ವಾಷಿಂಗ್ಟನ್: ಕಳೆದೊಂದು ವರ್ಷದಿಂದ ಅಮೆರಿಕ ಹಾಗೂ ಇರಾನ್ ನಡುವೆ ಸಂಘರ್ಷ ಮುಂದುವರಿದಿದ್ದು, ಈ ಮಿಲಿಟರಿ ಸಂಘರ್ಷ ಸುಖಾಂತ್ಯ ಕಾಣುವ ಲಕ್ಷಣ ಕಾಣುತ್ತಿಲ್ಲ. ನಮ್ಮ ಅಧಿಕಾರಿಗಳ ಮೇಲೆ ಬೆದರಿಕೆ ಒಡ್ಡುವ ಪ್ರಯತ್ನ ಮಾಡಿದರೆ, ಇರಾನ್ ತನ್ನ ಅಸ್ಥಿತ್ವವನ್ನೇ ಕಳೆದುಕೊಳ್ಳಲಿದೆ ಎಂದು ಡೊನಾಲ್ಡ್ ಟ್ರಂಪ್ ಖಡಕ್ ಎಚ್ಚರಿಕೆ ನೀಡಿದ್ದಾರೆ.
ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಅವರಿಗೆ ಇರಾನ್ ಜೀವ ಬೆದರಿಕೆ ಒಡ್ಡಿದ ಹಿನ್ನಲೆ ಅವರನ್ನು ವಾಷಿಂಗ್ಟನ್ನಿಂದ ಮಿಲಿಟರಿ ಬೇಸ್ಗೆ ಸ್ಥಳಾಂತರಿಸಿದ ನಂತರ ಅಧ್ಯಕ್ಷರಿಂದ ಈ ಹೇಳಿಕೆ ಹೊರಬಂದಿದೆ.
ಇನ್ನೂ ಈ ಕುರಿತು ಖಾಸಗಿ ಚಾನೆಲ್ ಜತೆ ಮಾತನಾಡಿದ ಅಮೆರಿಕ ಅಧ್ಯಕ್ಷ, ನಾನು ಇನ್ನುವರೆಗೆ ಇರಾನ್ ಮೇಲೆ ಯುದ್ಧ ಆರಂಭಿಸಿಲ್ಲ, ನಾನು ಕೇವಲ ಮಿಲಿಟರಿ ಕಾರ್ಯಾಚರಣೆಯನ್ನಷ್ಟೇ ನಡೆಸಿದ್ದೇವೆ. ಹೀಗಾಗಿ ಅಮೆರಿಕ ಯುದ್ಧದಲ್ಲಿ ನಿರತವಾಗಿದೆ ಎಂದು ಹೇಳಬೇಡಿ.
ಒಂದು ವೇಳೆ ನಾವು ಇರಾನ್ ವಿರುದ್ಧ ಯುದ್ಧಕ್ಕಿಳಿದರೇ, ಕೇವಲ ಮೂರೇ ವಾರದಲ್ಲಿ ಟೆಹ್ರಾನ್ ನಮ್ಮ ವಶವಾಗುತ್ತದೆ ಎಂದು ಟ್ರಂಪ್ ಹೇಳಿದ್ದಾರೆ. ನಾನು ಸಂಘರ್ಷ ಆರಂಭವಾಗುವುದಕ್ಕಿಂತ, ಸಂಘರ್ಷ ಆರಂಭವಾದ ನಂತರ ಅತಿ ಹೆಚ್ಚು ತೈಲವನ್ನು ಇರಾನ್ನಿಂದ ಖರೀದಿಸಿದ್ದೇವೆ. ಕೆಳೆದ ಐದು ತಿಂಗಳಿನಲ್ಲಿ ಒಂದೇ ಒಂದು ಸಾವು ಸಂಭವಿಸಿಲ್ಲವೆಂದು ಹೇಳಿದ್ದಾರೆ.
