ಪ್ರಶ್ನೆ ಕೇಳುವುದು ಮುಗಿಯಿತು, ಈಗ ಪರಿಹಾರ ಕೊಡುವುದಷ್ಟೇ...ನೀಟ್ ಪೇಪರ್ ಲೀಕ್ ವಿಚಾರದಲ್ಲಿ ಮೌನದ ರಹಸ್ಯ ಬಿಚ್ಚಿಟ್ಟ ಚಡ್ಡಾ! | Raghav Chadha

ಕಾಂಗ್ರೆಸ್ ಮತ್ತು ತಮ್ಮ ಹಳೆಯ ಪಕ್ಷವಾದ ಆಪ್​ ಕಾಲೆಳೆದ ಸಂಸದ ಚಡ್ಡಾ, ವಿರೋಧ ಪಕ್ಷದಿಂದ ಆಡಳಿತ ಪಕ್ಷದ ಸಾಲಿಗೆ ಬಂದ ನಂತರ ತಮ್ಮ ಪಾತ್ರ ಬದಲಾಗಿದ್ದು, ಈಗ ಪರಿಹಾರ ಕಂಡುಕೊಳ್ಳುವುದರ ಮೇಲಷ್ಟೇ ತಮ್ಮ ಗಮನವಿದೆ ಎಂದು ಹೇಳಿದರು.

ಎನ್‌ಡಿಎ ನೇತೃತ್ವದ ಸರ್ಕಾರವು ಖಚಿತವಾದ ಪರಿಹಾರವನ್ನು ಮುನ್ನೆಲೆಗೆ ತಂದ ನಂತರವೇ ಮಾತನಾಡಲು ಉದ್ದೇಶಪೂರ್ವಕವಾಗಿ ನಿರ್ಧರಿಸಿತ್ತು ಎಂದು ಚಡ್ಡಾ ಹೇಳಿದರು. ಈ ಸಮಸ್ಯೆಗೆ ನಮ್ಮ ಬಳಿ ಪರಿಹಾರ ಸಿಕ್ಕಾಗ ಮಾತ್ರ ಮಾತನಾಡಬೇಕು ಎಂದು ನಾನು ನಿರ್ಧರಿಸಿದ್ದೆ, ಇಂದು ಆ ದಿನ ಬಂದಿದೆ. ನಮ್ಮ ಸರ್ಕಾರ ಈ ಕಾಯಿಲೆಗೆ ಚಿಕಿತ್ಸೆ ತಂದಿದೆ. ನಾನು ಕೂಡ ಟಿವಿ ಕ್ಯಾಮೆರಾಗಳ ಮುಂದೆ ಮಾತನಾಡಬಹುದಿತ್ತು, ಆದರೆ ಅದರ ಬದಲು ನಾವು ಶಾಶ್ವತ ಪರಿಹಾರವನ್ನು ಕಂಡುಕೊಂಡಿದ್ದೇವೆ ಎಂದು ಚಡ್ಡಾ ತಿಳಿಸಿದರು.

ವಿದ್ಯಾರ್ಥಿಗಳಿಗೆ ಸಂಬಂಧಿಸಿದ ಸಮಸ್ಯೆಗಳು ಎದುರಾದಾಗಲೆಲ್ಲಾ ಕೇಂದ್ರ ಸರ್ಕಾರವು ಆಲಿಸಿದೆ, ತಕ್ಷಣ ಸ್ಪಂದಿಸಿದೆ ಮತ್ತು ಸೂಕ್ತ ಕ್ರಮ ಕೈಗೊಂಡಿದೆ ಎಂದು ಪ್ರತಿಪಾದಿಸಿದ ರಾಜ್ಯಸಭಾ ಸಂಸದ, ಪ್ರಶ್ನೆಪತ್ರಿಕೆ ಸೋರಿಕೆ ತಡೆಯಲು ಸರ್ಕಾರ ಕೈಗೊಂಡಿರುವ ಹಲವಾರು ಕ್ರಮಗಳನ್ನು ಈ ವೇಳೆ ಉಲ್ಲೇಖಿಸಿದರು. ಇದರಲ್ಲಿ ಗಣಕೀಕೃತ (Computerized) ಪರೀಕ್ಷೆಗಳಿಗೆ ಆದ್ಯತೆ ನೀಡುವುದು ಮತ್ತು ಸಂಘಟಿತ ಸಿಂಡಿಕೇಟ್‌ಗಳನ್ನು ಸಂಪೂರ್ಣವಾಗಿ ಮಟ್ಟಹಾಕಲು ತಂದಿರುವ ಕಠಿಣ ಶಾಸನಬದ್ಧ ಶಿಕ್ಷೆಗಳು ಸೇರಿವೆ.

