Death Experiences : ಸಾವಿನ ಅಂಚಿಗೆ ಹೋಗಿ ಕೆಲವರು ಮರಳಿ ಬಂದಿದ್ದಾರೆ ಎಂದರೆ ನಂಬಲು ಸಾಧ್ಯವೇ? ಈ ರೀತಿಯ ಘಟನೆಗಳು ನಡೆಯುತ್ತವೆಯೇ? ಹೌದು ಇದರ ಬಗ್ಗೆ ಸಂಶೋಧನೆ ನಡೆಸಿದಾಗ ಅಚ್ಚರಿಯ ಸಂಗತಿಯೊಂದು ತಿಳಿದುಬಂದಿದೆ. ಸಾವಿನ ಅಂಚಿಗೆ ಹೋಗಿ ಪವಾಡಸದೃಶವಾಗಿ ಮರಳಿದವರು ಹಂಚಿಕೊಳ್ಳುವ ಕಥೆಗಳಲ್ಲಿ ಒಂದು ಮಾಯಾ ಪ್ರಪಂಚವೇ ತೆರೆದುಕೊಳ್ಳುತ್ತದೆ. ಕತ್ತಲೆಯ ಸುದೀರ್ಘ ಸುರಂಗ, ಅದರ ಕೊನೆಯಲ್ಲಿ ಕಣ್ಣು ಕೋರೈಸುವ ದಿವ್ಯ ಬೆಳಕು, ಆಕಾಶದಂತೆ ಹರಡಿದ ವಿಶಾಲ ರೇಖೆಗಳು ಹಾಗೂ ಮತ್ತೊಂದು ಲೋಕಕ್ಕೆ ಕಾಲಿಟ್ಟಂತಹ ಅತೀತ ಅನುಭವ, ಇವೆಲ್ಲವೂ ಕೇವಲ ಕಾಲ್ಪನಿಕ ಭ್ರಮೆಗಳೇ... ಖಂಡಿತ ಇಲ್ಲ. ಇಂತಹ ಅತ್ಯಾಶ್ಚರ್ಯಕರ ಅನುಭವಗಳ ಹಿಂದೆ ಅಡಗಿರುವ ಮಹತ್ವದ ರಹಸ್ಯವೊಂದನ್ನು ವಿಜ್ಞಾನಿಗಳು ಈಗ ಭೇದಿಸಿದ್ದಾರೆ. ಸಾವಿನಂಚಿನಲ್ಲಿ ಮೆದುಳು ಕಾಣುವ ಆ ವಿಚಿತ್ರ ಆಕಾರಗಳು ಮತ್ತು ಬಣ್ಣಗಳ ನಡುವೆ ಅತ್ಯಂತ ನಿಗೂಢವಾದ, ಕುತೂಹಲಕಾರಿ ನಂಟಿದೆ ಎಂಬುದನ್ನು ಹೊಸ ಸಂಶೋಧನೆಯೊಂದು ಜಗತ್ತಿನ ಮುಂದೆ ತೆರೆದಿಟ್ಟಿದೆ.
ಸಾವಿನ ಸಮೀಪದ ಅನುಭವಗಳನ್ನು ವೈಜ್ಞಾನಿಕವಾಗಿ ಅಧ್ಯಯನ ಮಾಡುವುದು ಸುಲಭದ ಕೆಲಸವಲ್ಲ. ಇಂತಹ ಅನುಭವಗಳನ್ನು ಹೊಂದಿದವರು ತಾವು ಕಂಡಿದ್ದನ್ನು ವಿವರಿಸಲು ಕೆಲವೊಮ್ಮೆ ಪದಗಳೇ ಸಾಲುವುದಿಲ್ಲ ಎಂದು ಹೇಳುತ್ತಾರೆ. ಭಾವನಾತ್ಮಕ, ವೈಯಕ್ತಿಕ ಹಾಗೂ ಆಧ್ಯಾತ್ಮಿಕ ಆಯಾಮಗಳನ್ನು ಒಳಗೊಂಡಿರುವ ಈ ಅನುಭವಗಳನ್ನು ಸಾಮಾನ್ಯ ಪ್ರಶ್ನಾವಳಿಗಳ ಮೂಲಕ ಸಂಪೂರ್ಣವಾಗಿ ಅರ್ಥಮಾಡಿಕೊಳ್ಳುವುದು ಕಷ್ಟ.
