ಕಿಶ್ತ್ವಾರ್: ಕಣಿವೆ ರಾಜ್ಯ ಜಮ್ಮು ಮತ್ತು ಕಾಶ್ಮೀರದಲ್ಲಿ ಮತ್ತೆ ರಕ್ತದೋಕುಳಿ ಹರಿದಿದೆ. ಕಿಶ್ತ್ವಾರ್ ಜಿಲ್ಲೆಯ ದುರ್ಗಮ ದಾಚಾನ್ ಅರಣ್ಯ ಪ್ರದೇಶದಿಂದ ನಿಗೂಢವಾಗಿ ನಾಪತ್ತೆಯಾಗಿದ್ದ ಇಬ್ಬರು ವಿಶೇಷ ಪೊಲೀಸ್ ಅಧಿಕಾರಿಗಳು (SPO) ಬರ್ಬರವಾಗಿ ಹತ್ಯೆಯಾಗಿದ್ದಾರೆ. ಗುರುವಾರ (ನ.12) ಮುಂಜಾನೆ ಇಬ್ಬರೂ ಸಿಬ್ಬಂದಿಯ ಗುಂಡೇಟು ತಗುಲಿದ ಮೃತದೇಹಗಳು ಪತ್ತೆಯಾಗಿದ್ದು, ಇಡೀ ಪ್ರದೇಶದಲ್ಲಿ ಆತಂಕದ ವಾತಾವರಣ ನಿರ್ಮಾಣವಾಗಿದೆ.
ಮೃತದೇಹಗಳು ಪತ್ತೆಯಾಗಿದ್ದರೂ, ಹುತಾತ್ಮ ಪೊಲೀಸರ ಬಳಿಯಿದ್ದ ಸರ್ಕಾರಿ ಶಸ್ತ್ರಾಸ್ತ್ರಗಳು ನಾಪತ್ತೆಯಾಗಿವೆ. ಇದು ಉಗ್ರರ ಪೂರ್ವನಿಯೋಜಿತ ಕೃತ್ಯವಾಗಿರಬಹುದು ಎಂಬ ಬಲವಾದ ಅನುಮಾನಕ್ಕೆ ಎಡೆಮಾಡಿಕೊಟ್ಟಿದೆ.
ಮೃತ ದುರ್ದೈವಿಗಳನ್ನು 57 ವರ್ಷದ ಅಬಿ ಚಂದ್ ಮತ್ತು 45 ವರ್ಷದ ರಾಶ್ಪಾಲ್ ಕುಮಾರ್ ಎಂದು ಗುರುತಿಸಲಾಗಿದೆ. ಇವರಿಬ್ಬರೂ ದಾಚಾನ್ ಪ್ರದೇಶದ ಕಿಯಾರ್ ಗ್ರಾಮದಲ್ಲಿರುವ ಜಮ್ಮು-ಕಾಶ್ಮೀರ ಪೊಲೀಸರ ವಿಶೇಷ ಕಾರ್ಯಾಚರಣೆ ಗುಂಪಿನಲ್ಲಿ (SOG) ಕರ್ತವ್ಯ ನಿರ್ವಹಿಸುತ್ತಿದ್ದರು.
ಅಧಿಕಾರಿಗಳು ನೀಡಿರುವ ಮಾಹಿತಿಯ ಪ್ರಕಾರ, ಅಬಿ ಚಂದ್ ಮತ್ತು ರಾಶ್ಪಾಲ್ ಕುಮಾರ್, ಕಿಯಾರ್ ಪೊಲೀಸ್ ಶಿಬಿರದಿಂದ ಧರ್ನಾ-ಮರ್ವಾಹ್‌ನಲ್ಲಿರುವ ಸೇನಾ ನೆಲೆಗೆ ಕರ್ತವ್ಯದ ನಿಮಿತ್ತ ತೆರಳುತ್ತಿದ್ದರು. ಆದರೆ, ನಿಗದಿತ ಸಮಯ ಕಳೆದರೂ ಅವರು ಸೇನಾ ನೆಲೆಯನ್ನು ತಲುಪಿರಲಿಲ್ಲ. ಆರಂಭದಲ್ಲಿ ಇಬ್ಬರ ಮೊಬೈಲ್ ಫೋನ್‌ಗಳಿಗೆ ಕರೆ ಹೋಗುತ್ತಿತ್ತಾದರೂ, ಸ್ವಲ್ಪ ಸಮಯದಲ್ಲೇ ಎರಡೂ ಫೋನ್‌ಗಳು ಏಕಾಏಕಿ ಸ್ವಿಚ್ ಆಫ್ ಆಗಿದ್ದವು. ಇದರಿಂದ ಗಾಬರಿಗೊಂಡ ಭದ್ರತಾ ಪಡೆಗಳು ತಕ್ಷಣವೇ ಅಲರ್ಟ್ ಆಗಿದ್ದವು.
