ಅಯ್ಯೋ..! 1950ರ FIFA ವಿಶ್ವಕಪ್ ಆಡೋ ಅವಕಾಶ ಸಿಕ್ಕಿದ್ದರೂ ಭಾರತವೇ ಏಕೆ ಹಿಂದೆ ಸರಿಯಿತು?

ಆದರೆ ಇತಿಹಾಸದ ದಾಖಲೆಗಳು ಮತ್ತು ಕ್ರೀಡಾ ತಜ್ಞರ ಅಭಿಪ್ರಾಯಗಳ ಪ್ರಕಾರ, ಈ ಕಥೆ ಸಂಪೂರ್ಣ ಸತ್ಯವಲ್ಲ. ವಾಸ್ತವದಲ್ಲಿ ಭಾರತ ವಿಶ್ವಕಪ್‌ನಲ್ಲಿ ಆಡದೇ ಉಳಿಯಲು ಬೇರೆ ಕಾರಣಗಳೇ ಪ್ರಮುಖವಾಗಿದ್ದವು.

1948ರ ಲಂಡನ್ ಒಲಿಂಪಿಕ್ಸ್‌ನಲ್ಲಿ ಭಾರತೀಯ ಫುಟ್ಬಾಲ್ ತಂಡ ಫ್ರಾನ್ಸ್ ವಿರುದ್ಧ ಆಡಿತ್ತು. ಆ ಪಂದ್ಯದಲ್ಲಿ ಕೆಲವು ಆಟಗಾರರು ಬರಿಗಾಲಿನಲ್ಲಿ ಹಾಗೂ ಕೆಲವರು ಬೂಟ್ ಧರಿಸಿ ಆಡಿದ್ದರು.ಆ ಪಂದ್ಯದಲ್ಲಿ ಭಾರತ 1-2 ಅಂತರದಿಂದ ಸೋತರೂ, ತಂಡದ ಹೋರಾಟಕ್ಕೆ ವಿಶ್ವದಾದ್ಯಂತ ಮೆಚ್ಚುಗೆ ವ್ಯಕ್ತವಾಗಿತ್ತು. ಆ ವೇಳೆ ಭಾರತದ ನಾಯಕ Talimeren Ao ಬ್ರಿಟಿಷ್ ಮಾಧ್ಯಮಗಳಿಗೆ ನೀಡಿದ್ದ ಒಂದು ಹೇಳಿಕೆ ಬಹಳ ಪ್ರಸಿದ್ಧಿಯಾಯಿತು. "ನಾವು ಭಾರತದಲ್ಲಿ ಫುಟ್ಬಾಲ್ ಆಡುತ್ತೇವೆ, ನೀವು ಬೂಟ್‌ಬಾಲ್ ಆಡುತ್ತೀರಿ" ಎಂದು ಅವರು ಹಾಸ್ಯಮಯವಾಗಿ ಹೇಳಿದ್ದರು.

ಈ ಹೇಳಿಕೆ ಬ್ರಿಟಿಷ್ ಪತ್ರಿಕೆಗಳಲ್ಲಿ ದೊಡ್ಡ ಸುದ್ದಿಯಾಗಿತ್ತು. ಬಳಿಕ ಭಾರತ ಬರಿಗಾಲಿನಲ್ಲಿ ಆಡುತ್ತಿದ್ದ ತಂಡ ಎಂಬ ಚಿತ್ರಣ ಜಗತ್ತಿನಾದ್ಯಂತ ಹರಡಿತು. ಇದೇ ಮುಂದಕ್ಕೆ ವಿಶ್ವಕಪ್ ಅವಕಾಶ ಕಳೆದುಕೊಂಡ ಕಥೆಯಾಗಿ ರೂಪುಗೊಂಡಿತು.

ಫುಟ್ಬಾಲ್ ಇತಿಹಾಸಕಾರರು ಮತ್ತು ಕ್ರೀಡಾ ಪತ್ರಕರ್ತರ ಪ್ರಕಾರ, 1950ರ ವೇಳೆಗೆ FIFA ಆಟಗಾರರು ಕಡ್ಡಾಯವಾಗಿ ಬೂಟ್ ಧರಿಸಬೇಕು ಎಂಬ ನಿಯಮವೇ ಇರಲಿಲ್ಲ.ವಾಸ್ತವವಾಗಿ ಬೂಟ್ ಮತ್ತು ಇತರೆ ಸಲಕರಣೆಗಳಿಗೆ ಸಂಬಂಧಿಸಿದ FIFA ನಿಯಮಗಳು 1953ರಲ್ಲಿ ಜಾರಿಗೆ ಬಂದವು. ಹೀಗಾಗಿ "ಬೂಟ್ ಇಲ್ಲದ ಕಾರಣ ಭಾರತವನ್ನು ವಿಶ್ವಕಪ್‌ನಿಂದ ಹೊರಹಾಕಲಾಯಿತು" ಎಂಬ ಕಥೆಗೆ ಯಾವುದೇ ಸಾಕ್ಷ್ಯವಿಲ್ಲ ಎಂದು ತಜ್ಞರು ಹೇಳುತ್ತಾರೆ.

