ದೆಹಲಿ ಅಗ್ನಿ ದುರಂತ: ರಕ್ಷಣೆಗಾಗಿ ಕಾಯುತ್ತಾ ವಾಶ್‌ರೂಮ್‌ನಲ್ಲಿ ಒಬ್ಬರನ್ನೊಬ್ಬರು ಅಪ್ಪಿ ಮೃತಪಟ್ಟ ದಂಪತಿ! Delhi fire couple death

ದೆಹಲಿಯ ಸಾಕೇತ್ ಬಳಿಯಿರುವ ಬೆಡ್ ಅಂಡ್ ಬ್ರೇಕ್‌ಫಾಸ್ಟ್ (B&B) ಹೋಟೆಲ್ ಮತ್ತು ರೆಸ್ಟೋರೆಂಟ್ ಕಟ್ಟಡದಲ್ಲಿ ಬುಧವಾರ ಬೆಳಗ್ಗೆ ಭೀಕರ ಅಗ್ನಿ ಅವಘಡ ಸಂಭವಿಸಿದೆ. ಬೆಂಕಿ ಇಡೀ ಕಟ್ಟಡವನ್ನು ಆವರಿಸುತ್ತಿದ್ದಂತೆ, ಮೊದಲ ಮಹಡಿಯಲ್ಲಿದ್ದ ದಂಪತಿಯೊಬ್ಬರು ಪ್ರಾಣ ಉಳಿಸಿಕೊಳ್ಳಲು ಅಲ್ಲಿನ ಶೌಚಾಲಯದೊಳಗೆ ಹೋಗಿ ಬಾಗಿಲು ಹಾಕಿಕೊಂಡಿದ್ದಾರೆ. ಅಗ್ನಿಶಾಮಕ ದಳದವರು ತಮ್ಮನ್ನು ಬಂದು ರಕ್ಷಿಸಬಹುದು ಎಂದು ಅವರು ಕೊನೆಯ ಕ್ಷಣದವರೆಗೂ ಕಾಯ್ದಿದ್ದಾರೆ.

ಆದರೆ, ದಟ್ಟವಾದ ಹೊಗೆ ಕಿಟಕಿಗಳ ಮೂಲಕ ಶೌಚಾಲಯದೊಳಗೂ ನುಗ್ಗಿದ್ದರಿಂದ ಉಸಿರುಗಟ್ಟಿ ಸಾವು ಸಂಭವಿಸಿದೆ. ರಕ್ಷಣಾ ಸಿಬ್ಬಂದಿ ಬಾಗಿಲು ಒಡೆದು ಒಳಗೆ ಹೋದಾಗ, ಮಹಿಳೆ ಶೌಚಾಲಯದ ಸೀಟಿನ ಮೇಲೆ ಕುಳಿತಿದ್ದರೆ, ಆಕೆಯ ಪಕ್ಕದಲ್ಲೇ ಕುಳಿತಿದ್ದ ಆಕೆಯ ಪತಿ ಆಕೆಯನ್ನು ಬಿಗಿಯಾಗಿ ಅಪ್ಪಿಕೊಂಡ ಸ್ಥಿತಿಯಲ್ಲೇ ಮೃತಪಟ್ಟಿದ್ದರು. ಪ್ರಾಥಮಿಕ ಮಾಹಿತಿಯ ಪ್ರಕಾರ, ಆ ಮಹಿಳೆ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದರು ಮತ್ತು ಆಕೆಯ ಪತಿ ಆಕೆಯನ್ನು ನೋಡಿಕೊಳ್ಳುತ್ತಿದ್ದರು ಎನ್ನಲಾಗಿದೆ. ದುರದೃಷ್ಟವಶಾತ್ ಅವರು ನಿರೀಕ್ಷಿಸಿದ್ದ ರಕ್ಷಣೆ ಸಮಯಕ್ಕೆ ಸರಿಯಾಗಿ ಸಿಗಲೇ ಇಲ್ಲ.

