Indian Aviation Heroes: ಬುಧವಾರ (ಸೆಪ್ಟೆಂಬರ್ 30) ದುಬೈನಿಂದ ಟೆಲ್ ಅವಿವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ಫ್ಲೈಟ್ ಎಫ್‌ಝಡ್1073 (FZ1073) ವಿಮಾನದಲ್ಲಿ ಸಹ-ಪೈಲಟ್ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಅವರ ಮೇಲೆ ಚಾಕುವಿನಿಂದ ದಾಳಿ ನಡೆಸಿದಾಗ ದೊಡ್ಡ ಅನಾಹುತವೇ ತಪ್ಪಿತು. ಈ ವೇಳೆ ವಿಮಾನವು ಕೇವಲ 29 ಸೆಕೆಂಡುಗಳಲ್ಲಿ 30,875 ಅಡಿಯಿಂದ 16,750 ಅಡಿಗೆ ಕುಸಿದಿತ್ತು. ಮೈಯೆಲ್ಲಾ ರಕ್ತಸಿಕ್ತವಾಗಿದ್ದರೂ ಧೃತಿಗೆಡದ ಮಚ್ಚರ್ ಶಾಂತಚಿತ್ತರಾಗಿ ಕಾಕ್‌ಪಿಟ್ ಬಾಗಿಲನ್ನು ತೆರೆಯುವ ಮೂಲಕ 174 ಜನರ ಪ್ರಾಣ ಉಳಿಸಿದರು. ಈ ಸಾಹಸವನ್ನು ಪ್ರಧಾನಿ ನರೇಂದ್ರ ಮೋದಿ ಅವರು ಮುಕ್ತಕಂಠದಿಂದ ಶ್ಲಾಘಿಸಿ ಹೀರೋ ಎಂದು ಕರೆದಿದ್ದಾರೆ.
ವಾಣಿಜ್ಯ ವಿಮಾನವೊಂದರಲ್ಲಿ ಭಾರತೀಯರೊಬ್ಬರು ಇಂತಹ ಧೈರ್ಯ ತೋರಿರುವುದು ಇದೇ ಮೊದಲೇನಲ್ಲ. ಭಾರತೀಯ ವಿಮಾನಯಾನ ಇತಿಹಾಸದಲ್ಲಿ ಜೀವದ ಹಂಗು ತೊರೆದು ಪ್ರಯಾಣಿಕರ ಪ್ರಾಣ ಉಳಿಸಿದ ಇಂತಹ ಹಲವು ರೋಚಕ ನಿದರ್ಶನಗಳಿವೆ.
ಅಂತಹ ಸಾಹಸಗಾಥೆಗಳಲ್ಲಿ ನೀರಜಾ ಭಾನೋಟ್ ಅವರ ಪಾತ್ರ ಅತ್ಯಂತ ಪ್ರಮುಖವಾದುದು. 1986ರ ಸೆಪ್ಟೆಂಬರ್ 5 ರಂದು ಮುಂಬೈನಿಂದ ನ್ಯೂಯಾರ್ಕ್‌ಗೆ ಹೊರಟಿದ್ದ ಪ್ಯಾನ್ ಆಮ್ ಫ್ಲೈಟ್ 73 ವಿಮಾನವನ್ನು ಕರಾಚಿಯಲ್ಲಿ ನಾಲ್ವರು ಸಶಸ್ತ್ರ ಭಯೋತ್ಪಾದಕರು ಅಪಹರಿಸಿದ್ದರು. 22 ವರ್ಷದ ಹಿರಿಯ ಫ್ಲೈಟ್ ಪರ್ಸರ್ ಆಗಿದ್ದ ನೀರಜಾ ಅಪಾಯವನ್ನು ಮೊದಲೇ ಗ್ರಹಿಸಿ ಹೈಜಾಕ್ ಎಂದು ಕೂಗುವ ಮೂಲಕ ಕಾಕ್‌ಪಿಟ್ ಸಿಬ್ಬಂದಿಯನ್ನು ಎಚ್ಚರಿಸಿದರು. ಇದರಿಂದ ಪೈಲಟ್‌ಗಳು ಕಾಕ್‌ಪಿಟ್ ಹ್ಯಾಚ್ ಮೂಲಕ ಸುರಕ್ಷಿತವಾಗಿ ತಪ್ಪಿಸಿಕೊಳ್ಳಲು ಸಾಧ್ಯವಾಯಿತು ಮತ್ತು ಉಗ್ರರು ವಿಮಾನದ ನಿಯಂತ್ರಣ ತೆಗೆದುಕೊಳ್ಳುವುದನ್ನು ತಡೆಯಲಾಯಿತು.
