ಕೋಟಿ ಆಸೆಗೆ ಅಪ್ರಾಪ್ತ ಯುವಕನನ್ನು ಕೊಂದು, ವೃಷಣ ಕದ್ದ ಪಾಪಿಗಳು
- ಯುವಕರ ವೃಷಣಕ್ಕೆ ಕೋಟಿ ಬೆಲೆ ಎಂಬ ರೀಲ್
- ಇನ್ಸ್ಟಾಗ್ರಾಮ್ ರೀಲ್ ನೋಡಿ ಗೆಳೆಯನನ್ನು ಕೊಂದ ಪಾಪಿಗಳು
- ವೃಷಣ ಕಳ್ಳರನ್ನು ಪೊಲೀಸರು ಪತ್ತೆ ಹಚ್ಚಿದ್ದೇಗೆ?
ಭೋಪಾಲ್: ಅಪ್ರಾಪ್ತ ಯುವಕರ ವೃಷಣಗಳು ಕೋಟಿ ಬೆಲೆಗೆ ಮಾರಾಟವಾಗುತ್ತದೆ ಎಂಬ ಇನ್ಸ್ಟಾಗ್ರಾಮ್ ರೀಲ್ ನೋಡಿ, ಕೊಲೆ (Murder for Testicles) ಮಾಡಿರುವ ಘಟನೆಯೊಂದು ಮಧ್ಯಪ್ರದೇಶದ ಭೋಪಾಲ್ನಲ್ಲಿ ವರದಿಯಾಗಿದೆ.
ಹುಡುಗರ ವೃಷಣಗಳಿಗೆ ಸುಮಾರು 1 ರಿಂದ 1.50 ಕೋಟಿಗೆ ಬೆಲೆಯಿದೆ ಎಂದು ಭಾವಿಸಿರುವ ಯುವಕರ ಗುಂಪೊಂದು ರಸ್ತೆಯಲ್ಲಿ ಪೆನ್ನು, ಕೀ ಚೈನ್ ಮಾರುತ್ತಿದ್ದ ರಿಹಾನ್ ಎಂಬಾತನನ್ನು ಕೊಲೆ ಮಾಡಿರುವ ಘಟನೆ ಬೆಳಕಿಗೆ ಬಂದಿದೆ.
ಇನ್ಸ್ಟಾಗ್ರಾಮ್ ರೀಲ್ ತಂದ ಆಪತ್ತು!
ಜೋಹೆಬ್ ಖಾನ್ ಎಂಬ ಎರಡನೇ ವರ್ಷದ ಬಿಬಿಎ ವಿದ್ಯಾರ್ಥಿ, ತಾನೊಬ್ಬ ಡಾಕ್ಟರ್ ಎಂಬಂತೆ ಪೋಸ್ ಕೊಟ್ಟು ಇನ್ಸ್ಟಾಗ್ರಾಮ್ನಲ್ಲಿ 15-20 ವರ್ಷದ ಹುಡುಗರ ವೃಷಣಗಳಿಗೆ ಒಂದು ಕೋಟಿಗೂ ಹೆಚ್ಚಿನ ಬೆಲೆಯಿದೆ ಎಂದು ಹೇಳಿದ್ದಾನೆ.
ಇವನ ಮಾತನ್ನು ನಂಬಿದ ಇಬ್ಬರು ಅಪ್ರಾಪ್ತರು ಈ ರಿಹಾನ್ ಎಂಬ ಯುವಕನನ್ನು ಕೋಟಿ ಆಸೆಗೆ ಕೊಲೆ ಮಾಡಿದ್ದಾಗಿ ತಿಳಿದು ಬಂದಿದೆ. ಈ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜೋಹೆಬ್ ಖಾನ್, ಆಮೀರ್ ಖುರೇಶಿ ಹಾಗೂ ಇನ್ನು ಮೂರು ಜನ ಅಪ್ರಾಪ್ತ ಯುವಕರನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ವೃಷಣ ಮಾರಾಟವಾಗದೆ ಸಿಕ್ಕಿಬಿದ್ದರು!
