ಚೆನ್ನೈ: ತಮಿಳುನಾಡಿನ ಊಟಿ ಜಿಲ್ಲೆಯ ಸರ್ಕಾರಿ ಕಲಾ ಕಾಲೇಜಿನಲ್ಲಿ ಇತ್ತೀಚೆಗೆ ನಡೆದ ರಕ್ತದಾನ ಶಿಬಿರವೊಂದು ( Blood Donation ) ಇಡೀ ರಾಜ್ಯದಲ್ಲಿ ಮಾತ್ರವಲ್ಲದೆ ದೇಶಾದ್ಯಂತ ಭಾರೀ ಚರ್ಚೆಗೆ ಗ್ರಾಸವಾಗಿದೆ. ಮಾನವೀಯತೆಯ ಮಹತ್ವ ಸಾರುವ ರಕ್ತದಾನದಂತಹ ಪವಿತ್ರ ಕಾರ್ಯದಲ್ಲೂ ಜಾತಿಯನ್ನು ಎಳೆದು ತಂದಿರುವ ಘಟನೆ ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.
ಸಾಮಾನ್ಯವಾಗಿ ರಕ್ತದಾನ ಮಾಡುವಾಗ ದಾನಿಯ ಹೆಸರು, ಮೊಬೈಲ್ ಸಂಖ್ಯೆ ಮತ್ತು ರಕ್ತದ ಗುಂಪನ್ನು ಮಾತ್ರ ನಮೂದಿಸುವುದು ವಾಡಿಕೆ. ಆದರೆ, ಈ ಶಿಬಿರದಲ್ಲಿ ಬಳಸಲಾದ ನಮೂನೆ (ಫಾರ್ಮ್) ಯಲ್ಲಿ ಎಸ್‌ಸಿ, ಎಸ್‌ಟಿ, ಒಬಿಸಿ ಮತ್ತು ಜನರಲ್ ಎಂದೆಲ್ಲಾ ಜಾತಿಯ ಕಾಲಮ್‌ಗಳನ್ನು ಮುದ್ರಿಸಲಾಗಿತ್ತು. ರಕ್ತದಾನ ಮಾಡಲು ಬಂದ ವಿದ್ಯಾರ್ಥಿಗಳು ಫಾರ್ಮ್ ನೋಡಿ ಒಂದು ಕ್ಷಣ ಬೆರಗಾದರು.
ಅಂದಹಾಗೆ, ಈ ವಿವಾದದ ಹಿಂದೆ 'Mera Yuva Bharat' (ಮೇರಾ ಯುವ ಭಾರತ್) ಸಂಘಟನೆಯ ನೀಲಗಿರಿ ಜಿಲ್ಲಾ ಸಂಘಟಕ ಎಸ್. ರಂಜಿತ್ ಕುಮಾರ್ ಅವರ ಮೇಲ್ವಿಚಾರಣೆ ಇತ್ತು ಎಂದು ಕಾಲೇಜು ಆಡಳಿತ ಮಂಡಳಿ ಸ್ಪಷ್ಟಪಡಿಸಿದೆ. ಶಿಬಿರಕ್ಕೆ ಬಂದಿದ್ದ ವಿದ್ಯಾರ್ಥಿಗಳು ಈ ಅಮಾನವೀಯ ಕ್ರಮವನ್ನು ತೀವ್ರವಾಗಿ ವಿರೋಧಿಸಿದ್ದು, ಫಾರ್ಮ್‌ನ ಫೋಟೋಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದಾರೆ. ಕೆಲವೇ ಗಂಟೆಗಳಲ್ಲಿ ಈ ಫೋಟೋಗಳು ವೈರಲ್ ಆಗಿ, "ರಕ್ತದಲ್ಲೂ ಜಾತಿ ಹುಡುಕುವಷ್ಟು ಕುರುಡರಾಗಿದ್ದೀರಾ?" ಎಂಬ ಟೀಕೆಗಳು ಮತ್ತು ಚರ್ಚೆಗಳು ಮುನ್ನೆಲೆಗೆ ಬಂದು, ಸಾಮಾಜಿಕ ಜಾಲತಾಣಗಳಲ್ಲಿ ದೊಡ್ಡ ಮಟ್ಟದ ಆಂದೋಲನವೇ ಸೃಷ್ಟಿಯಾಯಿತು.
