ಅಂತ್ಯಸಂಸ್ಕಾರವಾಗಿಬೇಕಿದ್ದ ಶವದ ಫೋಟೋ ತೆಗೆಯಲು ಹೋದ ಫೋಟೋಗ್ರಾಫರ್ ಶಾಕ್ಗೆ ಒಳಗಾಗಿದ್ದಲ್ಲದೆ, ಅನ್ಯಾಯವಾಗಿ ಸಮಾಧಿಯಾಗುತ್ತಿದ್ದ ದೇಹವನ್ನು ಕಾಪಾಡಿದ್ದಾರೆ.
ಇದೊಂದು ವಿಚಿತ್ರ ಘಟನೆ ನಡೆದಿದ್ದು ಕೇರಳದ ಎರ್ನಾಕುಲಂ ಜಿಲ್ಲೆಯಲ್ಲಿ. ಶಿವದಾಸನ್ ಎಂಬಾತನ ತಲೆಗೆ ಗುಂಡು ತಗುಲಿ, ಬಲವಾದ ಬಿದ್ದಿತ್ತು. ಆಸ್ಪತ್ರೆಗೆ ದಾಖಲಿಸಲು ತಡವಾಗಿತ್ತು. ಆದರೆ ಆಸ್ಪತ್ರೆಗೆ ಕರೆದುಕೊಂಡು ಬರುತ್ತಿದ್ದಂತೆ ಆತ ಸತ್ತೇ ಹೋಗಿದ್ದಾನೆ ಎಂದು ವೈದ್ಯರು ತಿಳಿಸಿದರು. ಇದು ಪೊಲೀಸ್ ಕೇಸ್ ಆಗಿದ್ದರಿಂದ ಅವರಿಗೆ ವಿಚಾರಣೆ, ಸಾಕ್ಷಿ ಸಂಬಂಧ ಮೃತನ ಫೋಟೋ ಬೇಕಿತ್ತು.
ವೈದ್ಯರು ಈ ವ್ಯಕ್ತಿ ಮೃತಪಟ್ಟಿದ್ದಾನೆಂದು ಘೋಷಿಸಿದ್ದರಿಂದ ಅವನ ಅಂತ್ಯಕ್ರಿಯೆಗೂ ಮೊದಲು ಪೊಲೀಸರು ಫೋಟೋಗ್ರಾಫರ್ ಟಾಮಿ ಥಾಮಸ್ ಎಂಬುವರನ್ನು ಕರೆಸಿ, ಶವದ ಫೋಟೋ ಕ್ಲಿಕ್ ಮಾಡುವಂತೆ ತಿಳಿಸಿದರು.
ಶವ ಇದ್ದ ಕೋಣೆಗೆ ಹೋದ ಫೋಟೋಗ್ರಾಫರ್ ತನ್ನ ಕ್ಯಾಮರಾವನ್ನು ಸಿದ್ಧಪಡಿಸಿಕೊಳ್ಳುತ್ತಿರುವಾಗ ಆತನಿಗೆ ಮೃತದೇಹದಲ್ಲಿ ಏನೋ ಚಲನೆಯಾಗುತ್ತಿರುವುದು ಗಮನಕ್ಕೆ ಬಂತು. ಆದರೆ ಅದನ್ನು ಗಂಭೀರವಾಗಿ ಪರಿಗಣಿಸದ ಟಾಮಿ ಫೋಟೋ ಕ್ಲಿಕ್ಕಿಸುವುದರಲ್ಲಿ ಮಗ್ನರಾಗಿದ್ದರು.
ಡೆಡ್ ಬಾಡಿಯ ಹತ್ತಿರದಿಂದ ಫೋಟೋ ತೆಗೆಯುತ್ತಿದ್ದುದರಿಂದ ಅದರಿಂದ ಒಂದು ನರಳಾಟದ ಸದ್ದು ಬರುತ್ತಿರುವುದು ಫೋಟೋಗ್ರಾಫರ್ಗೆ ಕೇಳಿಸಿತ್ತು. ಮತ್ತೊಮ್ಮೆ ಆಲಿಸಿದಾಗ, ಅದು ಮೃತದೇಹದಿಂದಲೇ ಬರುತ್ತಿರುವ ಶಬ್ದ ಎಂಬುದು ಖಚಿತವಾಯಿತು. ಕೂಡಲೇ ಎಚ್ಚೆತ್ತುಕೊಂಡ ಫೋಟೋ ಗ್ರಾಫರ್ ಆ ವ್ಯಕ್ತಿಯ ಉಸಿರಾಡುತ್ತಿದ್ದಾನೆ ಎಂಬುದನ್ನು ಗಮನಿಸಿದರು. ಒಂದು ಕ್ಷಣ ಹೌಹಾರಿದ ಅವರು, ಕೂಡಲೇ ಅಲ್ಲಿಂದ ಓಡಿ ಹೋಗಿ ವೈದ್ಯರಿಗೆ, ಪೊಲೀಸರಿಗೆ ವಿಷಯ ತಿಳಿಸಿದರು. ನಂತರ ಶಿವದಾಸನ್ ಅವರನ್ನು ಮತ್ತೆ ಐಸಿಯುಗೆ ದಾಖಲಿಸಿ, ಚಿಕಿತ್ಸೆ ನೀಡಲಾಯಿತು.
ಒಂದೊಮ್ಮೆ ಫೋಟೋಗ್ರಾಫರ್ ಮೃತದೇಹವನ್ನು ಗಮನಿಸದೆ ಇದ್ದರೆ, ಶಿವದಾಸನ್ ಅವರ ನರಳಾಟ ಕೇಳಿಸಿಕೊಳ್ಳದೆ ಇದ್ದರೆ, ಆತನ ಅಂತ್ಯಕ್ರಿಯೆ ಮಾಡಲಾಗುತ್ತಿತ್ತು. ಅನ್ಯಾಯವಾಗಿ ಒಬ್ಬನ ಜೀವಂತ ಸಮಾಧಿ ಮಾಡಬೇಕಾಗುತ್ತಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)