ಸುಮಾರು 17 ಗಂಟೆಗಳ ಕಾಲ ಮುಂದುವರಿದ ಈ ಒತ್ತೆಯಾಳು ಬಿಕ್ಕಟ್ಟಿನಲ್ಲಿ ನೀರಜಾ ಪರಿಸ್ಥಿತಿಯಿಂದ ಅತ್ಯಂತ ಧೈರ್ಯದಿಂದ ನಿರ್ವಹಿಸಿದರು. ಅಪಹರಣಕಾರರು ಪ್ರಯಾಣಿಕರ ಪಾಸ್‌ಪೋರ್ಟ್‌ಗಳನ್ನು ಕೇಳಿದಾಗ, 41 ಅಮೆರಿಕನ್ ಪ್ರಯಾಣಿಕರನ್ನು ರಕ್ಷಿಸಲು ಅವರ ಪಾಸ್‌ಪೋರ್ಟ್‌ಗಳನ್ನು ಮರೆಮಾಡಿ ಜಾಣ್ಮೆ ಮೆರೆದರು. ಅಂತಿಮವಾಗಿ ಉಗ್ರರು ಗುಂಡು ಹಾರಿಸಿದಾಗ, ನೀರಜಾ ತುರ್ತು ನಿರ್ಗಮನ ದ್ವಾರವನ್ನು ತೆರೆದು ಪ್ರಯಾಣಿಕರನ್ನು ಹೊರನಡೆಸಿದರು. ತಾವೇ ಮೊದಲು ತಪ್ಪಿಸಿಕೊಳ್ಳುವ ಅವಕಾಶವಿದ್ದರೂ, ಒಳಗೆ ಸಿಲುಕಿದ್ದ ಮಕ್ಕಳನ್ನು ರಕ್ಷಿಸಲು ಹೋದಾಗ ಅವರು ಉಗ್ರರ ಗುಂಡೇಟಿಗೆ ಬಲಿಯಾದರು. ತಮ್ಮ 23 ನೇ ಹುಟ್ಟುಹಬ್ಬಕ್ಕೆ ಕೇವಲ ಎರಡು ದಿನಗಳ ಮೊದಲು ಮಕ್ಕಳನ್ನು ರಕ್ಷಿಸುತ್ತಾ ಅವರು ಅಮರರಾದರು. ಈ ಸಾಹಸಕ್ಕಾಗಿ ಅವರಿಗೆ ಮರಣೋತ್ತರವಾಗಿ ಅಶೋಕ ಚಕ್ರ ಗೌರವ ಲಭಿಸಿತು.
ಇದೇ ರೀತಿಯ ಮತ್ತೊಂದು ಘಟನೆ 1999ರ ಡಿಸೆಂಬರ್ 24 ರಂದು ನಡೆಯಿತು. ಕಠ್ಮಂಡುವಿನಿಂದ ದೆಹಲಿಗೆ ಹೊರಟಿದ್ದ ಇಂಡಿಯನ್ ಏರ್‌ಲೈನ್ಸ್ ವಿಮಾನ ಐಸಿ 814 ಅನ್ನು ಐವರು ಮುಖವಾಡ ಧರಿಸಿದ ಭಯೋತ್ಪಾದಕರು ಅಪಹರಿಸಿದರು. ವಿಮಾನದಲ್ಲಿದ್ದ ಕ್ಯಾಪ್ಟನ್ ದೇವಿ ಶರಣ್ ಅವರ ಕುತ್ತಿಗೆಗೆ ಉಗ್ರರು ಬಂದೂಕನ್ನು ಇರಿಸಿದ್ದರೂ ಅವರು ವಿಚಲಿತರಾಗದೆ ಪರಿಸ್ಥಿತಿಯನ್ನು ಎದುರಿಸಿದರು. ವಿಮಾನವು ಅಮೃತಸರ, ಲಾಹೋರ್, ದುಬೈ ಮತ್ತು ಅಂತಿಮವಾಗಿ ಕಂದಹಾರ್ ತಲುಪಿ ಎಂಟು ದಿನಗಳ ಕಾಲ ಅಲ್ಲಿಯೇ ನೆಲದಲ್ಲೇ ನಿಂತಿತ್ತು. ಎಲ್ಲಾ ಅಡೆತಡೆಗಳ ನಡುವೆಯೂ ಕ್ಯಾಪ್ಟನ್ ಶರಣ್ ಪ್ರಯಾಣಿಕರ ಸುರಕ್ಷತೆಗೆ ಶ್ರಮಿಸಿದರು. 40 ವರ್ಷಗಳ ಸುದೀರ್ಘ ಸೇವೆಯ ಬಳಿಕ ಕಳೆದ ವರ್ಷ ಜನವರಿಯಲ್ಲಿ ನಿವೃತ್ತರಾದ ಕ್ಯಾಪ್ಟನ್ ದೇವಿ ಶರಣ್ ಅವರ ಸೇವೆಯನ್ನು ಏರ್ ಇಂಡಿಯಾ ಅತ್ಯಂತ ಗೌರವದಿಂದ ಸ್ಮರಿಸಿದೆ.