ಅಗ್ನಿಶಾಮಕ ಇಲಾಖೆಯ ಅಧಿಕಾರಿಗಳ ಪ್ರಕಾರ, ಬೆಳಗ್ಗೆ ಸುಮಾರು 9.05 ರ ಸುಮಾರಿಗೆ ಅಗ್ನಿಶಾಮಕ ವಾಹನಗಳು ಸ್ಥಳಕ್ಕೆ ತಲುಪಿದವು. ಆದರೆ, ಕಾರ್ಯಾಚರಣೆಯ ಆರಂಭದಲ್ಲೇ ಸಿಬ್ಬಂದಿಗೆ ದೊಡ್ಡ ಸವಾಲುಗಳು ಎದುರಾದವು. ಕಟ್ಟಡದ ಬೇಸ್‌ಮೆಂಟ್ ಪ್ರವೇಶದ್ವಾರವನ್ನು ಕಬ್ಬಿಣದ ದೊಡ್ಡ ಶಟರ್ ಹಾಕಿ ಸಂಪೂರ್ಣವಾಗಿ ಮುಚ್ಚಲಾಗಿತ್ತು.

ಅಧಿಕಾರಿಗಳ ಅಸಹಾಯಕತೆ: ಅಗ್ನಿ ದುರಂತದ ಸಮಯದಲ್ಲಿ ಪ್ರತಿಯೊಂದು ನಿಮಿಷವೂ ಅತ್ಯಂತ ಅಮೂಲ್ಯವಾಗಿರುತ್ತದೆ. ಆದರೆ ನಮಗೆ ಆ ಕಬ್ಬಿಣದ ಶಟರ್ ಅನ್ನು ಕತ್ತರಿಸಿ ದಾರಿ ಮಾಡಿಕೊಳ್ಳಲು 3 ರಿಂದ 4 ನಿಮಿಷಗಳ ಸುದೀರ್ಘ ಸಮಯ ಬೇಕಾಯಿತು ಎಂದು ಡಿವಿಷನ್ ಆಫೀಸರ್ ರವೀಂದರ್ ಸಿಂಗ್ ಬೇಸರ ವ್ಯಕ್ತಪಡಿಸಿದ್ದಾರೆ.

ಶಟರ್ ಕತ್ತರಿಸಿ ಒಳಹೋದ ಸಿಬ್ಬಂದಿಗೆ ಬೇಸ್‌ಮೆಂಟ್‌ನಲ್ಲಿ ದಟ್ಟ ಹೊಗೆಯ ನಡುವೆ ಉಸಿರಾಡಲು ಪರದಾಡುತ್ತಿದ್ದ 8 ಜನರನ್ನು ಸುರಕ್ಷಿತವಾಗಿ ರಕ್ಷಿಸಲು ಸಾಧ್ಯವಾಯಿತು. ಕಟ್ಟಡದ ಪ್ರಮುಖ ಮೆಟ್ಟಿಲುಗಳ ಭಾಗ ಸಂಪೂರ್ಣವಾಗಿ ದಟ್ಟ ಹೊಗೆಯಿಂದ ತುಂಬಿಹೋಗಿದ್ದರಿಂದ ಯಾರಿಗೂ ಹೊರಗೆ ಓಡಿ ಬರಲು ದಾರಿಯೇ ಇರಲಿಲ್ಲ.

ಈ ದುರಂತದ ಮತ್ತೊಂದು ಕಹಿ ಸತ್ಯವೆಂದರೆ, ಈ ಹೋಟೆಲ್‌ನಲ್ಲಿ ತಂಗಿದ್ದ ಬಹುತೇಕರು ಸಾಕೇತ್‌ನ ಪ್ರಸಿದ್ಧ ಖಾಸಗಿ ಆಸ್ಪತ್ರೆಗೆ ಚಿಕಿತ್ಸೆಗಾಗಿ ಬಂದ ರೋಗಿಗಳು ಅಥವಾ ಅವರ ಜೊತೆ ಬಂದಿದ್ದ ಸಂಬಂಧಿಕರಾಗಿದ್ದರು. ಚಿಕಿತ್ಸೆ ಮುಗಿಸಿ ಮನೆಗೆ ಮರಳಬೇಕಾಗಿದ್ದವರು ಇಂದು ಶವಪೆಟ್ಟಿಗೆಯಲ್ಲಿ ಮರಳುವಂತಾಗಿದೆ.

