ನವದೆಹಲಿ: ದೇಶಕ್ಕೆ ಮರಳಿದ್ರೆ, ಅವರನ್ನು ಗಲ್ಲಿಗೇರಿಸಲಾಗುವುದು ಎಂಬ ಬಾಂಗ್ಲಾದೇಶದ ಪ್ರಾಸಿಕ್ಯೂಟರ್ ಹೇಳಿಕೆಗೆ ಸಂಬಂಬಂಧಿಸಿದಂತೆ ಪ್ರತಿಕ್ರಿಯಿಸಿರುವ ಮಾಜಿ ಪ್ರಧಾನಿ ಶೇಖ್ ಹಸೀನಾ, ಗುರುವಾರ(ನ. 12) ಬಂಧನ, ಜೈಲು ಶಿಕ್ಷೆ ಅಥವಾ ಸಾವಿನ ಬೆದರಿಕೆ ನಾನು ದೇಶಕ್ಕೆ ಮರಳವುದನ್ನು ತಡೆಯಲು ಸಾಧ್ಯವಿಲ್ಲ. ನನ್ನ ಜನರಿಂದ ದೂರವಿರುವುದಕ್ಕಿಂತ ತಾಯ್ನಾಡಿನಲ್ಲಿ ಸಾಯುವುದೇ ಲೇಸು ಎಂದು ಹೇಳಿದ್ದಾರೆ.
ಸುದ್ದಿ ಸಂಸ್ಥೆ IANSಗೆ ನೀಡಿದ ಆಡಿಯೋ ಸಂದರ್ಶನದಲ್ಲಿ ಮಾತನಾಡಿರುವ ಅವರು, ನೋಡಿ, ನನಗೆ ಅಪಾಯಗಳು ಚೆನ್ನಾಗಿ ಅರ್ಥವಾಗಿವೆ. ನಾನು ಆ ದೇಶಕ್ಕೆ ಕಾಲಿಟ್ಟ ಕ್ಷಣದಲ್ಲೇ ನನ್ನನ್ನು ಬಂಧಿಸಬಹುದು, ಜೈಲಿಗೆ ಕಳುಹಿಸಬಹುದು. ಕೊಲ್ಲಲು ಸಹ ಪ್ರಯತ್ನಿಸಬಹುದು. ಈ ಎಲ್ಲಾ ಸಾಧ್ಯತೆಗಳನ್ನು ನನಗೆ ತಿಳಿದಿದೆ ಎಂದಿದ್ದಾರೆ.
ಆದರೆ, ನಿಮಗೆ ಗೊತ್ತಾ, ನಾನು ಬಹಳ ಹಿಂದೆಯೇ ನನ್ನ ವೈಯಕ್ತಿಕ ಸುರಕ್ಷತೆಯ ಬಗ್ಗೆ ಚಿಂತಿಸುವುದನ್ನು ನಿಲ್ಲಿಸಿದ್ದೇನೆ. ಮಿಲಿಟರಿ ಆಡಳಿತದ ಹೊರತಾಗಿಯೂ ನಾನು 1981ರಲ್ಲಿ ಬಾಂಗ್ಲಾದೇಶಕ್ಕೆ ಮರಳಿದೆ. ಮಿಲಿಟರಿ ಬೆಂಬಲಿತ ಸರ್ಕಾರವು ನನ್ನನ್ನು ಬಂಧಿಸಬಹುದು ಎಂದು ತಿಳಿದಿದ್ದರೂ ನಾನು 2007ರಲ್ಲಿ ಮತ್ತೆ ಮರಳಿದೆ. ನಾನು ಜೈಲು ಶಿಕ್ಷೆ ಮತ್ತು ನನ್ನ ಮೇಲೆ ಪದೇ ಪದೇ ಪ್ರಯತ್ನಗಳನ್ನು ಎದುರಿಸಿದ್ದೇನೆ. ನಾನು ಸರಿ ಎಂದು ನಂಬುವುದನ್ನು ಮಾಡುವುದರಿಂದ ಭಯವು ನನ್ನನ್ನು ಎಂದಿಗೂ ತಡೆಯಲಿಲ್ಲ ಎಂದು ಹೇಳಿದ್ದಾರೆ.
ಇದೇ ವೇಳೆ ಬಾಂಗ್ಲಾದೇಶದ ಪರಿಸ್ಥಿತಿಯ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ಅವರು, ದೇಶವು ಕಠಿಣ ಹಂತದ ಮೂಲಕ ಸಾಗುತ್ತಿದೆ. ಸಾಮಾನ್ಯ ಜನರು ತಮ್ಮ ಮನೆ ಮತ್ತು ಜೀವನೋಪಾಯವನ್ನು ಕಳೆದುಕೊಳ್ಳುತ್ತಿರುವಾಗ ಅವಾಮಿ ಲೀಗ್ ನಾಯಕರು ಮತ್ತು ಕಾರ್ಮಿಕರಿಗೆ ಕಿರುಕುಳ ನೀಡಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ.