ಸಿಬ್ಬಂದಿ ನಾಪತ್ತೆಯಾದ ಬೆನ್ನಲ್ಲೇ, ಸ್ಥಳೀಯ ಪೊಲೀಸರು ಮತ್ತು ಭಾರತೀಯ ಸೇನೆಯ ರಾಷ್ಟ್ರೀಯ ರೈಫಲ್ಸ್ ಪಡೆಗಳು ಪರ್ವತ ಶ್ರೇಣಿಗಳು ಮತ್ತು ದಟ್ಟ ಅರಣ್ಯ ಪ್ರದೇಶಗಳಲ್ಲಿ ತೀವ್ರ ಶೋಧ ಕಾರ್ಯಾಚರಣೆ ಆರಂಭಿಸಿದ್ದವು. ಗುರುವಾರ ಬೆಳಗಿನ ಜಾವ ಶೋಧ ತಂಡಗಳಿಗೆ ಇಬ್ಬರು SPOಗಳ ಗುಂಡೇಟು ತಗುಲಿದ ಮೃತದೇಹಗಳು ಪತ್ತೆಯಾಗಿವೆ.
ಸದ್ಯ ಹತ್ಯೆಗೈದ ಹಂತಕರ ಪತ್ತೆಗೆ ಇಡೀ ಅರಣ್ಯ ಪ್ರದೇಶವನ್ನು ಸುತ್ತುವರಿಯಲಾಗಿದ್ದು, ಹೆಚ್ಚುವರಿ ಭದ್ರತಾ ಪಡೆಗಳನ್ನು ನಿಯೋಜಿಸಲಾಗಿದೆ. ಆದರೆ, ಹೆಚ್ಚಿನ ಸಾಕ್ಷ್ಯಾಧಾರಗಳು ಲಭ್ಯವಾಗುವವರೆಗೂ ಇದನ್ನು ಉಗ್ರಕೃತ್ಯವೆಂದು ಈಗಲೇ ಅಂತಿಮ ತೀರ್ಮಾನಕ್ಕೆ ಬರುವುದು ಅವಸರವಾಗುತ್ತದೆ, ಎಲ್ಲಾ ಆಯಾಮಗಳಿಂದಲೂ ತನಿಖೆ ನಡೆಸಲಾಗುತ್ತಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ಇತ್ತೀಚೆಗಷ್ಟೇ, ಕಿಶ್ತ್ವಾರ್ ಜಿಲ್ಲಾಧಿಕಾರಿ ಪಂಕಜ್ ಕುಮಾರ್ ಶರ್ಮಾ ಮಾರ್ವಾ, ವಾರ್ವಾನ್ ಮತ್ತು ದಾಚಾನ್ ಭಾಗದ ಜನರೊಂದಿಗೆ ಸಭೆ ನಡೆಸಿ, ಉಗ್ರರ ಚಲನವಲನಗಳ ಬಗ್ಗೆ ಮಾಹಿತಿ ನೀಡುವಂತೆ ಮನವಿ ಮಾಡಿದ್ದರು. ಈ ಭಾಗದಲ್ಲಿ ಪ್ರವಾಸೋದ್ಯಮ ಬೆಳೆಯಲು ಅಪಾರ ಅವಕಾಶವಿದೆ. ಆದರೆ, ಉಗ್ರರ ಉಪಸ್ಥಿತಿಯಿಂದಾಗಿ ಪ್ರವಾಸಿಗರು ಇಲ್ಲಿ ಬರಲು ಹಿಂದೇಟು ಹಾಕುತ್ತಿದ್ದಾರೆಂದು ಆತಂಕ ವ್ಯಕ್ತಪಡಿಸಿದ್ದರು, (ಏಜೆನ್ಸೀಸ್).