ಬಿಸಿಲಿನಲ್ಲಿ ಸೈಕಲ್​ ತುಳಿಯುತ್ತಿದ್ದ ವಿದೇಶಿಗ; ಮಜ್ಜಿಗೆ ಕುಡಿ ಬಾರಯ್ಯಾ ಎಂದ ತಾತ; ವಿಡಿಯೋ ವೈರಲ್​! Viral Video

ವೈರಲ್​: ವಸುದೈವ ಕುಟುಂಬಕಂ, ಅತಿಥಿ ದೇವೋ ಭವ ಎನ್ನುವುದು ಭಾರತೀಯರು ನಂಬುವ ಸಿದ್ದಾಂತವಾಗಿದೆ. ಈಗ ಈ ಸಿದ್ದಾಂತವನ್ನು ಪಾಲಿಸಿದ ವ್ಯಕ್ತಿಯೊಬ್ಬನ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ಸಖತ್​ ವೈರಲ್ (Viral Video) ​ ಆಗುತ್ತಿದೆ.

ಬ್ರಿಟಿಷ್​ ಪ್ರವಾಸಿಗ ಡಂಕನ್ ಇವಾನ್ಸ್ ಎನ್ನುವಾತ ಭಾರತದ ಪ್ರವಾಸದಲ್ಲಿದ್ದಾನೆ. ಇವಾನ್ಸ್​ ತನ್ನ ಸೈಕಲ್​ ಮೂಲಕ ಭಾರತದ ಪರ್ಯಟನೆ ಮಾಡುತ್ತಿದ್ದು, ಹರಿಯಾಣಾದ ಹಳ್ಳಿಗಳಲ್ಲಿ ಸೈಕ್ಲಿಂಗ್​ ಮಾಡುತ್ತಿದ್ದಾಗ, ಇವಾನ್ಸ್​ಗೆ ಒಬ್ಬ ವೃದ್ಧ ಎದುರಾಗಿದ್ದಾನೆ.

ವಿದೇಶಿಗನೊಬ್ಬ ಬಿರು ಬಿಸಿಲಿನಲ್ಲಿ ಸೈಕಲ್​ ತುಳಿಯುತ್ತಿರುವುದನ್ನು ಕಂಡ ವೃದ್ಧ, ನಮ್ಮೂರಿನಲ್ಲಿ ಬಹಳ ಬಿಸಿಲಿದೆ ನಮ್ಮ ಮನಗೆ ಬಾ, ಒಂದು ಲೋಟ ಮಜ್ಜಿಗೆ ಕುಡಿಯುವಂತೆ ಎಂದು ಆಹ್ವಾನಿಸಿದ್ದಾರೆ. ವಿದೇಶಿಗನೊಂದಿಗೆ ಇಂಗ್ಲೀಷಿನಲ್ಲಿಯೇ ಮಾತನಾಡಿದ ವೃದ್ಧನ ಮಾತಿಗೆ ಬೆಲೆಕೊಟ್ಟು, ಡಂಕನ್​ ಭಾರತೀಯನ ಮನೆಗೆ ತೆರಳಿದ್ದಾನೆ.

ವೃದ್ಧನ ಮಾತಿನಂತೆ ಅವನ ಮನೆಗೆ ತೆರೆಳಿದ ಡಂಕನ್​​ನಿಗೆ ವೃದ್ಧ ದಂಪತಿಗಳು ಒಂದು ದೊಡ್ಡ ಲೋಟದಲ್ಲಿ ತಾಜಾ, ತಂಪಾದ ಮಜ್ಜಿಗೆಯನ್ನು ನೀಡಿದರು.

ಅದನ್ನು ಕುಡಿದ ಡಂಕನ್​, ವೃದ್ಧನಿಗೆ ಧನ್ಯವಾದ ತಿಳಿಸಿ ತನ್ನ ಪ್ರಯಾಣವನ್ನು ಮುಂದುವರೆಸಿದ್ದಾನೆ. ನಂತರ ಈ ಕುರಿತು ವಿಡಿಯೋ ಹಂಚಿಕೊಂಡಿರುವ ಡಂಕನ್​, ನನಗೆ ರಸ್ತೆ ಮಧ್ಯೆ ಒಬ್ಬ ವೃದ್ಧ ಮನೆಗೆ ಕರೆದುಕೊಂಡು ಹೋಗಿ ಮಜ್ಜಿಗೆ ಕೊಟ್ಟರು. ಆ ಮಜ್ಜಿಗೆ ತುಂಬಾ ರುಚಿಕರವಾಗಿತ್ತು. ಭಾರತೀಯರು ತುಂಬಾ ಹೃದಯವಂತರು ಮತ್ತು ಭಾರತದಲ್ಲಿ ಈ ರೀತಿಯ ಜನ ಪ್ರತಿ ಊರಿನಲ್ಲಿ ಸಿಗುತ್ತಾರೆ ಎಂದು ಹರ್ಷ ವ್ಯಕ್ತ ಪಡಿಸಿದ್ದಾರೆ.

ಈ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ಹರಿದಾಡಲು ಪ್ರಾರಂಭಿಸಿದ ನಂತರ ನೆಟ್ಟಿಗರು ವೃದ್ಧನ ಕೆಲಸಕ್ಕೆ ಮೆಚ್ಚುಗೆ ವ್ಯಕ್ತ ಪಡಿಸಿದ್ದಾರೆ. ಅತಿಥಿ ದೇವೋ ಭವ ಎನ್ನುವುದು ಭಾರತೀಯರ ರಕ್ತದಲ್ಲೇ ಇರುತ್ತದೆ ಎನ್ನುವುದಕ್ಕೆ ಈ ಘಟನೆಯೇ ಸಾಕ್ಷಿ ಎನ್ನಬಹುದು ಎಂದು ಒಬ್ಬ ಬಳಕೆದಾರ ಹೇಳಿದರೆ, ಈ ಅಜ್ಜ ನನ್ನೂರಿನವರು, ಇವರು ಭಾರತೀಯ ಸೇವೆಯಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾಗಿದ್ದಾರೆ ಎಂದು ವೃದ್ಧನ ಪರಿಚಯವನ್ನು ಇನ್ನೊಬ್ಬರು ಮಾಡಿ ಕೊಟ್ಟಿದ್ದಾರೆ. ಒಟ್ಟಿನಲ್ಲಿ ಈ ತಾತನಿಂದಾಗಿ ಭಾರತದ ಖ್ಯಾತಿ ಇನ್ನಷ್ಟು ಹೆಚ್ಚಿದೆ ಎಂದರೆ ಅತಿಶಯೋಕ್ತಿಯಲ್ಲ,(ಏಜನ್ಸೀಸ್​).