ಕರ್ನಾಟಕ ಕುಡಿಯುವ ನೀರು ಮತ್ತು ನೈರ್ಮಲ್ಯ ಇಲಾಖೆಯ ಸಹಾಯಕ ಕಾರ್ಯಪಾಲಕ ಇಂಜಿನಿಯರ್ (ಎಇಇ) ಹುದ್ದೆಗೆ ಕರ್ನಾಟಕ ಲೋಕಸೇವಾ ಆಯೋಗ (ಕೆಪಿಎಸ್ಸಿ) ನಡೆಸಿದ ಪರೀಕ್ಷೆಯಲ್ಲಿ ಭಾರೀ ಅಕ್ರಮ ನಡೆಸಿ ಹುದ್ದೆಗೆ ನೇಮಿಸಿರುವುದು ತನಿಖಾ ವರದಿಯಲ್ಲಿಯೇ ಬಯಲಾಗಿದೆ.
ಕೆಪಿಎಸ್ಸಿಯು 2022ರ ಸೆ.3ರಂದು ಅಧಿಸೂಚನೆ ಹೊರಡಿಸಿ 2023ರ ಜು.2ರಂದು ಪರೀಕ್ಷೆ ನಡೆಸಿತ್ತು. ಬಳಿಕ ತಾತ್ಕಾಲಿಕ ಆಯ್ಕೆಪಟ್ಟಿ ಪ್ರಕಟಿಸಿ ಆಕ್ಷೇಪಣೆ ಸಲ್ಲಿಸಲು 17 ದಿನಗಳ ಕಾಲಾವಕಾಶ ನೀಡಿತ್ತು. ಬಳಿಕ ಅಂತಿಮ ಆಯ್ಕೆ ಪಟ್ಟಿ ಆಧಾರದಲ್ಲಿ ಆದೇಶ ಪ್ರತಿ ನೀಡಿದೆ. 73 ಎಇಇ ಹುದ್ದೆಯಲ್ಲಿ 10 ಅನರ್ಹರಿಗೆ ನೇಮಕಾತಿ ಅದೇಶ ನೀಡಲಾಗಿದೆ ಎಂದು ಉಪ ಸಮಿತಿಯು ವರದಿಯಲ್ಲಿ ಬಹಿರಂಗಗೊಳಿಸಿದೆ.
ಆಯೋಗದ ಸದಸ್ಯ ವಿಜಯಕುಮಾರ್ ಡಿ.ಕುಚನೂರೆ ನೇತೃತ್ವದಲ್ಲಿ ಇತರ 4 ಸದಸ್ಯರನ್ನು ಒಳಗೊಂಡ ಉಪ ಸಮಿತಿ ರಚಿಸಲಾಗಿತ್ತು. ಸಮಿತಿಯು ಕೈಗೊಂಡಿದ್ದ ಆಂತರಿಕ ತನಿಖಾ ವರದಿಯಲ್ಲಿ ಹೇಗೆಲ್ಲ ಅಕ್ರಮಗಳು ನಡೆದವು ಎಂಬ ಇಂಚಿಂಚೂ ಮಾಹಿತಿಯನ್ನು ದಾಖಲಿಸಲಾಗಿದೆ.
ಉಪ ಸಮಿತಿ ವರದಿಯನ್ನು ಸರ್ಕಾರಕ್ಕೆ ಕಳುಹಿಸಲಾಗಿದ್ದು, ಯಾವ ರೀತಿಯಲ್ಲಿ ತೀರ್ಮಾನ ಕೈಗೊಳ್ಳಲಿದೆ ಎಂಬುದನ್ನು ಕಾದು ನೋಡಬೇಕಿದೆ - ಶಿವಶಂಕರಪ್ಪ ಸಾಹುಕಾರ್
ಅಕ್ರಮಗಳು ಹೇಗೆಲ್ಲ ನಡೆದಿವೆ ಎಂಬುದನ್ನು ಕಲೆ ಹಾಕುವುದಕ್ಕಾಗಿ
ಸಮಿತಿಯು ಒಎಂಆರ್ ಶೀಟ್, ಉತ್ತರ ಪತ್ರಿಕೆಯ ಕಾರ್ಬನ್ ಪ್ರತಿ, ಕೈ ಬರವಣಿಗೆಯ ಎಫ್ಎಸ್ಎಲ್ ವರದಿ, ಪರೀಕ್ಷಾ ಕೇಂದ್ರದ ಸಿಸಿಟಿವಿ ದೃಶ್ಯಾವಳಿಗಳು, ಕೇಂದ್ರದೊಳಗೆ ಅಭ್ಯರ್ಥಿಗಳು ಎಷ್ಟು ಹೊತ್ತು ಬರವಣಿಗೆ ನಡೆಸಿದ್ದಾರೆ ಎಂಬ ಮಾಹಿತಿ ಆಧಾರದಲ್ಲಿ ಅಕ್ರಮ ನಡೆದಿರುವುದು ಸಾಬೀತಾಗಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಿದೆ.