ಕೆಲವು ಜಾಗತಿಕ ಮಾಧ್ಯಮಗಳು ವರದಿ ಮಾಡಿದಂತೆ, ಇಸ್ರೇಲ್ನಲ್ಲಿ ಅಧಿಕಾರ ಕಳೆದುಕೊಳ್ಳುವ ಹಂತದಲ್ಲಿರುವ ಪ್ರಧಾನಿ ಬೆಂಜಾಮಿನ್ ನೆತನ್ಯಾಹು, ಡೊನಾಲ್ಡ್ ಟ್ರಂಪ್ಗೆ ಇರಾನ್ ಮೇಲೆ ವೈಮಾನಿಕ ದಾಳಿ ಮುಂದುವರಿಸುವಂತೆ ಕೇಳಿಕೊಂಡಿದ್ದಾರೆ ಎನ್ನಲಾಗಿದೆ.
ಆದರೆ, ಮಧ್ಯಂತರ ಚುನಾವಣೆಯಲ್ಲಿ ಸೋಲನ್ನು ಕಂಡಿರುವ ಟ್ರಂಪ್ಗೆ. ನೂತನ ಡೆಮೊಕ್ರಟಿಕ್ ಸಚಿವರು ಬೆಂಬಲ ನೀಡುತ್ತಿಲ್ಲ ಹಾಗೂ ಇರಾನ್ ಮೇಲೆ ಮಿಲಿಟರಿ ಕಾರ್ಯಾಚರಣೆಯನ್ನು ಕಡಿತಗೊಳಿಸುವಂತೆ ಒತ್ತಾಯ ಹೇರುತ್ತಿದ್ದಾಗಿ ತಿಳಿದುಬಂದಿದೆ.
ಇನ್ನು ಇರಾನ್, ತಮ್ಮ ನ್ಯೂಕ್ಲಿಯರ್ ಪ್ರಯೋಗವು ತಮ್ಮ ದೇಶದ ಜನರ ರಕ್ಷಣೆಗಾಗಿ ನಡೆಸುತ್ತೇವೆ ಹೊರತು, ಬಾಂಬ್ಗಳನ್ನು ತಯಾರಿಸಿ, ಇತರ ದೇಶಗಳನ್ನು ಬೆದರಿಸಲಲ್ಲ ಎಂದು ತಿಳಿಸಿದೆ. ಆದರೆ, ಅರಬ್ ದೇಶಗಳಾದ, ಯುಎಇ, ಕುವೇತ್, ಬಹ್ರೇನ್ ಹಾಗೂ ಸೌದಿ ಅರೇಬಿಯಾ ದೇಶಗಳು ಇರಾನ್ ಪರಮಾಣು ಅಸ್ತ್ರವನ್ನು ಹೊಂದಬಾರದೆಂದು ತಾಕೀತು ಮಾಡಿದೆ.
ಇನ್ನು, ಅಮೆರಿಕ ತಾವು ಈಗಾಗಲೇ ತಿಳಿಸಿರುವ ಏಳು ಷರತ್ತುಗಳನ್ನು ಒಪ್ಪಿಕೊಂಡರೆ ಮಾತ್ರ ಶಾಂತಿ ಮಾತುಕತೆಗೆ ಸಿದ್ಧವೆಂದು ಇರಾನ್ ತಿಳಿಸಿದ್ದು, ಈ ಬಗ್ಗೆ ಅಮೆರಿಕ ಇನ್ನು ಯಾವುದೇ ಹೇಳಿಕೆ ನೀಡಿಲ್ಲ. ಇನ್ನೂ ಈ ಅಮೆರಿಕ - ಇರಾನ್ ನಡುವಿನ ಸಂಘರ್ಷ ಎಲ್ಲಿಗೆ ಬಂದು ನಿಲ್ಲಲಿದೆ ಎಂದು ಜಗತ್ತು ಕಾತುರದಿಂದ ಕಾಯುತ್ತಿರುವುದಂತೂ ನಿಜವಾಗಿದೆ, (ಏಜೆನ್ಸೀಸ್).