ನವದೆಹಲಿ: ನಂದಿನಿ ಆಯ್ತು, ಅಮೂಲ್ ಆಯ್ತು, ಈಗ ಪಂಜಾಬ್ ರಾಜ್ಯ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ಲಿಮಿಟೆಡ್‌ನ ಪ್ರಮುಖ ಬ್ರ್ಯಾಂಡ್ ಆಗಿರುವ ವೆರ್ಕಾ ಹಾಲಿನ ಬೆಲೆಯೂ ಗರಿಷ್ಠ 8 ರೂಪಾಯಿಗಳಷ್ಟು ಹೆಚ್ಚಾಗಿದೆ.
ಪಂಜಾಬ್ ಮತ್ತು ದೆಹಲಿ-ಎನ್‌ಸಿಆರ್ ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಜಾರಿಗೆ ಬರುವಂತೆ ಇಂದು(ನ. 13) ಬೆಳಗ್ಗೆ ತನ್ನ ವಿವಿಧ ಬಗೆಯ ಪ್ಯಾಕೆಟ್ ಹಾಲಿನ ಗರಿಷ್ಠ ಚಿಲ್ಲರೆ ಬೆಲೆಯನ್ನು 1 ರೂಪಾಯಿಯಿಂದ 8 ರೂಪಾಯಿಗಳವರೆಗೆ ಹೆಚ್ಚಿಸಿದೆ.
ಪಂಜಾಬ್ ರಾಜ್ಯ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ಲಿಮಿಟೆಡ್ ಗುರುವಾರ ಹೊರಡಿಸಿದ ಸುತ್ತೋಲೆಯ ಪ್ರಕಾರ, ಪಂಜಾಬ್ ಮತ್ತು ಅದರ ಸುತ್ತಮುತ್ತಲಿನ ಪ್ರದೇಶಗಳಲ್ಲಿನ ಇತರ ಪ್ರಮುಖ ಹಾಲು ಉತ್ಪಾದಕ ಸಂಸ್ಥೆಗಳ ದರಗಳ ಕುರಿತು ಚರ್ಚಿಸಲು ವೀಡಿಯೊ ಕಾನ್ಫರೆನ್ಸಿಂಗ್ ಮೂಲಕ ನಡೆಸಿದ ಸಭೆಯ ಬಳಿಕ ಈ ದರ ಪರಿಷ್ಕರಣೆಯನ್ನು ಮಾಡಲಾಗಿದೆ.
ಪರಿಷ್ಕೃತ ದರಗಳ ಅನ್ವಯ, 500 ಮಿಲಿ ಪೂರ್ಣ ಕೆನೆ ಹಾಲಿನ ಬೆಲೆಯನ್ನು 36 ರೂಪಾಯಿಯಿಂದ 38 ರೂಪಾಯಿಗೆ ಹೆಚ್ಚಿಸಲಾಗಿದೆ. ಹಾಗೆಯೇ, 'ಸ್ಟ್ಯಾಂಡರ್ಡ್' ಹಾಲಿನ ಬೆಲೆ 33 ರೂಪಾಯಿಯಿಂದ 35 ರೂಪಾಯಿಗೆ ಏರಿಕೆಯಾಗಿದೆ. ಇನ್ನು 500 ಮಿಲಿ 'ಟೋನ್ಡ್' ಹಾಲಿನ ಬೆಲೆಯನ್ನು 30 ರೂಪಾಯಿಯಿಂದ 31 ರೂಪಾಯಿಗೆ, 'ಡಬಲ್ ಟೋನ್ಡ್' ಹಾಲಿನ ಬೆಲೆಯನ್ನು 27 ರೂಪಾಯಿಯಿಂದ 28 ರೂಪಾಯಿಗೆ, ಹಸುವಿನ ಹಾಲಿನ ಬೆಲೆಯನ್ನು 31 ರೂಪಾಯಿಯಿಂದ 33 ರೂಪಾಯಿಗೆ ಹಾಗೂ 'ಸ್ಕಿಮ್ಡ್' ಹಾಲಿನ ಬೆಲೆಯನ್ನು 24 ರೂಪಾಯಿಯಿಂದ 25 ರೂಪಾಯಿಗೆ ಹೆಚ್ಚಿಸಲಾಗಿದೆ.