ಈ ಹಿನ್ನೆಲೆಯಲ್ಲಿ ಸಂಶೋಧಕರು 50 ಜನರನ್ನು ಅಧ್ಯಯನಕ್ಕೆ ಒಳಪಡಿಸಿದರು. ಸಾವಿನ ಅಂಚಿನಲ್ಲಿದ್ದಾಗ ತಾವು ಕಂಡಿದ್ದ ಸ್ಥಳಗಳು ಮತ್ತು ದೃಶ್ಯಗಳನ್ನು ಚಿತ್ರಗಳ ರೂಪದಲ್ಲಿ ನಕ್ಷೆ ಬಿಡಿಸುವಂತೆ ಅವರಿಗೆ ಕೇಳಲಾಯಿತು. ಈ ಚಿತ್ರಗಳನ್ನು ಪರಿಶೀಲಿಸಿದಾಗ, ವ್ಯಕ್ತಿಗಳು ನೆನಪಿಸಿಕೊಂಡ ಸ್ಥಳಗಳ ಜ್ಯಾಮಿತೀಯ ಆಕಾರಗಳು ಮತ್ತು ಅವರು ವಿವರಿಸಿದ ಬಣ್ಣಗಳ ನಡುವೆ ಒಂದು ಕುತೂಹಲಕಾರಿ ಮಾದರಿ ಕಂಡುಬಂದಿದೆ.
ಸಾವಿನ ಸಮೀಪದ ಅನುಭವ ಎಂದಾಕ್ಷಣ ಕತ್ತಲೆಯ ಸುರಂಗದ ಕೊನೆಯಲ್ಲಿ ಕಾಣಿಸುವ ಬೆಳಕಿನ ಚಿತ್ರಣವೇ ಬಹುತೇಕರ ಮನಸ್ಸಿಗೆ ಬರುತ್ತದೆ. ಆದರೆ ಅಧ್ಯಯನದಲ್ಲಿ ಭಾಗವಹಿಸಿದ ಎಲ್ಲರೂ ಇಂತಹ ಅನುಭವವನ್ನೇ ವಿವರಿಸಿಲ್ಲ. ಕೆಲವರು ವಿಶಾಲವಾದ ಬೆಳಕಿನ ವಾತಾವರಣವನ್ನು ಕಂಡಿದ್ದಾಗಿ ಹೇಳಿದರೆ, ಇನ್ನೂ ಕೆಲವರು ಬಾಗಿದ ಗಡಿಗಳು, ವಿಭಿನ್ನ ಆಕಾರಗಳು ಮತ್ತು ತಮ್ಮನ್ನು ಸುತ್ತುವರಿದಿದ್ದ ಬೆಳಕಿನ ಅನುಭವವನ್ನು ನೆನಪಿಸಿಕೊಂಡಿದ್ದಾರೆ. ಈ ವಿಭಿನ್ನ ಅನುಭವಗಳಲ್ಲಿಯೂ ಆಕಾರ ಮತ್ತು ಬಣ್ಣಗಳ ನಡುವೆ ಕೆಲವು ಸಾಮಾನ್ಯ ಮಾದರಿಗಳಿರುವುದನ್ನು ಸಂಶೋಧಕರು ಗಮನಿಸಿದ್ದಾರೆ. ಇದರಿಂದ ಇಂತಹ ಅನುಭವಗಳು ಹೊರನೋಟಕ್ಕೆ ಅನಿರೀಕ್ಷಿತವಾಗಿ ಕಂಡರೂ, ಅವುಗಳ ನೆನಪಿನಲ್ಲಿ ಕೆಲವು ನಿರ್ದಿಷ್ಟ ವಿನ್ಯಾಸಗಳು ಇರಬಹುದು ಎಂಬ ಸಾಧ್ಯತೆ ವ್ಯಕ್ತವಾಗಿದೆ.
ಈ ಅನುಭವಗಳಲ್ಲಿ ಕಾಣಿಸಿಕೊಳ್ಳುವ ವಿಶಾಲವಾದ, ಬೆಳಕಿನಿಂದ ಆವೃತವಾದ ದೃಶ್ಯಗಳು ಗ್ಯಾನ್ಸ್‌ಫೆಲ್ಡ್ ಪರಿಣಾಮ ಎಂಬ ಗ್ರಹಿಕೆಯ ವಿದ್ಯಮಾನದೊಂದಿಗೆ ಕೆಲವು ಸಾಮ್ಯತೆಗಳನ್ನು ಹೊಂದಿವೆ ಎಂದು ಸಂಶೋಧಕರು ಚರ್ಚಿಸಿದ್ದಾರೆ. ಬದಲಾಗದ, ಏಕರೂಪದ ದೃಶ್ಯ ವಾತಾವರಣದಲ್ಲಿ ಕೆಲವರಿಗೆ ವಿಭಿನ್ನ ದೃಶ್ಯ ಗ್ರಹಿಕೆಗಳು ಅಥವಾ ಭ್ರಮಾತ್ಮಕ ಅನುಭವಗಳು ಉಂಟಾಗಬಹುದು. ಆದರೆ ಈ ಸಾಮ್ಯತೆಯೊಂದರಿಂದಲೇ ಸಾವಿನ ಸಮೀಪದ ಅನುಭವಗಳಿಗೆ ಇದೇ ಕಾರಣ ಎಂದು ನಿರ್ಧರಿಸಲು ಸಾಧ್ಯವಿಲ್ಲ. ಈ ಅಧ್ಯಯನದ ಉದ್ದೇಶ ಇಂತಹ ಅನುಭವಗಳಿಗೆ ಕಾರಣವೇನು ಎಂಬುದನ್ನು ಸಾಬೀತುಪಡಿಸುವುದಲ್ಲ. ಬದಲಾಗಿ, ಜನರು ನೆನಪಿಸಿಕೊಳ್ಳುವ ಸ್ಥಳಗಳು, ಆಕಾರಗಳು ಮತ್ತು ಬಣ್ಣಗಳನ್ನು ದಾಖಲಿಸಿ ಅವುಗಳ ನಡುವಿನ ಸಾಮ್ಯತೆಗಳನ್ನು ಗುರುತಿಸುವುದಾಗಿದೆ. ಇಂತಹ ಅನುಭವಗಳ ಹಿಂದಿನ ಮೆದುಳಿನ ಕಾರ್ಯವಿಧಾನಗಳ ಕುರಿತು ಮುಂದಿನ ಸಂಶೋಧನೆಗೆ ಇದು ಹೊಸ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ.