ಸಮಾಜದಲ್ಲಿ ಶಾಂತಿ-ಸೌಹಾರ್ದತೆಯನ್ನು ಕದಡುವ ಮತ್ತು ಜಾತಿಯ ವಿಷಬೀಜ ಬಿತ್ತುವ ಇಂತಹ ಕೃತ್ಯವನ್ನು ಕಾಲೇಜು ಆಡಳಿತ ಮಂಡಳಿ ಗಂಭೀರವಾಗಿ ಪರಿಗಣಿಸಿದೆ. ಕಾಲೇಜಿನ ಪ್ರಾಂಶುಪಾಲರಾದ ಜೆ. ಎಬೆನೆಜರ್ ಅವರು ಈ ಗಂಭೀರ ಬೆಳವಣಿಗೆಯ ವಿರುದ್ಧ ತಕ್ಷಣವೇ ಪ್ರತಿಕ್ರಿಯೆ ನೀಡಿ, ನೀಲಗಿರಿ ಜಿಲ್ಲಾ ಪೊಲೀಸ್ ಠಾಣೆಗೆ ಅಧಿಕೃತವಾಗಿ ದೂರು ದಾಖಲಿಸಿದ್ದಾರೆ. ಈ ಘಟನೆಯು ಕಾಲೇಜಿನ ಹೆಸರಿಗೆ ಮತ್ತು ಪ್ರತಿಷ್ಠೆಗೆ ಮಸಿ ಬಳಿದಿದ್ದು, ಇದಕ್ಕೆ ಕಾರಣರಾದ ರಂಜಿತ್ ಕುಮಾರ್ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಪ್ರಾಂಶುಪಾಲರು ತಮ್ಮ ದೂರಿನಲ್ಲಿ ಬಲವಾಗಿ ಆಗ್ರಹಿಸಿದ್ದಾರೆ.
ದೂರಿನ ಆಧಾರದ ಮೇಲೆ ಎಚ್ಚೆತ್ತಿರುವ ಪೊಲೀಸರು ಕೂಡಲೇ ಪ್ರಕರಣ ದಾಖಲಿಸಿಕೊಂಡು, ಈ ಬಗ್ಗೆ ತನಿಖೆಯನ್ನು ಚುರುಕುಗೊಳಿಸಿದ್ದಾರೆ. ರಕ್ತದಾನ ಎಂಬುದು ಜೀವ ಉಳಿಸುವ ಮಹಾನ್ ಕಾರ್ಯ. ಜಾತಿ, ಧರ್ಮ, ಭಾಷೆಗಳ ಗಡಿಗಳನ್ನು ಮೀರಿ ಎಲ್ಲ ಮನುಷ್ಯರ ನರಗಳಲ್ಲಿ ಹರಿಯುವುದು ಒಂದೇ ಬಗೆಯ ರಕ್ತ. ಹೀಗಿರುವಾಗ, ಯುವಜನತೆ ಪಾಠ ಕಲಿಯಬೇಕಾದ ಶೈಕ್ಷಣಿಕ ಸಂಸ್ಥೆಗಳಲ್ಲಿ ಇಂತಹ ಜಾತಿವಾದಿ ಧೋರಣೆಗಳು ತಲೆ ಎತ್ತುವುದು ಅತ್ಯಂತ ಆತಂಕಕಾರಿ ಬೆಳವಣಿಗೆಯಾಗಿದೆ. ಈ ತನಿಖೆಯು ತಪ್ಪಿತಸ್ಥರಿಗೆ ತಕ್ಕ ಶಿಕ್ಷೆ ನೀಡುವುದರ ಮೂಲಕ ಭವಿಷ್ಯದಲ್ಲಿ ಇಂತಹ ಅತಿರೇಕಗಳಿಗೆ ಸಂಪೂರ್ಣ ತಡೆ ಹಾಕಲಿದೆ ಎಂದು ಸಾರ್ವಜನಿಕರು ನಿರೀಕ್ಷಿಸುತ್ತಿದ್ದಾರೆ.
ಇನ್ನೂ ಈ ಘಟನೆಯು ಕೇವಲ ಒಂದು ಕಾಲೇಜಿನ ವಿವಾದವಾಗಿ ಉಳಿಯದೆ, ಇಂದಿನ ಸಮಾಜದಲ್ಲಿ ಜಾತಿ ಮತ್ತು ವರ್ಗದ ಪಿಡುಗಿನ ಬೇರುಗಳು ಎಷ್ಟು ಆಳವಾಗಿ ಇಳಿದಿವೆ ಎಂಬುದಕ್ಕೆ ಕನ್ನಡಿ ಹಿಡಿದಿದೆ. ರಕ್ತದ ಹನಿಗಳಲ್ಲಿ ಜಾತಿ ಕಾಣುವ ಕಣ್ಣುಗಳು ಆರೋಗ್ಯಕರ ಸಮಾಜದ ನಿರ್ಮಾಣಕ್ಕೆ ಮಾರಕ. ವಿದ್ಯಾರ್ಥಿಗಳು ಮತ್ತು ಯುವ ಸಮುದಾಯ ಈ ಜಾತಿ ರಾಜಕಾರಣದ ವಿರುದ್ಧ ಧ್ವನಿ ಎತ್ತಿರುವುದು ಒಂದು ಆಶಾದಾಯಕ ಬೆಳವಣಿಗೆಯಾಗಿದೆ. ಮುಂಬರುವ ದಿನಗಳಲ್ಲಿ ಇಂತಹ ಘಟನೆಗಳು ಮರುಕಳಿಸದಂತೆ ಕಠಿಣ ನಿಲುವುಗಳನ್ನು ತಾಳುವ ಮೂಲಕ ಮಾನವೀಯತೆಯೇ ದೊಡ್ಡದು ಎಂಬ ಸಂದೇಶವನ್ನು ಇಡೀ ದೇಶಕ್ಕೆ ಸಾರಬೇಕಿದೆ, (ಏಜೆನ್ಸೀಸ್).