ಡಿಸಿಪಿ ಆಯುಶ್ ಗುಪ್ತಾ ನೀಡಿರುವ ಮಾಹಿತಿ ಪ್ರಕಾರ, ಬಂಧಿತ ಅಪ್ರಾಪ್ತ ಬಾಲಕರು ಮೃತ ರಿಹಾನ್ನ ಪರಿಚಿತರೆಂದು ತಿಳಿದು ಬಂದಿದೆ. ವೃಷಣ ಮಾರಿದರೆ ಕೋಟಿ ಸಿಗುತ್ತದೆ ಎಂದು ತಿಳಿದ ಇವರು ರಿಹಾನ್ನನ್ನು ಕೊಲ್ಲಲ್ಲು ಯೋಜನೆ ರೂಪಿಸಿದ್ದಾರೆ.
ತಮಗೆ ಎದುರಿನ ಗಲ್ಲಿ ಹುಡುಗರ ಜೊತೆ ಜಗಳವಾಗಿದೆ, ನೀನು ನಮ್ಮ ಜೊತೆಗೆ ಬಾ ಎಂದು ನೂರು ರೂಪಾಯಿಯನ್ನು ರಿಹಾನ್ಗೆ ನೀಡಿದ್ದಾರೆ. ನಂತರ ನೂರು ರೂಪಾಯಿ ಆಸೆಗೆ ಇವರೊಟ್ಟಿಗೆ ಹೋದ ರಿಹಾನ್ನನ್ನು ಕೊಂದು ಆತನ ವೃಷಣಗಳನ್ನು ಇವರು ಇಟ್ಟುಕೊಂಡಿದ್ದಾರೆ.
ಆದರೆ, ಈ ವೃಷಣವನ್ನು ಯಾರಿಗೆ ಮಾರಬೇಕು? ಹೇಗೆ ಮಾರಬೇಕು? ಖರೀದಿಗಾರರು ಎಲ್ಲಿ ಸಿಗುತ್ತಾರೆ? ಎಂಬ ಮಾಹಿತಿ ತಿಳಿಯದೇ ಗಾಬರಿಯಾಗಿದ್ದಾರೆ. ನಂತರ ಇದೊಂದು ಸುಳ್ಳು ಮಾಹಿತಿಯುಳ್ಳ ರೀಲ್ ಎಂದು ತಿಳಿದು ವೃಷಣವನ್ನು ಹಳ್ಳಕ್ಕೆ ಎಸೆದಿದ್ದಾರೆ.
ಸಿಕ್ಕಿಬಿದ್ದಿದ್ದು ಹೇಗೆ?
ಆದರೆ, ಈ ಗ್ಯಾಂಗ್ ಇಲ್ಲೊಂದು ತಪ್ಪು ಮಾಡಿದೆ. ರಿಹಾನ್ನನ್ನು ಕೊಂದು ಅವನ ದೇಹವನ್ನು ಅಲ್ಲೇ ಅವಿಸಿಟ್ಟು ಹೋಗಿದ್ದಾರೆ. ಆದರೆ ಕೆಲ ದಿನಗಳ ನಂತರ ರಿಹಾನ್ನ ಮೃತದೇಹ ಪತ್ತೆಯಾಗಿದೆ. ಮರಣೋತ್ತರ ಪರೀಕ್ಷೆ ನಡೆಸಿದಾಗ ವೃಷಣ ಕತ್ತರಿಸಿರುವುದು ತಿಳಿದಿದ್ದು, ಇದೊಂದು ಮಾನವ ದೇಹ ಕಳ್ಳ ಸಾಗಾಣಿಕೆ ಪ್ರಕರಣ ಎಂದು ಭಾವಿಸಲಾಗಿದೆ.
ನಂತರ ಈ ರಿಹಾನ್ನ ಸೋಷಿಯಲ್ ಮೀಡಿಯಾ ಹಾಗೂ ಅಕ್ಕ-ಪಕ್ಕದಲ್ಲಿ ವಿಚಾರಿಸಿದಾಗ, ಈ ಕೊಲೆಗಾರರ ಪತ್ತೆಯಾಗಿದೆ. ನಂತರ ಈ ಕೋಟಿ ಬೆಲೆ ವೃಷಣದ ವೃತ್ತಾಂತ ಬೆಳಕಿಗೆ ಬಂದಿದೆ, (ಏಜನ್ಸೀಸ್).