ಇದೇ ವೇಳೆ ಕಾಂಗ್ರೆಸ್ ಆಡಳಿತಾವಧಿಯಲ್ಲಿ ನಡೆದ ಪೇಪರ್ ಲೀಕ್ ಘಟನೆಗಳನ್ನು ನೆನಪಿಸಿದ ಚಡ್ಡಾ, ಕರ್ನಾಟಕದಲ್ಲಿ ಈ ವರ್ಷ ನಡೆದಿದೆ ಎನ್ನಲಾದ ಎಸ್‌ಎಸ್‌ಎಲ್‌ಸಿ ಪರೀಕ್ಷಾ ಪೇಪರ್ ಲೀಕ್ ಮತ್ತು 2016 ರ ದ್ವಿತೀಯ ಪಿಯುಸಿ ಕೆಮಿಸ್ಟ್ರಿ ಪೇಪರ್ ಲೀಕ್ ಪ್ರಕರಣಗಳನ್ನು ಉಲ್ಲೇಖಿಸಿದರು. ಜೊತೆಗೆ ವಿದ್ಯಾರ್ಥಿ ಚಳವಳಿಗಳನ್ನು ರಾಜಕೀಯಗೊಳಿಸುವುದರ ವಿರುದ್ಧ ಎಚ್ಚರಿಕೆ ನೀಡಿದರು.

ವಿದ್ಯಾರ್ಥಿಗಳ ಧ್ವನಿ ಅತ್ಯಂತ ಪ್ರಮುಖವಾದದ್ದು. ಅವರ ಬೇಡಿಕೆಗಳು ನ್ಯಾಯಯುತವಾಗಿವೆ. ಪ್ರತಿಭಟನೆ ಮಾಡುವುದು, ಪ್ರಶ್ನೆ ಕೇಳುವುದು, ಬೇಡಿಕೆಗಳನ್ನು ಈಡೇರಿಸುವಂತೆ ಒತ್ತಾಯಿಸುವುದು ಹಾಗೂ ಶಾಂತಿಯುತ ಮೆರವಣಿಗೆ ನಡೆಸುವುದು ಅವರ ಸಾಂವಿಧಾನಿಕ ಹಕ್ಕು. ಆದರೆ ವಿದ್ಯಾರ್ಥಿಗಳ ಪ್ರತಿಭಟನೆ ಎಂದಿಗೂ ವಿದ್ಯಾರ್ಥಿ ಪ್ರತಿಭಟನೆಯಾಗಿಯೇ ಇರಬೇಕು. ಅದು ಯಾವುದೇ ರಾಜಕೀಯ ಪಕ್ಷದ ರ‍್ಯಾಲಿಯಾಗಬಾರದು ಎಂದು ಹೇಳಿದರು. ಇದೇ ವೇಳೆ ಅವರು ಪಂಜಾಬ್‌ನಲ್ಲಿ ನಡೆದ ಪರೀಕ್ಷಾ ಅಕ್ರಮಗಳ ಕುರಿತು ಅಲ್ಲಿನ ಸರ್ಕಾರವನ್ನೂ ಟೀಕಿಸಿದರು(ಏಜೆನ್ಸೀಸ್​​).