ಅಗ್ನಿಶಾಮಕ ದಳದ ಅಧಿಕಾರಿಯೊಬ್ಬರು ತಿಳಿಸಿರುವಂತೆ, ನೆಲಮಹಡಿಯಲ್ಲಿದ್ದ ರೆಸ್ಟೋರೆಂಟ್‌ನ ಅಡುಗೆಮನೆಯಲ್ಲಿ ಮೊದಲು ಬೆಂಕಿ ಕಾಣಿಸಿಕೊಂಡಿದೆ. ಕೆಲವೇ ನಿಮಿಷಗಳಲ್ಲಿ ಬೆಂಕಿಯ ಜ್ವಾಲೆಗಳು ಮೇಲಿನ ಮಹಡಿಗಳಿಗೆ ವ್ಯಾಪಿಸಿದವು. ಮೇಲಿನ ಮಹಡಿಗಳಲ್ಲಿದ್ದ ಕೋಣೆಗಳ ಬಾಗಿಲುಗಳು ತೆರೆದಿದ್ದರಿಂದ ಹೊಗೆ ಸುಲಭವಾಗಿ ಒಳ ನುಗ್ಗಿ, ಜನರು ತಪ್ಪಿಸಿಕೊಳ್ಳುವ ಮುನ್ನವೇ ಪ್ರಜ್ಞೆ ತಪ್ಪುವಂತೆ ಮಾಡಿದೆ.

ಸ್ಥಳೀಯ ನಿವಾಸಿಗಳು ಕೂಡ ತಕ್ಷಣವೇ ಧಾವಿಸಿ ಬಂದು, ಮೇಲಿನ ಮಹಡಿಗಳಲ್ಲಿದ್ದ ಜನರಿಗೆ ಕೆಳಗೆ ಜಿಗಿಯಿರಿ ಎಂದು ಧೈರ್ಯ ತುಂಬುತ್ತಾ, ಕೆಳಗೆ ಹಾಸಿಗೆ ಹಾಗೂ ಬಲೆಗಳನ್ನು ಹಿಡಿದು ಹಲವರ ಪ್ರಾಣ ಉಳಿಸಿದ್ದಾರೆ. ಸುಮಾರು 25 ಕ್ಕೂ ಹೆಚ್ಚು ಅಗ್ನಿಶಾಮಕ ವಾಹನಗಳು ಸತತ 3 ಗಂಟೆಗಳ ಕಾಲ ಭೀಕರ ಕಾರ್ಯಾಚರಣೆ ನಡೆಸಿದ ನಂತರ ಮಧ್ಯಾಹ್ನ 12.12 ರ ಸುಮಾರಿಗೆ ಬೆಂಕಿಯನ್ನು ಸಂಪೂರ್ಣವಾಗಿ ಹತೋಟಿಗೆ ತರಲಾಯಿತು.

ಎಲ್ಲಾ ಅಗ್ನಿ ಅವಘಡಗಳು ಸವಾಲಿನಿಂದ ಕೂಡಿರುತ್ತವೆ. ಆದರೆ ಇಷ್ಟೊಂದು ದೊಡ್ಡ ಪ್ರಮಾಣದ ಭೀಕರ ದುರಂತ ಮತ್ತು ಸಾವು-ನೋವುಗಳು ಇತ್ತೀಚಿನ ಇತಿಹಾಸದಲ್ಲಿ ದೆಹಲಿಯಲ್ಲಿ ಸಂಭವಿಸಿರಲಿಲ್ಲ ಎಂದು ರಕ್ಷಣಾ ಸಿಬ್ಬಂದಿ ತಿಳಿಸಿದ್ದಾರೆ. ಪ್ರಸ್ತುತ ಗಾಯಗೊಂಡವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಘಟನೆಗೆ ಕಾರಣವಾದ ಹೋಟೆಲ್ ಆಡಳಿತ ಮಂಡಳಿಯ ನಿರ್ಲಕ್ಷ್ಯದ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ,(ಏಜೆನ್ಸೀಸ್​).