ಇದಲ್ಲದೆ, 1984ರ ಆಗಸ್ಟ್ 24 ರಂದು ದೆಹಲಿಯಿಂದ ಶ್ರೀನಗರಕ್ಕೆ ತೆರಳುತ್ತಿದ್ದ ಇಂಡಿಯನ್ ಏರ್‌ಲೈನ್ಸ್ ವಿಮಾನ 421 ಅನ್ನು ಖಾಲಿಸ್ತಾನಿ ಭಯೋತ್ಪಾದಕರು ಅಪಹರಿಸಿದ್ದರು. ಪೈಲಟ್ ವಿ.ಕೆ. ಮೆಹ್ತಾ ಅವರು ವಿಮಾನದಲ್ಲಿ ಇಂಧನ ಖಾಲಿಯಾಗುತ್ತಿದೆ ಎಂದು ಜಾಣ್ಮೆಯಿಂದ ಕಂಟ್ರೋಲ್ ಟವರ್‌ಗೆ ತಿಳಿಸಿ ದುಬೈನಲ್ಲಿ ಇಳಿಯುವಂತೆ ಮಾಡಿದರು. ದುಬೈನ ರಕ್ಷಣಾ ಸಚಿವ ಶೇಖ್ ಮೊಹಮ್ಮದ್ ಬಿನ್ ರಶೀದ್ ಅಲ್ ಮಕ್ತೌಮ್ ಅವರು 10 ಗಂಟೆಗಳ ಕಾಲ ವೈಯಕ್ತಿಕವಾಗಿ ಮಾತುಕತೆ ನಡೆಸಿ ಉಗ್ರರನ್ನು ನಿಗ್ರಹಿಸಿ ಎಲ್ಲಾ 73 ಪ್ರಯಾಣಿಕರನ್ನು ಸುರಕ್ಷಿತವಾಗಿ ಬಿಡುಗಡೆ ಮಾಡಿಸಿದರು. ವಿಶೇಷವೆಂದರೆ, ಈ ವಿಮಾನದಲ್ಲಿದ್ದವರಲ್ಲಿ ವಿದೇಶಾಂಗ ಸಚಿವ ಎಸ್. ಜೈಶಂಕರ್ ಅವರ ತಂದೆ ಕೆ. ಸುಬ್ರಹ್ಮಣ್ಯಂ ಕೂಡ ಒಬ್ಬರಾಗಿದ್ದರು.
ಈ ಎಲ್ಲಾ ಪ್ರಕರಣಗಳಿಗೂ ಮತ್ತು ಇತ್ತೀಚಿನ ಸ್ಮಿತ್ ಮಚ್ಚರ್ ಅವರ ಪ್ರಕರಣಕ್ಕೂ ಒಂದು ಸಣ್ಣ ವ್ಯತ್ಯಾಸವಿದೆ. ಹಿಂದಿನ ಘಟನೆಗಳಲ್ಲಿ ವಿಮಾನವನ್ನು ಹೊರಗಿನಿಂದ ಅಪಹರಿಸಲಾಗಿತ್ತು, ಆದರೆ ಸ್ಮಿತ್ ಮಚ್ಚರ್ ಅವರ ಪ್ರಕರಣದಲ್ಲಿ ಸ್ವತಃ ಸಹ-ಪೈಲಟ್ ಕಾಕ್‌ಪಿಟ್ ಒಳಗಿನಿಂದಲೇ ಚಾಕುವಿನಿಂದ ಇರಿದು ವಿಮಾನವನ್ನು ಕೆಳಗೆ ಉರುಳಿಸಲು ಯತ್ನಿಸಿದ್ದು ಅತ್ಯಂತ ಭೀಕರ ಹಾಗೂ ವಿಭಿನ್ನ ಸಂಗತಿಯಾಗಿದೆ.
ಆದಾಗ್ಯೂ, ಎಲ್ಲಾ ಸಂದರ್ಭಗಳಲ್ಲೂ ಭಾರತೀಯ ಪೈಲಟ್‌ಗಳು ಮತ್ತು ಸಿಬ್ಬಂದಿ ಅತಿಮುಖ್ಯವಾದ ಕ್ಷಣಗಳಲ್ಲಿ ಪ್ರಾಣದ ಹಂಗು ತೊರೆದು, ಭಯಪಡದೆ, ವಿವೇಚನೆಯಿಂದ ವರ್ತಿಸಿ ಪ್ರಯಾಣಿಕರ ಪ್ರಾಣ ಉಳಿಸಿರುವುದು ಭಾರತೀಯ ವಿಮಾನಯಾನ ಇತಿಹಾಸದಲ್ಲಿ ಸದಾ ಸ್ಮರಣೀಯವಾಗಿದೆ(ಏಜೆನ್ಸೀಸ್).