ಕಾನ್ಪುರ: ಇಲ್ಲಿ ನಡೆದ ಎಂಟು ಪೊಲೀಸರ ಎನ್ಕೌಂಟರ್ ಪ್ರಕರಣದ ತನಿಖೆ ನಡೆಸಿದಷ್ಟೂ ಪೊಲೀಸರೇ ಸಿಕ್ಕಿಬೀಳುತ್ತಿದ್ದಾರೆ.
ಈಗಾಗಲೇ ನಾಲ್ವರು ಪೊಲೀಸರು ಅಮಾನತುಗೊಂಡಿದ್ದಾರೆ. ಚೌಬೇಪುರ ಠಾಣೆಯಿಂದಲೇ ವಿಕಾಸ್ ದುಬೆಗೆ ಮಾಹಿತಿ ರವಾನೆಯಾಗಿತ್ತು ಎಂಬ ವಿಷಯ ತನಿಖಾಧಿಕಾರಿಗಳಿಗೆ ಗೊತ್ತಾಗಿದ್ದು, ಅದರ ಅನ್ವಯ ಸುಮಾರು 200 ಪೊಲೀಸರ ಕಾಲ್ ಡಿಟೇಲ್ಸ್ಗಳನ್ನು ಪರಿಶೀಲಿಸಲು ಅವರು ಮುಂದಾಗಿದ್ದಾರೆ.
ಇದೀಗ ಮತ್ತೊಂದು ಮಹತ್ವದ ಬೆಳವಣಿಗೆಯಾಗಿದ್ದು, ಸ್ಪೆಶಲ್ ಟಾಸ್ಕ್ ಫೋರ್ಸ್ನ ಡಿಐಜಿ ಅನಂತ್ ದೇವ್ ಅವರನ್ನು ಆ ಸ್ಥಾನದಿಂದ ತೆಗೆದುಹಾಕಲಾಗಿದೆ. ಅವರು ಮೊರದಾಬಾದ್ ವಲಯದ ಡಿಐಜಿಯಾಗಿ ತೆರಳಲಿದ್ದಾರೆ.
ಅನಂತ್ ದೇವ್ಗೆ ಕಳೆದ ತಿಂಗಳಷ್ಟೇ ಡಿಐಜಿ ಆಗಿ ಪ್ರಮೋಶನ್ ಸಿಕ್ಕಿತ್ತು. ವಿಕಾಸ್ ದುಬೆಯ ಸಹಚರರಿಂದ ಮೃತರಾದ ಡಿಎಸ್ಪಿ ದೇವೇಂದ್ರ ಮಿಶ್ರಾ ಅವರು ಈ ಹಿಂದೆಯೇ ಚೌಬೆಪುರ ಠಾಣಾಧಿಕಾರಿ ವಿನಯ್ ತಿವಾರಿಗೆ ಗ್ಯಾಂಗ್ಸ್ಟರ್ ವಿಕಾಸ್ ದುಬೆಯೊಂದಿಗೆ ಸಂಪರ್ಕ ಇದೆ ಎಂದು ಅನಂತ್ ದೇವ್ ಅವರಿಗೆ ಪತ್ರ ಬರೆದಿದ್ದರು. ಆದರೆ ದೇವ್ ಆ ಬಗ್ಗೆ ಯಾವುದೇ ಕ್ರಮವನ್ನೂ ಕೈಗೊಂಡಿರಲಿಲ್ಲ ಎಂಬುದು ತನಿಖೆಯಿಂದ ಗೊತ್ತಾಗಿದೆ. ಆದರೆ ಪೂರ್ತಿ ಸತ್ಯ ಇನ್ನೂ ಗೊತ್ತಾಗಬೇಕಾಗಿರುವ ಕಾರಣ ಅವರನ್ನು ಬೇರೆ ಕಡೆಗೆ ವರ್ಗಾಯಿಸಲಾಗಿದೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. ಇದನ್ನೂ ಓದಿ: ಹಿರಿಯ ನಟಿ ಜಯಂತಿ ಆರೋಗ್ಯದಲ್ಲಿ ಏರುಪೇರು: ಐಸಿಯುವಿನಲ್ಲಿ ಚಿಕಿತ್ಸೆ
ಸಾವಿಗೂ ಒಂದು ವಾರದ ಹಿಂದೆ ಮಿಶ್ರಾ ಬರೆದ ಪತ್ರ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದ್ದು, ಆ ಪತ್ರವನ್ನು ಕೂಲಂಕುಷವಾಗಿ ಪರಿಶೀಲನೆ ಮಾಡುವ ಸಲುವಾಗಿ ತಂಡವೊಂದು ರಚನೆಯಾಗಿದೆ. ಇದಕ್ಕೆಂದೇ ಐಜಿಯನ್ನೂ ನೇಮಕ ಮಾಡಿಕೊಳ್ಳಲಾಗಿದೆ.(ಏಜೆನ್ಸೀಸ್)