ಕೋರ್ಟ್ನಲ್ಲಿ ಒಂದು ತಿಂಗಳ ಮಗುವನ್ನು ಮೊದಲ ಬಾರಿಗೆ ಮುದ್ದಾಡಿದ ಕೈದಿ
Viral Video Fact Check: ಹಳೆಯದೊಂದು ಭಾವುಕ ವಿಡಿಯೋ ಇದೀಗ ಮತ್ತೆ ವೈರಲ್ ಆಗಿದೆ. ‘ಜೈಲರ್ ಮಾನವೀಯತೆ ಮೆರೆದ’ ಎಂದು ವಿಡಿಯೋ ಹಂಚಿಕೊಳ್ಳಲಾಗುತ್ತಿದ್ದು, ಕೈದಿಯ ಮಗುವನ್ನು ಆತನಿಗೆ ನೀಡಿದ ದೃಶ್ಯ ಎನ್ನಲಾಗಿದೆ. ಆದರೆ ಈ ಹೇಳಿಕೆ ತಪ್ಪಾಗಿದೆ.
ಅಸಲಿಗೆ ನಡೆದಿದ್ದೇನು?
ಈ ಘಟನೆ 2016ರ ಆಗಸ್ಟ್ 5ರಂದು ಅಮೆರಿಕದ ಕೆಂಟುಕಿಯ ಲೂಯಿಸ್‌ವಿಲ್ಲೆ ನ್ಯಾಯಾಲಯದಲ್ಲಿ ನಡೆದಿತ್ತು. ಕಳ್ಳತನದ ಆರೋಪದಲ್ಲಿ ಜೈಲಿನಲ್ಲಿದ್ದ ಜೇಮ್ಸ್ ರೋಡರ್ ಅವರ ಪತ್ನಿ ಆಶ್ಲೇ ಮಗುವಿಗೆ ಜನ್ಮ ನೀಡಿದ್ದರು. ಒಂದು ತಿಂಗಳಾಗಿದ್ದರೂ ಜೇಮ್ಸ್ ಮಗುವನ್ನು ನೋಡಿರಲಿಲ್ಲ.
ವಿಚಾರಣೆಯ ದಿನ ಆಶ್ಲೇ ಮಗುವನ್ನು ಕೋರ್ಟ್‌ಗೆ ಕರೆತಂದಿದ್ದರು. ಈ ವಿಚಾರ ತಿಳಿದ ಜೆಫರ್ಸನ್ ಕೌಂಟಿ ಜಿಲ್ಲಾ ನ್ಯಾಯಾಲಯದ ನ್ಯಾಯಾಧೀಶೆ ಅಂಬರ್ ವುಲ್ಫ್, ಜೇಮ್ಸ್‌ಗೆ ಮಗುವನ್ನು ಮೊದಲ ಬಾರಿಗೆ ನೋಡಲು ಹಾಗೂ ಮುದ್ದಾಡಲು ಅವಕಾಶ ನೀಡಿದ್ದರು.
‘ನೋ-ಕಾಂಟ್ಯಾಕ್ಟ್ ಆರ್ಡರ್’ ಇದ್ದರೂ ಅವಕಾಶ
ಜೇಮ್ಸ್ ಮತ್ತು ಆಶ್ಲೇ ಒಂದೇ ಕಳ್ಳತನ ಪ್ರಕರಣದ ಆರೋಪಿಗಳಾಗಿದ್ದರಿಂದ, ಇಬ್ಬರೂ ಪರಸ್ಪರ ಸಂಪರ್ಕಿಸದಂತೆ ‘ನೋ-ಕಾಂಟ್ಯಾಕ್ಟ್ ಆರ್ಡರ್’ ಜಾರಿಯಲ್ಲಿತ್ತು. ಆದರೆ ತಂದೆ ಮೊದಲ ಬಾರಿಗೆ ಮಗುವನ್ನು ಭೇಟಿಯಾಗುವ ಸಂದರ್ಭವನ್ನು ಪರಿಗಣಿಸಿದ ನ್ಯಾಯಾಧೀಶರು, ಆ ಕ್ಷಣಕ್ಕೆ ಅವಕಾಶ ನೀಡಿದ್ದರು.
ತಂದೆ ತನ್ನ ಒಂದು ತಿಂಗಳ ಮಗುವನ್ನು ಎತ್ತಿಕೊಂಡು ಮುದ್ದಾಡಿದ ಭಾವುಕ ಕ್ಷಣ ಕ್ಯಾಮೆರಾದಲ್ಲಿ ಸೆರೆಯಾಗಿತ್ತು. ಬಳಿಕ ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು.
ಜೈಲರ್ ಅಲ್ಲ, ನ್ಯಾಯಾಧೀಶರು
ವೈರಲ್ ವಿಡಿಯೋದಲ್ಲಿರುವುದು ಜೈಲರ್‌ನ ಮಾನವೀಯ ನಡೆ ಅಲ್ಲ. ಕೈದಿ ತಂದೆ ತನ್ನ ಮಗುವನ್ನು ಮೊದಲ ಬಾರಿಗೆ ಭೇಟಿಯಾಗಲು ಅವಕಾಶ ನೀಡಿದ್ದು ನ್ಯಾಯಾಧೀಶೆ ಅಂಬರ್ ವುಲ್ಫ್. ಇದೇ ಈ ವೈರಲ್ ಘಟನೆಯ ಅಸಲಿ ಸತ್ಯ.