ಹೈದರಾಬಾದ್: ಪಡೆದಿದ್ದ ಸಾಲವನ್ನು ಸರಿಯಾದ ಸಮಯಕ್ಕೆ ಹಿಂತಿರುಗಿಸಲಿಲ್ಲ ಎಂಬ ಕಾರಣಕ್ಕೆ ವ್ಯಕ್ತಿಯೋರ್ವ ಮಗನ ಕಣ್ಣೆದುರಲ್ಲೇ ತಾಯಿಯನ್ನು ಅಪಹರಿಸಿರುವ (Kidnap) ಘಟನೆ ತೆಲಂಗಾಣದ ಕರೀಮ್ನಗರ ಜಿಲ್ಲೆಯ ಕೊಡುಮುಂಜಾ ಗ್ರಾಮದಲ್ಲಿ ನಡೆದಿದೆ. ಅಪಹರಣದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ರಾಜ್ಯದಲ್ಲಿ ಕಾನೂನು-ಸುವ್ಯವಸ್ಥೆ ಕುರಿತಾದ ಪ್ರಶ್ನೆಗಳು ಉದ್ಭವಿಸಿವೆ.
ಘಟನೆಯ ಕುರಿತು ಪ್ರತಿಕ್ರಿಯಿಸಿರುವ ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು (Senior Police Officer), ಕರೀಮ್ನಗರ ಜಿಲ್ಲೆಯ ಕೊಡುಮುಂಜಾ ಗ್ರಾಮದ ಪಲ್ಲಪು ಶ್ರೀನಿವಾಸ್ (Srinivas) ಎಂಬಾತ ಮಹಾರಾಷ್ಟ್ರ ಮೂಲದ ಲಾಲ್ ದೇವಕರ್ (Lal Devkar) ಎಂಬಾತನಿಂದ ಮೂರು ಲಕ್ಷ ರೂಪಾಯಿ ಸಾಲ ಪಡೆದಿದ್ದರು. ಶ್ರೀನಿವಾಸ್ ಹಾಗೂ ಅವರ ಸಹೋದರ ಛತ್ತೀಸ್ಗಢದಲ್ಲಿ ಕೆಲಸ ಮಾಡುತ್ತಿದ್ದು, ಪಡೆದಿದ್ದ ಸಾಲಬವನ್ನು ಸರಿಯಾದ ಸಮಯಕ್ಕೆ ತೀರಿಸಲು ಸಾಧ್ಯವಾಗಿರಲಿಲ್ಲ.
ಸರಿಯಾದ ಸಮಯಕ್ಕೆ ಸಾಲ ಕೊಡಲಿಲ್ಲವೆಂದು ಕುಪಿತಗೊಂಡಿದ್ದ ಆರೋಪಿ ಲಾಲ್ ದೇವಕರ್ ನವೆಂಬರ್ 06ರಂದು ತನ್ನ ಸಹಚರರೊಂದಿಗೆ ಕೊಡುಮುಂಜಾ ಗ್ರಾಮಕ್ಕೆ ಆಗಮಿಸಿದ್ದು, ಶ್ರೀನಿವಾಸ್ ಕುಟುಂಬದವರ ಮೇಲೆ ಹಲ್ಲೆ ನಡೆಸಿ ಅವರ ಕಣ್ಣೆದುರಲ್ಲೇ ತಾಯಿ ಪಲ್ಲಪು ಭೀಮಾಬಾಯಿ ಅವರನ್ನು ಅಪಹರಿಸಿದ್ದಾನೆ (Kidnap) . ಸಂತ್ರಸ್ತರ ಕುಟುಂಬಸ್ಥರು ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡು ತನಿಖೆ ನಡೆಸಲಾಗುತ್ತಿದ್ದು, ತಲೆಮಾರಿಸಿಕೊಂಡಿರುವ ಆರೋಪಿಗಳಿಗಾಗಿ ಹುಡುಕಾಟ ನಡೆಯುತ್ತಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು (Senior Police Officer) ತಿಳಿಸಿದ್ದಾರೆ.