ಈ ಸಂಶೋಧನೆಯಲ್ಲಿ ಕೇವಲ 50 ಜನರು ಭಾಗವಹಿಸಿರುವುದರಿಂದ ಫಲಿತಾಂಶಗಳನ್ನು ಎಲ್ಲರ ಅನುಭವಗಳಿಗೂ ಅನ್ವಯಿಸಲು ಸಾಧ್ಯವಿಲ್ಲ. ಅಲ್ಲದೆ, ಕೆಲವರು ಹಲವು ವರ್ಷಗಳ ಹಿಂದೆ ಅನುಭವಿಸಿದ ಘಟನೆಗಳನ್ನು ನೆನಪಿಸಿಕೊಂಡು ಚಿತ್ರಗಳನ್ನು ರಚಿಸಿದ್ದಾರೆ. ಹಳೆಯ ನೆನಪುಗಳು ಕಾಲಕ್ರಮೇಣ ಬದಲಾಗಿರುವ ಸಾಧ್ಯತೆಯೂ ಇದೆ. ಇನ್ನೊಂದು ಪ್ರಮುಖ ಅಂಶವೆಂದರೆ, ಸಂಶೋಧಕರು ಭಾಗವಹಿಸಿದವರಿಗೆ ಕೆಲವು ನಿರ್ದಿಷ್ಟ ಜ್ಯಾಮಿತೀಯ ಆಕಾರಗಳ ಆಯ್ಕೆಗಳನ್ನು ನೀಡಿದ್ದರು. ಇದರಿಂದ ಅವರು ತಮ್ಮ ಅನುಭವಗಳನ್ನು ನೆನಪಿಸಿಕೊಂಡು ಚಿತ್ರಿಸುವ ವಿಧಾನದಲ್ಲಿ ಪ್ರಭಾವ ಉಂಟಾಗಿರುವ ಸಾಧ್ಯತೆಯಿದೆ. ಅಧ್ಯಯನದಲ್ಲಿ ಇತರ ರೀತಿಯ ಅಸಾಮಾನ್ಯ ಅನುಭವಗಳನ್ನು ಹೊಂದಿದವರ ಹೋಲಿಕೆ ಗುಂಪೂ ಇರಲಿಲ್ಲ. ಹೀಗಾಗಿ ಕಂಡುಬಂದ ಆಕಾರಗಳ ಮಾದರಿಗಳು ಸಾವಿನ ಸಮೀಪದ ಅನುಭವಗಳಿಗೆ ಮಾತ್ರ ವಿಶಿಷ್ಟವೇ ಎಂಬುದನ್ನು ಖಚಿತಪಡಿಸಲು ಸಾಧ್ಯವಾಗಿಲ್ಲ.
ಸಾವಿನ ಅಂಚಿನ ಅನುಭವಗಳನ್ನು ಅರ್ಥಮಾಡಿಕೊಳ್ಳಲು ಕೇವಲ ಪ್ರಶ್ನೆಗಳನ್ನು ಕೇಳುವುದಷ್ಟೇ ಸಾಕಾಗುವುದಿಲ್ಲ ವ್ಯಕ್ತಿಗಳು ನೆನಪಿಸಿಕೊಳ್ಳುವ ದೃಶ್ಯಗಳು, ಸ್ಥಳಗಳು, ಬಣ್ಣಗಳು ಮತ್ತು ಆಕಾರಗಳನ್ನೂ ದಾಖಲಿಸುವುದು ಅಗತ್ಯ ಎಂಬುದನ್ನು ಈ ಅಧ್ಯಯನ ಸೂಚಿಸುತ್ತದೆ. ಆದರೆ ಈ ಅನುಭವಗಳ ನಿಜವಾದ ಕಾರಣವೇನು ಎಂಬ ಪ್ರಶ್ನೆಗೆ ಇನ್ನೂ ಸ್ಪಷ್ಟ ಉತ್ತರ ಸಿಕ್ಕಿಲ್ಲ, (ಏಜೆನ್ಸೀಸ್).