ನವದೆಹಲಿ: ದೇಶದಲ್ಲಿ ಆಗಸ್ಟ್ 1ರಿಂದ ಹಲವಾರು ಪ್ರಮುಖ ಆರ್ಥಿಕ ಬದಲಾವಣೆಗಳು ಜಾರಿಗೆ ಬರಲಿದ್ದು, ಅವು ಜನರ ದೈನಂದಿನ ಹಣಕಾಸು ವಹಿವಾಟು, ಪ್ರಯಾಣ ಮತ್ತು ಕ್ರೆಡಿಟ್ ಕಾರ್ಡ್ ಸೌಲಭ್ಯಗಳ ಮೇಲೆ ಪರಿಣಾಮ ಬೀರಲಿವೆ. ಯುಪಿಐ ವಹಿವಾಟುಗಳಿಗೆ ಪರಿಷ್ಕೃತ ನಿಯಮಗಳು, ಖಾಸಗಿ ವಾಹನಗಳಿಗೆ ವಾರ್ಷಿಕ ಫಾಸ್ಟ್ಟ್ಯಾಗ್ ಪಾಸ್ನ ಹೊಸ ಯೋಜನೆ, ಆಯ್ದ ಕ್ರೆಡಿಟ್ ಕಾರ್ಡ್ಗಳಲ್ಲಿ ಉಚಿತ ವಿಮಾ ಕವರೇಜ್ ರದ್ದತಿ ಮುಂತಾದವು ಇದರಲ್ಲಿ ಸೇರಿವೆ.
ಯುಪಿಐ ಪರಿಷ್ಕೃತ ನಿಯಮಗಳು: ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೆರೇಷನ್ ಆಫ್ ಇಂಡಿಯಾ (ಎನ್ಪಿಸಿಐ) ಆ. 1ರಿಂದ ಯುನಿಫೈಡ್ ಪೇಮೆಂಟ್ಸ್ ಇಂಟರ್ಫೇಸ್ (ಯುಪಿಐ) ವಹಿವಾಟುಗಳಿಗೆ ಹೊಸ ನಿಯಮಗಳನ್ನು ಜಾರಿಗೊಳಿಸಲಿದೆ.
ಬ್ಯಾಲೆನ್ಸ್ ಚೆಕ್ಗೆ ಮಿತಿ: ಫೋನ್ಪೇ, ಗೂಗಲ್ ಪೇ, ಪೇಟಿಎಂ ಮುಂತಾದ ಯುಪಿಐ ಆಪ್ಗಳಲ್ಲಿ ಬಳಕೆದಾರರು ದಿನಕ್ಕೆ ಗರಿಷ್ಠ 50 ಬಾರಿ ಮಾತ್ರ ತಮ್ಮ ಬ್ಯಾಂಕ್ ಖಾತೆಯ ಬ್ಯಾಲೆನ್ಸ್ ಪರಿಶೀಲಿಸಬಹುದು. ಈ ಮಿತಿಯು ಪ್ರತಿ ಆಪ್ಗೆ ಪ್ರತ್ಯೇಕವಾಗಿರುತ್ತದೆ.
ವಹಿವಾಟಿನ ಸ್ಟೇಟಸ್ ಚೆಕಿಂಗ್: ಯಾವುದೇ ವಹಿವಾಟಿನ ಸ್ಟೇಟಸ್ ಪರಿಶೀಲಿಸಲು 90 ಸೆಕೆಂಡ್ಗಳ ಅಂತರದಲ್ಲಿ ಕೇವಲ 3 ಬಾರಿ ಅವಕಾಶ.
ಆಟೋಪೇ ಶೆಡ್ಯೂಲಿಂಗ್: ಒಟಿಟಿ ಸಬ್ಸ್ಕ್ರಿಪ್ಶನ್, ಮ್ಯೂಚುವಲ್ ಫಂಡ್ ಮುಂತಾದ ಆಟೋಮ್ಯಾಟಿಕ್ ಪೇಮೆಂಟ್ಗಳು ಇನ್ನು ಮುಂದೆ ಬೆಳಗ್ಗೆ 10 ಗಂಟೆಗೆ ಮೊದಲು, ಮಧ್ಯಾಹ್ನ 1ರಿಂದ ಸಂಜೆ 5ರವರೆಗೆ ಮತ್ತು ರಾತ್ರಿ 9.30ರ ನಂತರ ಮಾತ್ರ ನಡೆಯಲಿವೆ. ಬ್ಯಾಂಕ್ ಸರ್ವರ್ಗಳ ಮೇಲಿನ ಒತ್ತಡ ಕಡಿಮೆ ಮಾಡುವುದು ಇದರ ಹಿಂದಿನ ಉದ್ದೇಶ.
