಿಗೆ ದೇಶದ ಜನರೊಂದಿಗೆ ಹೆಚ್ಚಿನ ಸಮಯವನ್ನು ಕಳೆಯುತ್ತೇನೆಂದು ಬಾಬಾ, ಪ್ರಧಾನಿ ಮೋದಿ ಅವರ ಕಾಲೇಳಿದ್ದರು.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ಗೆ ಟ್ರಂಪ್ ಮಾಮು ಎಂದು ಕರೆದ ನಟ, ಜಗತ್ತಿನಲ್ಲಿ ಶಾಂತಿ ನೆಲೆಸಬೇಕೆಂದರೆ ನೀನು ಮೊದಲು ಗಾಂಧಿಗಿರಿ ಬಗ್ಗೆ ತಿಳಿಯಬೇಕು. ವಿಶ್ವದಲ್ಲಿ ಸಾಕಷ್ಟು ಕ್ಷಿಪಣಿಗಳಿವೆ. ಇದರಿಂದ ಮುಕ್ತಿ ಪಡೆಯಲು ಶಾಂತಿ ಮತ್ತು ಮಾತುಕತೆಗೆ ಮುಂದಾಗಬೇಕು. ನಿನಗೆ ಮುಂದಿನ ಸಲ ಕೋಪ ಬಂದರೆ ಆ ದೇಶಕ್ಕೆ ಹೂವನ್ನು ಕಳುಹಿಸು ಎಂದು ಬಾಬಾ ಹಾಸ್ಯಮಾಡಿದ್ದರು.
ತಾವು ಶೇಖರ್ ಸುಮನ್ ಅವರ ಪಾಡ್ಕಾಸ್ಟ್ನಲ್ಲಿ ನೀಡಿದ್ದ ಹೇಳಿಕೆ ವಿವಾದದ ರೂಪ ಪಡೆದುಕೊಳ್ಳುತ್ತಿದೆ ಎಂದು ಮನಗಂಡ ನಟ, ಟ್ವಿಟರ್ನಲ್ಲಿ ಟ್ವಿಟ್ ಮಾಡುವ ಮೂಲಕ ಸ್ಪಷ್ಟನೆ ನೀಡಿದ್ದಾರೆ. ನಾನು ಇತ್ತೀಚೆಗೆ ನೀಡಿದ ಹೇಳಿಕೆ, ಯಾವುದೇ ವ್ಯಕ್ತಿ, ಸಮುದಾಯ ಅಥವಾ ಯಾರದೇ ಭಾವನೆಗಳಿಗೆ ಧಕ್ಕೆ, ಅವಮಾನ ಅಥವಾ ಅಗೌರವನ್ನುಂಟು ಮಾಡುವ ಉದ್ದೇಶ ಹೊಂದಿರಲಿಲ್ಲ ಎಂದು ಸಂಜಯ್ ದತ್ ಹೇಳಿದ್ದಾರೆ.
ಅಲ್ಲದೇ, ಆ ಕಾರ್ಯಕ್ರಮ ಗಾಂಧಿ ಜಯಂತಿಯಂದೆ ನಡೆದ ಹಿನ್ನಲೆ, ನನ್ನ ಮುನ್ನಾಭಾಯ್ ಸಿನಿಮಾದಲ್ಲಿ ಹೇಳಲಾಗಿರುವ ಗಾಂಧಿಗಿರಿ ಎಂಬ ತತ್ವದ ಆಧಾರದ ಮೇಲೆ ಸ್ಕ್ರಿಪ್ಟ್ಅನ್ನು ಸಿದ್ಧ ಪಡಿಸಲಾಗಿತ್ತು. ನನ್ನ ಪಾತ್ರವನ್ನು ಹಾಸ್ಯಭರಿತವಾಗಿ ತೋರಿಸಿ, ಎಲ್ಲರೊಂದಿಗೆ ಒಗ್ಗಟ್ಟು ಹಾಗೂ ಸೌಹಾರ್ದತೆಯನ್ನು ಉತ್ತೇಜಿಸುವುದು ಈ ಕಾರ್ಯಕ್ರಮದ ಉದ್ದೇಶವಾಗಿತ್ತು. ಇದೊಂದು ಸ್ಕ್ರಿಪ್ಟಡ್ ಕಾರ್ಯಕ್ರಮವಾಗಿದ್ದ ಕಾರಣ, ನನಗೆ ಮುಂಚಿತವಾಗಿ ತಿಳಿಸಲಾಗಿದ್ದ ಸಂಭಾಷಣೆಯನ್ನು ನಾನು ಹೇಳಿದ್ದೇನೆಂದು ನಟ ಸ್ಪಷ್ಟ ಪಡಿಸಿದ್ದಾರೆ.
ಪರಸ್ಪರದಲ್ಲಿ ಪ್ರೀತಿ, ವಿಶ್ವಾಸ ಹಾಗೂ ನಂಬಿಕೆಯನ್ನು ಬೆಳೆಸುವುದು ನನ್ನ ಆ ಹೇಳಿಕೆಯ ಉದ್ದೇಶವಾಗಿತ್ತು. ಆದರೆ ಕೆಲವೊಂದಿಷ್ಟು ಜನರು ಅದನ್ನು ತಪ್ಪಾಗಿ ಅರ್ಥೈಸಿಕೊಂಡು, ಅಪಪ್ರಚಾರ ಮಾಡುತ್ತಿದ್ದಾರೆಂದು ಸಂಜಯ್ ದತ್ ಬರೆದುಕೊಂಡಿದ್ದಾರೆ, (ಏಜೆನ್ಸೀಸ್).