ಲಂಡನ್: ಮಗಳಿಗೆ ತಿಳಿಯದಂತೆ ಸುಮಾರು ಮೂರು ವರ್ಷ ಆಕೆ ಸ್ನಾನ ಮಾಡುವುದನ್ನು ಕದ್ದು ವಿಡಿಯೋ ಮಾಡುತ್ತಿದ್ದ ಮಲತಂದೆ, ಮಗಳ 18ನೇ ವರ್ಷದ ಹುಟ್ಟುಹಬ್ಬದ ಸಂಭ್ರಮಾಚರಣೆಯ ವೇಳೆ ಸಿಕ್ಕಿಬಿದ್ದಂತಹ ಪ್ರಕರಣ ಇದೀಗ ಬೆಳಕಿಗೆ ಬಂದಿದೆ.
ಯುವತಿ ಲಾರೆನ್ ಬ್ರೈಟ್ವುಡ್ಳನ್ನು ಆಕೆಯ ಮಲತಂದೆ ಥಾಮಸ್ ಕ್ರೈಗ್ ಲೆವಿಸ್ ನಾಲ್ಕನೇ ವಯಸ್ಸಿನಿಂದಲೂ ನೋಡಿಕೊಳ್ಳುತ್ತಿದ್ದರಂತೆ. ಆದರೆ, ಕಳೆದ ಮೂರು ವರ್ಷಗಳಿಂದ 35 ವರ್ಷದ ಮಲತಂದೆ ಲೆವಿಸ್, ಲಾರೆನ್ ಕದ್ದು ಸ್ನಾನ ಮಾಡುವುದನ್ನು ವಿಡಿಯೋ ಮಾಡುತ್ತಿರುವುದು ಬಯಲಾಗಿದೆ.
ಲೆವಿಸ್ ಯುನೈಟೆಡ್ ಕಿಂಗ್ಡಮ್ನ ಸೌಥ್ ವೇಲ್ಸ್ನ ಲಾನೆಲ್ಲಿ ನಗರದ ನಿವಾಸಿ. ಪೊಲೀಸ್ ತನಿಖೆಯ ಬಳಿಕ ಮಂಗಳವಾರ ನಾರ್ಥ್ಹ್ಯಾಂಪ್ಟನ್ ಕೋರ್ಟ್ಗೆ ಹಾಜರಾದ ಲೆವಿಸ್ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದಕ್ಕೆ 18 ತಿಂಗಳ ಬದಲಾಗಿ, 10 ತಿಂಗಳ ಕಾರಾಗೃಹ ಶಿಕ್ಷೆಗೆ ಗುರಿಯಾಗಿದ್ದಾರೆ.
ಅಂದಹಾಗೆ ಈ ಘಟನೆ ನಡೆದಿದ್ದು 2018ರಲ್ಲಿ. 18ನೇ ವರ್ಷಕ್ಕೆ ಕಾಲಿಟ್ಟಿದ್ದ ಲಾರೆನ್ ಹುಟ್ಟುಹಬ್ಬ ಆಚರಣೆಗೂ ಮುನ್ನ ಸ್ನಾನ ಮಾಡಲು ಹೋದ ಅವಳಿಗೆ ಬಾತ್ರೂಮ್ನ ಕಿಟಕಿಯಲ್ಲಿ ಕ್ಯಾಮೆರಾವೊಂದು ಪತ್ತೆಯಾಗಿತ್ತಂತೆ. ತಕ್ಷಣ ಬಾತ್ರೂಮ್ನಿಂದಲೇ ಲಾರೆನ್ ತನ್ನ ತಾಯಿ ಮೈಕೆಲ್ಲೆಗೆ ಮಾಹಿತಿ ತಿಳಿಸಿದ್ದಾಳೆ. ಬಳಿಕ ಮೈಕೆಲ್ಲೆ ತನ್ನ ಪತಿ ಲೆವಿಸ್ ಎದುರಾಗಿ ಪ್ರಶ್ನಿಸಿದಾಗ ಆತ ತಪ್ಪನ್ನು ಒಪ್ಪಿಕೊಂಡಿದ್ದಾನೆ. ಅನೇಕ ಬಾರಿ ಸ್ನಾನ ಮಾಡುವುದನ್ನು ರೆಕಾರ್ಡ್ ಮಾಡಿದ್ದಾಗಿ ಬಾಯ್ಬಿಟ್ಟಿದ್ದಾನೆ. ವೇಲ್ಸ್ನ ಹಳೆಯ ಮನೆಯಲ್ಲಿದ್ದಾಗಲೂ ರೆಕಾರ್ಡ್ ಮಾಡಿದ್ದಾಗಿ ಒಪ್ಪಿಕೊಂಡಿದ್ದಾನೆ.