ಅನರ್ಹರಿಗೂ ಹುದ್ದೆ ಕಲ್ಪಿಸಲಾಗಿದೆ ಎಂಬ ಆಕ್ಷೇಪಣೆಯನ್ನು ಅಭ್ಯರ್ಥಿಯೊಬ್ಬರು ದಾಖಲೆ ಸಹಿತವಾಗಿ ಸಲ್ಲಿಸಿದ್ದರು. ಇದರಲ್ಲಿ ಅಭ್ಯರ್ಥಿಗಳು ಪ್ರಾಧಿಕಾರ ನಡೆಸುವ ವಿವಿಧ ಪರೀಕ್ಷೆಯಲ್ಲಿ ಮತ್ತು ಕೆಪಿಎಸ್ಸಿ ಪರೀಕ್ಷೆಯಲ್ಲಿ ಪಡೆದಿರುವ ಅಂಕಗಳನ್ನು ಹೋಲಿಕೆ ಮಾಡಿ ಆಕ್ಷೇಪಣೆ ಪ್ರತಿಯನ್ನು ಕೆಪಿಎಸ್ಸಿ ಇ-ಮೇಲ್ ಜತೆಗೆ ಅಯೋಗದ ಅಧ್ಯಕ್ಷರು ಮತ್ತು 16 ಸದಸ್ಯರಿಗೂ ಕಳುಹಿಸಿಕೊಟ್ಟಿದ್ದರು. ಇದರ ಆಧಾರದಲ್ಲಿ ಆಯೋಗವು ಉಪ ಸಮಿತಿ ರಚಿಸಿತ್ತು. ಆ ಸಮಿತಿಯಲ್ಲಿನ ಇಬ್ಬರು ಸದಸ್ಯರು ಅಕ್ರಮ ನಡೆದಿದೆ ಎಂದು ವರದಿ ನೀಡಿದ್ದರು.
ಇನ್ನಿಬ್ಬರು ಮೌನ ವಹಿಸಿದ್ದರು. ವರದಿ ಕುರಿತು ಆಯೋಗದ ಸಭೆಯಲ್ಲಿ ಪರ ವಿರೋಧ ಅಭಿಪ್ರಾಯಗಳು ವ್ಯಕ್ತವಾಗಿದ್ದವು. ಬಳಿಕ 2023ರ ಅ.10 ರಂದು ನಡೆದಿದ್ದ ಸಭೆಯಲ್ಲಿ ಮತ್ತೊಂದು ಉಪ ಸಮಿತಿ ರಚಿಸಲು ತೀರ್ಮಾನಿಸಿ 2023ರ ಡಿ.8ರಂದು ರಚಿಸಲಾಗಿತ್ತು. ಈ ಸಮಿತಿಯು 2024ರ ಡಿಸೆಂಬರ್ನಲ್ಲಿ ವರದಿ ಸಲ್ಲಿಸಿದೆ. ವರದಿಯಲ್ಲಿ ಕನಿಷ್ಠ 10 ಅನರ್ಹರಿಗೆ ನೇಮಕಾತಿ ಆದೇಶ ನೀಡಲಾಗಿದೆ ಎಂದು ಉಲ್ಲೇಖಿಸಲಾಗಿದೆ.
ಉಪ ಸಮಿತಿಯು ಅಕ್ರಮಗಳನ್ನು ಪತ್ತೆ ಹಚ್ಚಲು ಸಾಕಷ್ಟು ಶ್ರಮ ಹಾಕಿತ್ತು. ಈ ಪೈಕಿ ಎಫ್ಎಸ್ಎಲ್ ಅಭ್ಯರ್ಥಿಯು ಪರೀಕ್ಷಾ ಕೇಂದ್ರದೊಳಗೆ ಎಷ್ಟು ಹೊತ್ತು ಬರವಣಿಗೆಯಲ್ಲಿ ತೊಡಗಿಸಿಕೊಂಡಿದ್ದ, ಎಷ್ಟು ಸಮಯ ಪ್ರಶ್ನೆಪತ್ರಿಕೆಯನ್ನು ಓದಿದ್ದ ಎಂಬ ಸಿಸಿಟಿವಿ ದೃಶ್ಯಗಳನ್ನು ಪರಿಶೀಲಿಸಲಾಗಿದೆ. ಅಭ್ಯರ್ಥಿಯು ಒಎಂಆರ್ ಶೀಟ್ನಲ್ಲಿ ಉತ್ತರ ಬರೆಯಲು ಎಂಸಿಕ್ಯು ಆಯ್ಕೆ ಮಾಡಿ ನಾಲ್ಕರಲ್ಲಿ ಒಂದರ ಬಾಕ್ಸ್ ಅನ್ನು ಬರೆಯಲು ಎಷ್ಟು ಸಮಯ ತೆಗೆದುಕೊಂಡಿದ್ದ ಮತ್ತು ಬರೆಯಲು ಎಷ್ಟು ಒತ್ತಡ ಹಾಕಿದ್ದರು ಎಂದು ತಿಳಿಯಲಾಗಿದೆ.
ಅಕ್ರಮವಾಗಿ ನೇಮಕವಾಗಿರುವ ಅಭ್ಯರ್ಥಿಗಳ ಒಎಂಆರ್ ತಿದ್ದಿರುವವರು ಎಷ್ಟು ಸಮಯ ತೆಗೆದುಕೊಂಡಿದ್ದಾರೆ ಎಂಬ ಹೋಲಿಕೆ ಮಾಡಲಾಗಿದೆ. ಇದರಲ್ಲಿ ಅಕ್ರಮ ನಡೆದಿರುವುದು ಸಾಬೀತಾಗಿದೆ. ಮೂಲ ಒಎಂಆರ್ನಲ್ಲಿ ಕೆಲವರು ನೀಲಿ ಶಾಯಿಯಲ್ಲಿ ಬರೆದಿದ್ದರೆ, ತಿದ್ದಿರುವ ಒಎಂಆರ್ನಲ್ಲಿ ಕಪ್ಪು ಶಾಯಿಯಲ್ಲಿ ಬರೆಯಲಾಗಿದೆ.