ಬಂಗಾಳ ರಣಕಣ: ಇನ್ನು ಭವಿಷ್ಯವಾಣಿಯ ಅಗತ್ಯವಿಲ್ಲ, ಗೆಲುವು ನಮ್ಮದೇ! ಅಂತಿಮ ಹಂತದ ಮತದಾನಕ್ಕೂ ಮುನ್ನ ದೀದಿ ಅಬ್ಬರ | Mamata Banerjee

ಈ ಬಗ್ಗೆ ಸೋಮವಾರ ಪ್ರಚಾರದ ಕೊನೆಯ ದಿನದಂದು X ನಲ್ಲಿ ಸುದೀರ್ಘ ಪೋಸ್ಟ್ ಹಂಚಿಕೊಂಡಿರುವ ಮಮತಾ ಬ್ಯಾನರ್ಜಿ, ಬಿಜೆಪಿ ವಿರುದ್ಧ ನೇರ ವಾಗ್ದಾಳಿ ನಡೆಸಿದ್ದಾರೆ.

ಸಂಸ್ಕೃತಿಯ ರಕ್ಷಣೆ: ಬಂಗಾಳವು ಸಾಮರಸ್ಯ ಮತ್ತು ನಾಗರಿಕತೆಯ ಹೆಮ್ಮೆಯ ಸಂಕೇತವಾಗಿದೆ. ಇಲ್ಲಿ ಒಡೆದು ಆಳುವ ನೀತಿ ಅನುಸರಿಸುವ ಬಿಜೆಪಿಗೆ ಸ್ಥಾನವಿಲ್ಲ ಎಂದು ದೀದಿ ಕಿಡಿಕಾರಿದ್ದಾರೆ.

ಅಭಿವೃದ್ಧಿಯೇ ರಕ್ಷಾಕವಚ: ನಮ್ಮ ಜನಕೇಂದ್ರಿತ ಕಲ್ಯಾಣ ಯೋಜನೆಗಳು ಬಂಗಾಳದ ನಾಗರಿಕರ ಪಾಲಿನ ರಕ್ಷಾಕವಚವಾಗಿವೆ. ಇವುಗಳನ್ನು ಕಸಿದುಕೊಳ್ಳುವ ಅಧಿಕಾರ ಈ ಭೂಮಿಯ ಮೇಲಿರುವ ಯಾವ ಶಕ್ತಿಗೂ ಇಲ್ಲ ಎಂದು ಬಂಗಾಳ ಸಿಎಂ ಹೇಳಿದ್ದಾರೆ.

ಭಾನುವಾರ ಕೋಲ್ಕತ್ತಾದಲ್ಲಿ ನಡೆದ ಬೃಹತ್ ಪಾದಯಾತ್ರೆಯಲ್ಲಿ ಜನರ ಅಸಾಧಾರಣ ಉತ್ಸಾಹ ಮತ್ತು ಪ್ರಾಮಾಣಿಕ ಪ್ರೀತಿ ಕಂಡು ಮಮತಾ ಅವರು ಗದ್ಗದಿತರಾಗಿದ್ದಾರೆ. ಭವಾನಿಪುರ ಕ್ಷೇತ್ರದಿಂದ ಸ್ಪರ್ಧಿಸುತ್ತಿರುವ ಅವರು, ಬಂಗಾಳದ ಜನರು ಶಾಂತಿ ಮತ್ತು ಪ್ರಗತಿಯ ಪರವಾಗಿ ನಿಲ್ಲುತ್ತಾರೆ ಎಂಬ ಸಂಪೂರ್ಣ ನಂಬಿಕೆ ನನಗಿದೆ ಎಂದು ಹೇಳಿದ್ದಾರೆ.

ಪಶ್ಚಿಮ ಬಂಗಾಳದ ಒಟ್ಟು 294 ಸೀಟುಗಳ ಪೈಕಿ ಮೊದಲ ಹಂತದಲ್ಲಿ (ಏಪ್ರಿಲ್ 23) ದಾಖಲೆಯ ಶೇ.93.19 ಮತದಾನ ನಡೆದಿದೆ. ಈಗ ಏಪ್ರಿಲ್ 29 ರಂದು ಉಳಿದ 142 ಕ್ಷೇತ್ರಗಳಿಗೆ ಮತದಾನ ನಡೆಯಲಿದ್ದು, ಇದು ತೃಣಮೂಲ ಕಾಂಗ್ರೆಸ್ (TMC) ಮತ್ತು ಬಿಜೆಪಿ ನಡುವಿನ ನೇರ ಹಣಾಹಣಿಗೆ ಸಾಕ್ಷಿಯಾಗಲಿದೆ.

ದೀದಿ ಕರೆ: ನಮ್ಮ ಭಾಷೆ, ನಮ್ಮ ಸಂಸ್ಕೃತಿ ಮತ್ತು ಈ ಮಣ್ಣಿನ ಹೆಮ್ಮೆಯ ಪರಂಪರೆಯನ್ನು ರಕ್ಷಿಸಲು, ಜಾತಿ-ಧರ್ಮದ ಭೇದವಿಲ್ಲದೆ ಎಲ್ಲರೂ ಏಪ್ರಿಲ್ 29 ರಂದು 'ಜೋರಾಫೂಲ್' (TMC ಚಿಹ್ನೆ) ಗುಂಡಿಯನ್ನು ಒತ್ತುವ ಮೂಲಕ ಮಾ-ಮಾಟಿ-ಮಾನುಷ್ ಅಭ್ಯರ್ಥಿಗಳನ್ನು ಗೆಲ್ಲಿಸಬೇಕು ಎಂದು ಹೇಳಿದ್ದಾರೆ.

ಮೇ 4 ರಂದು ಫಲಿತಾಂಶ ಪ್ರಕಟವಾಗಲಿದ್ದು, ಈಗಾಗಲೇ ಬಿಜೆಪಿ ನಾಯಕರು ತಾವೇ ಗೆಲ್ಲುವುದಾಗಿ ಹೇಳಿಕೊಳ್ಳುತ್ತಿದ್ದಾರೆ. ಮೊದಲ ಹಂತದ 152 ಸೀಟುಗಳಲ್ಲಿ 110ಕ್ಕೂ ಹೆಚ್ಚು ಸೀಟುಗಳನ್ನು ಗೆಲ್ಲುತ್ತೇವೆ ಎಂಬ ಬಿಜೆಪಿಯ ವಾದವನ್ನು ಟಿಎಂಸಿ 'ಪೊಳ್ಳು' ಎಂದು ಕರೆದಿದೆ. ಸತತ ನಾಲ್ಕನೇ ಬಾರಿಗೆ ಅಧಿಕಾರದ ಚುಕ್ಕಾಣಿ ಹಿಡಿಯುವ ವಿಶ್ವಾಸದಲ್ಲಿ ಮಮತಾ ಬ್ಯಾನರ್ಜಿ ಅವರ ಪಡೆ ಇದೆ,(ಏಜೆನ್ಸೀಸ್​).