ಬಳಿಕ ಪ್ರಕರಣ ದಾಖಲಿಸಿದಾಗ ತಾನೇ ಶರಣಾದ ಲೆವಿಸ್ ಪೊಲೀಸ್ ತನಿಖೆಯ ವೇಳೆಯೂ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದಾನೆ. ಸುಮಾರು 5 ರಿಂದ 10 ವಿಡಿಯೋವನ್ನು 14 ರಿಂದ 17ನೇ ವಯಸ್ಸಿನ ಅಂತರದಲ್ಲಿ ಲೆವಿಸ್ ಮಾಡಿದ್ದಾರಂತೆ. ಇದೀಗ ನ್ಯಾಯಾಲಯಕ್ಕೂ ಹಾಜರಾಗಿರುವ ಲೆವಿಸ್ಗೆ ತನಿಖಾ ನಂತರ 10 ತಿಂಗಳ ಶಿಕ್ಷೆಗೂ ಗುರಿಯಾಗಿದ್ದು, ಯಾವುದೇ ಸಂಬಳವಿಲ್ಲದೆ 30 ದಿನಗಳ ಕಾರಾಗೃಹ ಕೆಲಸದ ಶಿಕ್ಷೆಯನ್ನು ವಿಧಿಸಿದೆ ಮತ್ತು ಆಪ್ತ ಸಮಾಲೋಚನೆ ಕೊಡಿಸಲು ಸಹ ಕೋರ್ಟ್ ಸೂಚಿಸಿದೆ.
ಇನ್ನು ಘಟನೆಯ ಬಗ್ಗೆ ಸ್ವತಃ ಮಾತನಾಡಿರುವ ಲಾರೆನ್, ನನಗೆ ಕ್ಯಾಮೆರಾ ನೋಡಿ ಶಾಕ್ ಆಯಿತು. ಅದು ಹೇಗೆ ಕಾರ್ಯನಿರ್ವಹಿಸುತ್ತಿದೆ ಎಂಬುದು ಸಹ ನನಗೆ ಗೊತ್ತಿರಲಿಲ್ಲ. ಏನು ಮಾಡಬೇಕೆಂದು ನನಗೆ ತಿಳಿಯಲಿಲ್ಲ. ನಾನು ಬಾತ್ರೂಮ್ಗಳಿಗೆ ಪ್ರವೇಶ ನೀಡುವಾಗಲೆಲ್ಲ ಇಂಥದೊಂದು ನಡೆಯದಿರಲಿ ಎಂದು ಭಾವಿಸುತ್ತೇನೆ ಎಂದಿದ್ದಾರೆ. ಲೆವಿಸ್ ನನ್ನ ಮಲತಂದೆ. ಆದರೆ, ನಾನು ನನ್ನ ಸ್ವಂತ ತಂದೆಯೆಂದೇ ಭಾವಿಸಿದ್ದೆ. ಹೀಗೆ ಮಾಡುತ್ತಾರೆಂದು ನಾನು ಭಾವಿಸಿರಲಿಲ್ಲ ಎಂದು ಲಾರೆನ್ ದುಃಖಿತಳಾದಳು.
ಮಲ ತಂದೆಗೆ ಶಿಕ್ಷೆ ವಿಧಿಸಿದ್ದರ ಬಗ್ಗೆ ಮಾತನಾಡಿರುವ ಆಕೆ, ಈ ಶಿಕ್ಷೆಯನ್ನು ನಾನು ಬಯಸಿರಲಿಲ್ಲ. ಆದರೆ, ಕೋರ್ಟ್ ಏನು ಹೇಳಿದೆಯೋ ಅದನ್ನು ಪಾಲಿಸಬೇಕಿದೆ. ನಿಜಕ್ಕೂ ಇದು ನಾಚಿಕೆ ಪಡುವ ಸಂಗತಿಯಾಗಿದೆ. ಮಲತಂದೆಯ ಲೆವಿಸ್ ಮಾಡಿದ ಕೃತ್ಯದ ಬಗ್ಗೆ ಮತ್ತು ಶಿಕ್ಷೆಯ ಬಗ್ಗೆ ಎಲ್ಲರಿಗೂ ಅರಿವಾದರೆ ಸಾಕು ಎಂದು ಲಾರೆನ್ ಹೇಳಿದ್ದಾಳೆ. (ಏಜೆನ್ಸೀಸ್)