1950ರ FIFA ವಿಶ್ವಕಪ್ ಬ್ರೆಜಿಲ್‌ನಲ್ಲಿ ನಡೆಯಬೇಕಿತ್ತು.ಅಂದು ಏಷ್ಯಾದ ಅರ್ಹತಾ ಸುತ್ತಿನಲ್ಲಿ ಭಾರತ, ಬರ್ಮಾ (ಇಂದಿನ ಮ್ಯಾನ್ಮಾರ್) ಮತ್ತು ಫಿಲಿಪ್ಪೀನ್ಸ್ ತಂಡಗಳು ಒಂದೇ ಗುಂಪಿನಲ್ಲಿ ಇದ್ದವು. ಆದರೆ ಬರ್ಮಾ ಮತ್ತು ಫಿಲಿಪ್ಪೀನ್ಸ್ ತಂಡಗಳು ಸ್ಪರ್ಧೆಯಿಂದ ಹಿಂದೆ ಸರಿದವು. ಇದರಿಂದ ಭಾರತ ಯಾವುದೇ ಪಂದ್ಯ ಆಡದೆ ಏಷ್ಯಾದ ಏಕೈಕ ಸ್ಥಾನವನ್ನು ಪಡೆದು ವಿಶ್ವಕಪ್‌ಗೆ ಅರ್ಹತೆ ಗಳಿಸಿತ್ತು. ಇದು ಭಾರತೀಯ ಫುಟ್ಬಾಲ್ ಇತಿಹಾಸದ ಅತ್ಯಂತ ದೊಡ್ಡ ಅವಕಾಶವಾಗಿತ್ತು.

ಅಂದು ಭಾರತದಿಂದ ಬ್ರೆಜಿಲ್‌ಗೆ ತೆರಳುವುದು ತುಂಬಾ ದುಬಾರಿ ವೆಚ್ಚದ ಕೆಲಸವಾಗಿತ್ತು. ಸುಮಾರು ₹1 ಲಕ್ಷ ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿತ್ತು. ಮೊದಲಿಗೆ ಹಣದ ಕೊರತೆ ಸಮಸ್ಯೆಯಾಗಿತ್ತು. ಆದರೆ ನಂತರ ವಿವಿಧ ರಾಜ್ಯ ಫುಟ್ಬಾಲ್ ಸಂಸ್ಥೆಗಳು ಸಹಾಯಕ್ಕೆ ಮುಂದೆ ಬಂದಿದ್ದವು. ಬೆಂಗಾಲ್ ಫುಟ್ಬಾಲ್ ಸಂಸ್ಥೆ – ₹25,000, ಮೈಸೂರು ಫುಟ್ಬಾಲ್ ಸಂಸ್ಥೆ – ₹10,000, ಮಹಾರಾಷ್ಟ್ರ ಫುಟ್ಬಾಲ್ ಸಂಸ್ಥೆ – ₹15,000 ಹೀಗೆ ಹಣದ ಸಮಸ್ಯೆ ಬಹುತೇಕ ಪರಿಹಾರವಾಗಿತ್ತು.

ಕ್ರೀಡಾ ಇತಿಹಾಸಕಾರರ ಪ್ರಕಾರ, ಅಂದು ವಿಶ್ವಕಪ್‌ಗೆ ಇಂದಿನಷ್ಟೊಂದು ಮಹತ್ವ ಇರಲಿಲ್ಲ. ಆ ಕಾಲದಲ್ಲಿ ಒಲಿಂಪಿಕ್ಸ್ ಕ್ರೀಡಾಕೂಟವೇ ಅತ್ಯಂತ ಪ್ರತಿಷ್ಠಿತ ವೇದಿಕೆಯಾಗಿತ್ತು. ಭಾರತ ಸರ್ಕಾರ ಹಾಗೂ ಕ್ರೀಡಾ ಆಡಳಿತಗಾರರು ವಿಶ್ವಕಪ್‌ಗಿಂತ ಒಲಿಂಪಿಕ್ಸ್‌ಗೆ ಹೆಚ್ಚಿನ ಆದ್ಯತೆ ನೀಡಿದ್ದರು ಎನ್ನಲಾಗಿದೆ. 1948ರ ಒಲಿಂಪಿಕ್ಸ್‌ನಲ್ಲಿ ಭಾರತ ಉತ್ತಮ ಪ್ರದರ್ಶನ ನೀಡಿದ್ದರಿಂದ ಮುಂದಿನ ಒಲಿಂಪಿಕ್ಸ್‌ಗಾಗಿ ತಯಾರಿ ನಡೆಸುವುದೇ ಮುಖ್ಯ ಎಂದು ನಿರ್ಧರಿಸಲಾಗಿತ್ತು.

