ಟೋಕಿಯೋ: ದ್ರಾಕ್ಷಿ ಹಣ್ಣಿನ ಬೆಲೆ ಎಷ್ಟಿರುತ್ತದೆ? ಅಂದಾಜು ಕೆಜಿಗೆ 100 ರೂಪಾಯಿ ಎಂದುಕೊಳ್ಳಬಹುದು. ಅದರಲ್ಲೂ ಸೀಸನ್ನಲ್ಲಿ ಬೆಲೆ ಸಾಕಷ್ಟು ಇಳಿಕೆಯಾಗುವುದೂ ಉಂಟು. ಆದರೆ ನಾವು ಈಗ ಹೇಳಲು ಹೊರಟಿರುವ ದ್ರಾಕ್ಷಿ ಅಷ್ಟು ಸುಲಭವಾಗಿ ಎಲ್ಲರಿಗೂ ಸಿಕ್ಕುವುದಲ್ಲ. ಅಂದ ಹಾಗೆ ಅದರ ಬೆಲೆಯೂ ಸಾಮಾನ್ಯರಿಗೆ ತೆರುವಂತದ್ದಲ್ಲ.
ಜಪಾನ್ನಲ್ಲಿ ಬೆಳೆಯಲಾಗುವ ರೂಬಿ ರೋಮನ್ ಗ್ರೇಪ್ ಅತ್ಯಂತ ಪ್ರಸಿದ್ಧ ದ್ರಾಕ್ಷಿ ತಳಿಯಲ್ಲಿ ಒಂದು. ಕೆಲ ವಿಶೇಷ ಕ್ರಮಗಳನ್ನು ಬೆಳೆಸಿಕೊಂಡು ಆ ದ್ರಾಕ್ಷಿಯನ್ನು ಬೆಳೆಸಲಾಗುತ್ತದೆಯಂತೆ. ಅಂದ ಹಾಗೆ ರೂಬಿ ರೋಮನ್ ದ್ರಾಕ್ಷಿಯ ಒಂದು ಹಣ್ಣಿಗೆ ಬರೋಬ್ಬರಿ 35 ಸಾವಿರ ರೂಪಾಯಿಯಂತೆ. ಇನ್ನು ಒಂದು ಗೊಂಚಲು ದ್ರಾಕ್ಷಿ ತೆಗೆದುಕೊಂಡು ತಿನ್ನುತ್ತೇವೆ ಎಂದರೆ ನೀವು ಲಕ್ಷಾಧೀಶ್ವರರೇ ಆಗಿರಬೇಕು.
ಈ ರೂಬಿ ರೋಮನ್ ದ್ರಾಕ್ಷಿ ಸಾಮಾನ್ಯ ದ್ರಾಕ್ಷಿ ಗಾತ್ರದಲ್ಲಿ ಬೆಳೆಯುವುದಿಲ್ಲ. ನೋಡುವುದಕ್ಕೆ ಒಂದು ಸಣ್ಣ ಟೆನಿಸ್ ಬಾಲ್ನಷ್ಟೇ ದೊಡ್ಡದಾಗಿ ಹಣ್ಣು ಬೆಳೆಯುತ್ತದೆಯಂತೆ. ಎಲ್ಲ ಹಣ್ಣುಗಳು ಒಂದೇ ಗಾತ್ರದಲ್ಲಿದ್ದು, ಅಚ್ಚ ಕೆಂಪು ಬಣ್ಣದಲ್ಲಿ ಕಾಣಿಸಿಕೊಳ್ಳುತ್ತದೆ. ಇತ್ತೀಚೆಗೆ ಭಾರತದ ಮಾವಿನ ಹಣ್ಣಿನ ತಳಿಯೊಂದರ ರೇಟ್ ಕೇಳಿ ತಲೆ ತಿರುಗಿದ್ದ ಜನರು ಇದೀಗ ಜಪಾನ್ನ ಈ ದ್ರಾಕ್ಷಿ ಬಗ್ಗೆ ಕೇಳಿ ಮತ್ತೊಮ್ಮೆ ಬಾಯಿ ಮೇಲೆ ಕೈ ಇಟ್ಟುಕೊಳ್ಳುತ್ತಿದ್ದಾರೆ. ಇದೇ ರೀತಿ ಬೇರೆ ಬೇರೆ ಸ್ಥಳಗಳಲ್ಲಿ ಕೆಲವು ವಿಶೇಷ ಹಣ್ಣುಗಳು ದುಬಾರಿ ಬೆಲೆಗೆ ಮಾರಾಟ ಆಗುತ್ತಿರುವುದು ಉಂಟು. (ಏಜೆನ್ಸೀಸ್)