ಭಾರತದಲ್ಲಿ ನವಿಲು ಇದ್ದರೆ, ಪಾಕಿಸ್ತಾನದ ಹೆಮ್ಮೆ ಚುಕಾರ್ ಪಾರ್ಟ್ರಿಡ್ಜ್.
ಇಸ್ಲಾಮಾಬಾದ್: ಪ್ರತಿಯೊಂದು ದೇಶವೂ ತನ್ನ ಸಂಸ್ಕೃತಿ, ಭೌಗೋಳಿಕತೆ ಮತ್ತು ನಂಬಿಕೆಗಳನ್ನು ಪ್ರತಿಬಿಂಬಿಸುವ ಒಂದು ಪಕ್ಷಿಯನ್ನು ರಾಷ್ಟ್ರೀಯ ಸಂಕೇತವಾಗಿ ಆಯ್ಕೆ ಮಾಡಿಕೊಳ್ಳುತ್ತದೆ. ಭಾರತಕ್ಕೆ ನವಿಲು ಸೌಂದರ್ಯದ ಸಂಕೇತವಾದರೆ, ಪಾಕಿಸ್ತಾನಕ್ಕೆ ಚಕೋರ್ (Chukar Partridge) ಹೆಮ್ಮೆಯ ಸಂಕೇತವಾಗಿದೆ.
ಚಕೋರ್..?
ಚಕೋರ್ ಅಥವಾ ಚುಕುರ್ ಎನ್ನುವುದು ಗೌಜಲ ಹಕ್ಕಿಯ ಜಾತಿಗೆ ಸೇರಿದ ಒಂದು ಮಧ್ಯಮ ಗಾತ್ರದ ಪಕ್ಷಿಯಾಗಿದೆ. ಇದು ಹೆಚ್ಚಾಗಿ ಪಾಕಿಸ್ತಾನದ ಗುಡ್ಡಗಾಡು ಪ್ರದೇಶಗಳಾದ ಖೈಬರ್ ಪಖ್ತುಂಖ್ವಾ, ಗಿಲ್ಗಿಟ್-ಬಾಲ್ಟಿಸ್ತಾನ್ ಮತ್ತು ಬಲೂಚಿಸ್ತಾನದ ಕಲ್ಲಿನ ಬೆಟ್ಟಗಳಲ್ಲಿ ಕಂಡುಬರುತ್ತದೆ. ಇದರ ಕೆಂಪು ಬಣ್ಣದ ಕಾಲುಗಳು ಮತ್ತು ಕೊಕ್ಕು ನೋಡುಗರನ್ನು ಸೆಳೆಯುತ್ತವೆ.
ಚಂದ್ರನ ಮೇಲಿನ 'ಅಚಲ ಪ್ರೇಮ'!
ಚಕೋರ್ ಪಕ್ಷಿಯ ಬಗ್ಗೆ ಏಷ್ಯಾದ ಸಂಸ್ಕೃತಿ ಮತ್ತು ಸಾಹಿತ್ಯದಲ್ಲಿ ಒಂದು ವಿಶೇಷವಾದ ನಂಬಿಕೆಯಿದೆ. ಇದನ್ನು 'ಚಂದ್ರನ ಪ್ರೇಮಿ' ಎಂದು ಕರೆಯಲಾಗುತ್ತದೆ. ಪುರಾಣಗಳ ಪ್ರಕಾರ, ಈ ಪಕ್ಷಿಯು ಚಂದ್ರನನ್ನು ಅಪಾರವಾಗಿ ಪ್ರೀತಿಸುತ್ತದೆ ಮತ್ತು ರಾತ್ರಿಯಿಡೀ ರೆಪ್ಪೆ ಮುಚ್ಚದೆ ಚಂದ್ರನನ್ನೇ ದಿಟ್ಟಿಸಿ ನೋಡುತ್ತಾ ಕುಳಿತಿರುತ್ತದೆ ಎಂದು ಹೇಳಲಾಗುತ್ತದೆ. ಸೂಫಿ ಕವಿತೆಗಳಲ್ಲಿ ಈ ಪಕ್ಷಿಯನ್ನು ನಿಷ್ಠಾವಂತ ಪ್ರೇಮಕ್ಕೆ ಉದಾಹರಣೆಯಾಗಿ ಬಳಸಲಾಗುತ್ತದೆ.
ಧೈರ್ಯ ಮತ್ತು ಛಲದ ಸಂಕೇತ
ಕೇವಲ ಸೌಂದರ್ಯ ಮತ್ತು ಪ್ರೇಮಕ್ಕಷ್ಟೇ ಅಲ್ಲದೆ, ಚಕೋರ್ ತನ್ನ ಛಲಕ್ಕೂ ಹೆಸರುವಾಸಿಯಾಗಿದೆ. ಅತ್ಯಂತ ಕಠಿಣವಾದ ಬೆಟ್ಟದ ಹಾದಿಗಳಲ್ಲಿ ಸಲೀಸಾಗಿ ಓಡುವ ಮತ್ತು ಹಾರುವ ಸಾಮರ್ಥ್ಯ ಇದಕ್ಕೆ ಇದೆ. ಇದೇ ಕಾರಣಕ್ಕೆ 1985ರಲ್ಲಿ ಪಾಕಿಸ್ತಾನವು ಇದನ್ನು ತನ್ನ ರಾಷ್ಟ್ರೀಯ ಪಕ್ಷಿಯನ್ನಾಗಿ ಘೋಷಿಸಿತು. ಇದು ಪಾಕಿಸ್ತಾನದ ಜನರ ಪರಿಶ್ರಮ ಮತ್ತು ಛಲವನ್ನು ಪ್ರತಿನಿಧಿಸುತ್ತದೆ ಎಂದು ನಂಬಲಾಗಿದೆ,(ಏಜೆನ್ಸೀಸ್).