ಮಂಗಳೂರು: ನನ್ನ ಭಾಷೆ ನನ್ನ ಊರಿನಲ್ಲಿ ಅಧಿಕೃತ ಭಾಷೆಯಾಗಬೇಕು ಎಂದು ಆಗ್ರಹಿಸಿ ಸ್ವಾತಂತ್ರ್ಯೊತ್ಸವ ಅಮೃತ ಮಹೋತ್ಸವ ದಿನ ಆಯೋಜಿಸಿದ ಟ್ವೀಟ್ ಅಭಿಯಾನದಲ್ಲಿ ದೇಶದ ವಿವಿಧೆಡೆಗಳ ಸುಮಾರು 66,356 ಜನರು ಭಾಗವಹಿಸಿದ್ದಾರೆ.
ದಕ್ಷಿಣ ಭಾರತದ ತುಳು, ಕೊಡವ, ಉತ್ತರ ಭಾರತದ ಭೋಜ್ಪುರಿ, ರಾಜಸ್ಥಾನಿ, ಘರ್ವಾಲಿ, ಕುಮುನಿ, ಛತ್ತೀಸ್ಗಢ ಸಹಿತ 10 ಭಾಷೆಗಳನ್ನು ಮಾತನಾಡುವ ಜನರು ಟ್ವೀಟ್ ಅಭಿಯಾನದಲ್ಲಿ ಪಾಲ್ಗೊಂಡರು. ಅಭಿಯಾನದ ಸಂಘಟಕರಲ್ಲಿ ಓರ್ವರಾದ ಭಾಷಾ ಹೋರಾಟಗಾರ ವಿಶಾಲ್ ಈ ಮಾಹಿತಿಯನ್ನು ದೃಢಪಡಿಸಿದ್ದಾರೆ.
ಸೋಮವಾರ ಬೆಳಗ್ಗೆ 9ರಿಂದ ರಾತ್ರಿ 9 ಗಂಟೆ ತನಕ ಟ್ವೀಟ್ ಅಭಿಯಾನ ನಡೆಸಲು ಕರೆ ನೀಡಲಾಗಿತ್ತು. ‘ನೋ ಯುವರ್ ರೂಟ್ಸ್’ ಎನ್ನುವ ಸಂಸ್ಕೃತಿಯ ಹಬ್ ಈ ಟ್ವೀಟ್ ಅಭಿಯಾನದ ಹಿಂದಿದೆ. ಮಾನ್ಯತೆ ದೊರೆಯವ ಸ್ಥಳೀಯ ಭಾಷೆಗಳು ಗಟ್ಟಿಯಾಗಲಿವೆ. ಅಳಿವಿನಂಚಿನಲ್ಲಿರುವ ಭಾಷೆಗಳು ಮತ್ತೆ ಸಜೀವವಗೊಳಿಸುವುದು ಕೂಡ ಟ್ವೀಟ್ ಅಭಿಯಾನದ ಮುಖ್ಯ ಉದ್ದೇಶ.