ವಿಶ್ವಕಪ್ ಆರಂಭಕ್ಕೆ ಕೇವಲ 10 ದಿನ ಬಾಕಿ ಇರುವಾಗ All India Football Federation (AIFF) FIFAಗೆ ಪತ್ರ ಕಳುಹಿಸಿ ಟೂರ್ನಿಯಿಂದ ಹಿಂದೆ ಸರಿಯುವುದಾಗಿ ತಿಳಿಸಿತ್ತು. ಸಾಕಷ್ಟು ಸಮಯ ಸಿಗಲಿಲ್ಲ, ಆಯ್ಕೆ ಪ್ರಕ್ರಿಯೆಯಲ್ಲಿ ಸಮಸ್ಯೆಗಳಿದ್ದವು ಹಾಗೂ ಇತರ ಆಡಳಿತಾತ್ಮಕ ಕಾರಣಗಳನ್ನು ಉಲ್ಲೇಖಿಸಲಾಗಿತ್ತು. ಈ ನಿರ್ಧಾರವನ್ನು ಭಾರತೀಯ ಫುಟ್ಬಾಲ್ ಇತಿಹಾಸದ ಅತಿದೊಡ್ಡ ತಪ್ಪುಗಳಲ್ಲಿ ಒಂದೆಂದು ಹಲವರು ಪರಿಗಣಿಸುತ್ತಾರೆ.

ಭಾರತದ ಮಾಜಿ ನಾಯಕ Bhaichung Bhutia ಸೇರಿದಂತೆ ಹಲವು ಮಾಜಿ ಆಟಗಾರರು, 1950ರಲ್ಲಿ ಭಾರತ ವಿಶ್ವಕಪ್ ಆಡಿದ್ದರೆ ಭಾರತೀಯ ಫುಟ್ಬಾಲ್‌ನ ಭವಿಷ್ಯ ಬೇರೆಯೇ ಆಗಿರುತ್ತಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಪ್ರಸ್ತುತ ಭಾರತೀಯ ತಂಡದ ಮಾಜಿ ನಾಯಕ Sunil Chhetri ಕೂಡ, ವಿಶ್ವಕಪ್‌ನಲ್ಲಿ ಆಡಿದ್ದರೆ ದೇಶದಲ್ಲಿ ಫುಟ್ಬಾಲ್ ಇನ್ನಷ್ಟು ಬೆಳೆಯುವ ಸಾಧ್ಯತೆ ಇತ್ತು ಎಂದು ಹೇಳಿದ್ದರು.

ಇದರ ನಡುವೆ ಭಾರತೀಯ ಫುಟ್ಬಾಲ್‌ನಲ್ಲಿ ಮತ್ತೊಂದು ಮಹತ್ವದ ಬೆಳವಣಿಗೆ ನಡೆದಿದೆ. AIFF ಮತ್ತು ಇಂಡಿಯನ್ ಸೂಪರ್ ಲೀಗ್ (ISL) ಕ್ಲಬ್‌ಗಳ ನಡುವೆ ನಾಲ್ಕು ವರ್ಷಗಳ ಹೊಸ ಮಾದರಿಗೆ ಒಪ್ಪಂದವಾಗಿದೆ.ಹೊಸ ವ್ಯವಸ್ಥೆಯಲ್ಲಿ ಕ್ಲಬ್‌ಗಳೇ ಲೀಗ್ ನಿರ್ವಹಣೆಯಲ್ಲಿ ಹೆಚ್ಚಿನ ಪಾತ್ರ ವಹಿಸಲಿವೆ. ಜೊತೆಗೆ ಬಡ್ತಿ ಮತ್ತು ಇಳಿಕೆ (Promotion-Relegation) ವ್ಯವಸ್ಥೆ ಮುಂದುವರಿಯಲಿದೆ ಎಂದು ತಿಳಿಸಲಾಗಿದೆ.

ಒಟ್ಟಾರೆ, 1950ರ ವಿಶ್ವಕಪ್ ಅವಕಾಶ ಕೈತಪ್ಪಿದ ಕಥೆ ಇಂದಿಗೂ ಭಾರತೀಯ ಫುಟ್ಬಾಲ್ ಅಭಿಮಾನಿಗಳಲ್ಲಿ ನೋವನ್ನುಂಟು ಮಾಡುತ್ತದೆ. ಆದರೆ ಬರಿಗಾಲಿನ ಕಾರಣದಿಂದ ಭಾರತ ವಿಶ್ವಕಪ್ ಆಡಲಿಲ್ಲ ಎಂಬ ನಂಬಿಕೆ ಕೇವಲ ಒಂದು ಮಿಥ್ಯೆ ಎಂಬುದು ಈಗ ಸ್ಪಷ್ಟವಾಗಿದೆ,(ಏಜೆನ್ಸೀಸ್​).