ಸಾಮಾನ್ಯ ಜನರು ಬಳಲುತ್ತಿದ್ದಾರೆ ಮತ್ತು ಕುಟುಂಬಗಳು ತಮ್ಮ ಮನೆಗಳು ಮತ್ತು ಜೀವನೋಪಾಯವನ್ನು ಕಳೆದುಕೊಳ್ಳುತ್ತಿವೆ. ನನ್ನ ಜನರು ಇಂತಹ ಕಷ್ಟಗಳನ್ನು ಎದುರಿಸುತ್ತಿರುವಾಗ ನಾನು ಹೇಗೆ ದೂರ ಉಳಿಯಲು ಸಾಧ್ಯ? ನಾನು ಸಂಪೂರ್ಣ ರಾಜಕೀಯ ಜೀವನವನ್ನು ನನ್ನ ಬಾಂಗ್ಲಾದೇಶದ ಜನರೊಂದಿಗೆ ಕಳೆದಿದ್ದೇನೆ. ನನಗೆ ಏನೇ ಆದರೂ, ನಾನು ಅವರ ಪಕ್ಕದಲ್ಲಿ ನಿಲ್ಲಲು ಬಯಸುತ್ತೇನೆ. ನಾನು ಸಾಯಬೇಕಾದರೆ, ನನ್ನ ಸ್ವಂತ ದೇಶದ ಮಣ್ಣಿನಲ್ಲಿ, ನನ್ನ ಸ್ವಂತ ಜನರ ನಡುವೆ ಸಾಯುವುದೇ ಲೇಸು ಎಂದು ತಿಳಿಸಿದ್ದಾರೆ.
ಇದೇ ವೇಳೆ 2024ರಲ್ಲಿ ಜನರನ್ನು ಕೊಲ್ಲಲು ನಾನು ಆದೇಶಿಸಿಲ್ಲ ಎಂದಿರುವ ಅವರು, ಒಂದು ವಿಷಯವನ್ನು ನಾನು ಸ್ಪಷ್ಟವಾಗಿ ಹೇಳುತ್ತೇನೆ. ನಾನು ಎಂದಿಗೂ ಮುಗ್ಧ ಜನರನ್ನು ಕೊಲ್ಲಲು ಆದೇಶಿಸಲಿಲ್ಲ. ಆ ಆರೋಪವನ್ನು ನಾನು ಸಂಪೂರ್ಣವಾಗಿ ತಿರಸ್ಕರಿಸುತ್ತೇನೆ. ಪ್ರತಿಯೊಂದು ಸಾವು ದುರಂತವಾಗಿತ್ತು. ಪ್ರಧಾನ ಮಂತ್ರಿಯಾಗಿ, ನಮ್ಮ ನಾಗರಿಕರ ಜೀವಗಳನ್ನು ರಕ್ಷಿಸುವ ಜವಾಬ್ದಾರಿ ನನ್ನ ಮೇಲಿತ್ತು ಮತ್ತು ನಿಖರವಾಗಿ ಏನಾಯಿತು ಎಂದು ತಿಳಿಯಲು ನಾನು ಬಯಸಿದ್ದೆ.
ಅದಕ್ಕಾಗಿಯೇ, 2024 ಜುಲೈ 18ರಂದು, ಹೈಕೋರ್ಟ್ ನ್ಯಾಯಾಧೀಶರ ನೇತೃತ್ವದಲ್ಲಿ ನ್ಯಾಯಾಂಗ ವಿಚಾರಣಾ ಆಯೋಗವನ್ನು ಸ್ಥಾಪಿಸಿದೆ. ಆಗಸ್ಟ್ 1ರಂದು, ಪ್ರತಿಯೊಂದು ಘಟನೆಯನ್ನು ಸರಿಯಾಗಿ ಪರಿಶೀಲಿಸಲು ಮೂರು ಸದಸ್ಯರ ಆಯೋಗಕ್ಕೆ ವಿಸ್ತರಿಸಿದೆ. ಆದರೆ ಮುಹಮ್ಮದ್ ಯೂನಸ್ ಅಧಿಕಾರ ವಹಿಸಿಕೊಂಡ ನಂತರ ಏನಾಯಿತು? ಅವರು ಆ ತನಿಖೆಯನ್ನು ನಿಲ್ಲಿಸಿದರು ಎಂದು ಹೇಳಿದ್ದಾರೆ.
ಇತ್ತೀಚೆಗೆ ಶೇಖ್ ಹಸೀನಾ ದೇಶಕ್ಕೆ ಮರಳುವ ವಿಚಾರಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯಿಸಿರುವ ಬಾಂಗ್ಲಾದೇಶದ ಪ್ರಾಸಿಕ್ಯೂಟರ್ ಮುಹಮ್ಮದ್ ಅಮೀನುಲ್ ಇಸ್ಲಾಂ, ಶೇಖ್ ಹಸೀನಾಗೆ ತಮ್ಮ ಮರಣದಂಡನೆ ತೀರ್ಪಿನ ವಿರುದ್ಧ ಮೇಲ್ಮನವಿ ಸಲ್ಲಿಸುವ ಗಡುವು ಮುಗಿದಿದೆ. ಈಗ ಯಾವುದೇ ಮೇಲ್ಮನವಿ ಸಲ್ಲಿಸಲಾಗುವುದಿಲ್ಲ. ಮರಣದಂಡನೆಯನ್ನು ಎದುರಿಸುವುದನ್ನು ಬಿಟ್ಟು ಅವರಿಗೆ ಬೇರೆ ದಾರಿಯಿಲ್ಲ ಎಂದಿದ್ದರು (ಏಜೆನ್ಸೀಸ್).