ಒಂದು ಲೀಟರ್ ಪ್ಯಾಕ್‌ಗಳಿಗೆ, ಪೂರ್ಣ ಕೆನೆ ಹಾಲಿನ ಬೆಲೆ ಈಗ 72 ರೂ.ಗಳಿಂದ 76 ರೂ.ಗಳಿಗೆ ಏರಿಕೆಯಾಗಿದ್ದು, ಪ್ರಮಾಣಿತ ಹಾಲನ್ನು 65 ರೂ.ಗಳಿಂದ 69 ರೂ.ಗಳಿಗೆ ಹೆಚ್ಚಿಸಲಾಗಿದೆ. ಟೋನ್ಡ್ ಹಾಲಿನ ಬೆಲೆಯನ್ನು 59 ರೂ.ಗಳಿಂದ 61 ರೂ.ಗಳಿಗೆ ಮತ್ತು ಡಬಲ್ ಟೋನ್ಡ್ ಹಾಲಿನ ಬೆಲೆಯನ್ನು 53 ರೂ.ಗಳಿಂದ 55 ರೂ.ಗಳಿಗೆ ಪರಿಷ್ಕರಿಸಲಾಗಿದೆ.
ದೊಡ್ಡ ಪ್ಯಾಕ್‌ಗಳ ಬೆಲೆಯನ್ನೂ ಪರಿಷ್ಕರಿಸಲಾಗಿದ್ದು, 1.5 ಲೀಟರ್ ಪ್ಯಾಕ್‌ನಲ್ಲಿ ಪೂರ್ಣ ಕೆನೆ ಹಾಲಿನ ಬೆಲೆ ಈಗ 106 ರೂ.ಗಳಿಂದ 112 ರೂ.ಗಳಿಗೆ ಏರಿಕೆಯಾಗಿದೆ. ಪ್ರಮಾಣಿತ ಹಾಲಿನ ಬೆಲೆ 96 ರೂ.ಗಳಿಂದ 102 ರೂ.ಗಳಿಗೆ,1.5 ಲೀಟರ್ ಹಸುವಿನ ಹಾಲಿನ ಬೆಲೆ 90 ರೂ.ಗಳಿಂದ 96 ರೂ.ಗಳಿಗೆ ಏರಿಕೆಯಾಗಿದೆ.
ಎರಡು ಲೀಟರ್ ಪ್ಯಾಕ್‌ಗಳಿಗೆ, ಪೂರ್ಣ ಕೆನೆ ಹಾಲಿನ ಬೆಲೆ ಈಗ 142 ರೂ.ನಿಂದ 150 ರೂ.ಗೆ ಏರಿಕೆಯಾಗಿದ್ದು, ಪ್ರಮಾಣಿತ ಹಾಲಿನ ಬೆಲೆ 128 ರೂ.ನಿಂದ 136 ರೂ.ಗೆ ಏರಿಕೆಯಾಗಿದೆ. ಆದಾಗ್ಯೂ, 180 ಮಿಲಿ ಡಬಲ್ ಟೋನ್ಡ್ ಹಾಲು ಮತ್ತು 350 ಮಿಲಿ ಟೋನ್ಡ್ ಹಾಲಿನ ಬೆಲೆಗಳಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ.
ಅಸ್ತಿತ್ವದಲ್ಲಿರುವ ಪ್ಯಾಕೇಜಿಂಗ್ ಫಿಲ್ಮ್ ಸ್ಟಾಕ್ ಖಾಲಿಯಾದ ನಂತರ 350 ಮಿಲಿ ಟೋನ್ಡ್ ಹಾಲಿನ ಪ್ಯಾಕ್ ಪ್ರಮಾಣವನ್ನು 320 ಮಿಲಿ ಮತ್ತು 450 ಮಿಲಿ ಸ್ಟ್ಯಾಂಡರ್ಡ್ ಹಾಲಿನ ಪ್ಯಾಕ್ ಪ್ರಮಾಣವನ್ನು 430 ಮಿಲಿಗೆ ಇಳಿಸಲು ಒಕ್ಕೂಟ ನಿರ್ಧರಿಸಿದೆ (ಏಜೆನ್ಸೀಸ್).