ಲಖನೌ: ಯಾಕೋ ಬಾಲಿವುಡ್ ಪ್ರಖ್ಯಾತ ಸಿಂಗರ್ ಕನ್ನಿಕಾ ಕಪೂರ್ ಅವರನ್ನು ಕರೊನಾ ವೈರಸ್ ಬಿಡುವಂತೆ ಕಾಣುತ್ತಿಲ್ಲ. ಈವರೆಗೂ ಎದುರಿಸಿದ ನಾಲ್ಕು ಪರೀಕ್ಷೆಗಳಲ್ಲೂ ಕನ್ನಿಕಾರಿಗೆ ಕರೊನಾ ಪಾಸಿಟಿವ್ ಫಲಿತಾಂಶ ವರದಿಯಾಗಿರುವುದು ಕುಟುಂಬಕ್ಕೆ ಆಘಾತವಾಗಿದೆ.
ಮಾರ್ಚ್ 9ರಂದು ಲಂಡನ್ನಿಂದ ಮುಂಬೈಗೆ ಮರಳಿದ ಕನ್ನಿಕಾ ಕಾನ್ಪುರ ಮತ್ತು ಲಖನೌಗೆ ಪ್ರಯಾಣ ಬೆಳೆಸಿ ಮನೆಯಲ್ಲಿ ಉಳಿದಿದ್ದರು. ಅದಾದ ಕೆಲವೇ ದಿನಗಳಲ್ಲಿ ಕೆಮ್ಮು ಮತ್ತು ಜ್ವರ ಲಕ್ಷಣಗಳು ಕಾಣಿಸಿಕೊಳ್ಳಲು ಆರಂಭವಾಯಿತು. ಮಾರ್ಚ್ 20ರಂದು ಆಸ್ಪತ್ರೆಗೆ ದಾಖಲಾದ ಕನ್ನಿಕಾರಿಗೆ ಕರೊನಾ ಸೋಂಕು ತಗುಲಿರುವುದು ದೃಢವಾಗಿತ್ತು.
ಇದಾದ ಬೆನ್ನಲ್ಲೇ ಲಂಡನ್ನಿಂದ ಮರಳಿದ ಬಳಿಕ ಕ್ವಾರಂಟೈನ್ನಲ್ಲಿ ಇರದೆ ಪಾರ್ಟಿಗಳಲ್ಲಿ ಭಾಗವಹಿಸಿದ್ದ ಅವರನ್ನು ಸಾಮಾಜಿಕ ಜಾಲತಾಣದಲ್ಲಿ ತರಾಟೆಗೆ ತೆಗದುಕೊಂಡರು. ಅಲ್ಲದೆ, ಕರೊನಾ ನಿರ್ಲಕ್ಷಿಸಿದ್ದಕ್ಕೆ ಕನ್ನಿಕಾ ವಿರುದ್ಧ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಸೂಚನೆಯಂತೆ ಪ್ರಕರಣ ಕೂಡ ದಾಖಲಾಯಿತು.
ಸದ್ಯ ಲಖನೌದಲ್ಲಿರುವ ಸಂಜಯ್ ಗಾಂಧಿ ಪೋಸ್ಟ್ ಗ್ರಾಜ್ಯುಯೇಟ್ ಇನ್ಸ್ಟಿಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್(ಎಸ್ಜಿಪಿಜಿಐಎಂಎಸ್) ಹಾಸ್ಪಿಟಲ್ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಆಸ್ಪತ್ರೆಯ ಆಡಳಿತ ಮಂಡಳಿ ಜತೆಯೂ ಕಿರಿಕ್ ಮಾಡಿಕೊಂಡಿರುವ ಕನ್ನಿಕಾ ಟೀಕೆಗೆ ಗುರಿಯಾಗಿದ್ದರು. (ಏಜೆನ್ಸೀಸ್)