ಪೇಮೆಂಟ್ ದೃಢೀಕರಣ: ವಹಿವಾಟಿಗೆ ಮುನ್ನ ಫಲಾನುಭವಿಯ ಹೆಸರನ್ನು ಪ್ರದರ್ಶಿಸಲಾಗುತ್ತದೆ. ಇದರಿಂದ ಬೇರೆಯವರ ಖಾತೆಗೆ ತಪ್ಪಾಗಿ ಹಣ ವರ್ಗಾವಣೆಯಾಗುವ ಸಾಧ್ಯತೆ ಕಡಿಮೆಯಾಗುತ್ತದೆ.
ಪೇಮೆಂಟ್ ರಿವರ್ಸಲ್ ಮಿತಿ: ಒಬ್ಬ ಬಳಕೆದಾರ 30 ದಿನಗಳಲ್ಲಿ ಗರಿಷ್ಠ 10 ಬಾರಿ ಮಾತ್ರ ಪೇಮೆಂಟ್ ರಿವರ್ಸಲ್ (ರಿಫಂಡ್) ಸೌಲಭ್ಯ ಬಳಸಬಹುದು.
ದೇಶದ ಎಲ್ಲ ಖಾಸಗಿ ವಾಹನಗಳಿಗೆ ಫಾಸ್ಟ್ಟ್ಯಾಗ್ ವಾರ್ಷಿಕ ಪಾಸ್ನ ಹೊಸ ಯೋಜನೆಯನ್ನು ಆ. 15ರಿಂದ ಜಾರಿ ಮಾಡುವ ಸಾಧ್ಯತೆಯಿದೆ. ಹೆಚ್ಚು ಸಲ ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಪ್ರಯಾಣಿಸುವ ವಾಹನ ಮಾಲೀಕರಿಗೆ ಟೋಲ್ ಶುಲ್ಕ ಉಳಿಸಲು ಇದರಿಂದ ಸಹಾಯವಾಗಲಿದೆ. ಇದರ ನೋಂದಣಿ, ರೀಚಾರ್ಜ್ ಮತ್ತು ನಿರ್ವಹಣೆಯನ್ನು ಯುಪಿಐ- ಸಂಯೋಜಿತ ಆಪ್ಗಳು ಅಥವಾ ಎನ್ಎಚ್ಎಐನ ಅಧಿಕೃತ ಪೋರ್ಟಲ್ ಮೂಲಕ ಸರಳವಾಗಿ ಮಾಡಬಹುದು. ವಾರ್ಷಿಕ ಪಾಸ್ನ ದರಗಳು ಎಷ್ಟು ಎಂಬುದನ್ನು ಸರ್ಕಾರ ಇನ್ನಷ್ಟೇ ಅಧಿಕೃತವಾಗಿ ಪ್ರಕಟಿಸ ಬೇಕಿದೆ. ಟೋಲ್ಗೇಟ್ಗಳಲ್ಲಿ ವಾಹನ ದಟ್ಟಣೆ ಕಡಿಮೆ ಮಾಡುವುದು, ಬಳಕೆದಾರರಿಗೆ ವೆಚ್ಚ ಉಳಿತಾಯ ಮಾಡುವುದು ಇದರ ಉದ್ದೇಶ.
ಎಸ್ಬಿಐ ತನ್ನ ಕೆಲವು ಕೊ-ಬ್ರ್ಯಾಂಡೆಡ್ ಕ್ರೆಡಿಟ್ ಕಾರ್ಡ್ಗಳಲ್ಲಿ ಒದಗಿಸುತ್ತಿದ್ದ ಉಚಿತ ವಿಮಾ ಕವರೇಜ್ ಸೌಲಭ್ಯವನ್ನು ಆ. 1ರಿಂದ ಸ್ಥಗಿತಗೊಳಿಸಲಿದೆ. ವಿಮಾನ ದುರಂತ ವಿಮೆ, ವೈಯಕ್ತಿಕ ಅವಘಡಕ್ಕಿದ್ದ ವಿಮೆ ಮುಂತಾದವು ಇದರಲ್ಲಿ ಸೇರಿವೆ. ಈ ಕವರೇಜ್ ಬೇಕಿದ್ದರೆ ಗ್ರಾಹಕರು ಪ್ರತ್ಯೇಕವಾಗಿ ವಿಮಾ ಪಾಲಿಸಿ ಖರೀದಿಸಬೇಕಾಗುತ್ತದೆ.