ಕಠುವಾದಲ್ಲಿ ಐಎಸ್‌ಐ ಹನಿಟ್ರ್ಯಾಪ್ ಜಾಲ ಬಯಲು
- ಕಠುವಾದಲ್ಲಿ 24 ವರ್ಷದ ಟ್ರಕ್ ಚಾಲಕ ಅಮನ್ ಬಂಧನ
- ಪಾಕಿಸ್ತಾನದ ಐಎಸ್‌ಐ ಹ್ಯಾಂಡ್ಲರ್‌ಗಳ ಸಂಪರ್ಕದಲ್ಲಿದ್ದ ಆರೋಪ
- ಸಾಮಾಜಿಕ ಜಾಲತಾಣದ ಮೂಲಕ ಹನಿಟ್ರ್ಯಾಪ್‌ಗೆ ಸಿಲುಕಿದ್ದ ಚಾಲಕ
Kathua ISI Honeytrap: ಜಮ್ಮು-ಕಾಶ್ಮೀರದಲ್ಲಿ ಪಾಕಿಸ್ತಾನದ ಐಎಸ್‌ಐ ಹನಿಟ್ರ್ಯಾಪ್ ಜಾಲ ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಟ್ರಕ್ ಚಾಲಕ ಅಮನ್‌ನ್ನು ಬಂಧಿಸಲಾಗಿದ್ದು, ಸಾಮಾಜಿಕ ಜಾಲತಾಣದ ಮೂಲಕ ಸಂಪರ್ಕಿಸಿ ಸೂಕ್ಷ್ಮ ಮಾಹಿತಿ ಸಂಗ್ರಹಿಸಲು ಬಳಸಿಕೊಂಡ ಆರೋಪ ಕೇಳಿಬಂದಿದೆ.
ಪೊಲೀಸರ ಪ್ರಕಾರ, ಅಮನ್ ತನ್ನ ಮನೆಯ ಹೊರಗೆ ಸಿಮ್‌ ಮೂಲಕ ಕಾರ್ಯನಿರ್ವಹಿಸುವ ಸಿಸಿಟಿವಿ ಕ್ಯಾಮೆರಾ ಅಳವಡಿಸಿದ್ದ. ಭದ್ರತಾ ಪಡೆಗಳ ಸಂಚಾರದ ರಸ್ತೆಯನ್ನು ಕ್ಯಾಮೆರಾ ಸೆರೆಹಿಡಿಯುವಂತೆ ಇರಿಸಲಾಗಿದ್ದು, ದೃಶ್ಯಗಳನ್ನು ಪಾಕಿಸ್ತಾನದ ಹ್ಯಾಂಡ್ಲರ್‌ಗಳಿಗೆ ಲೈವ್ ಕಳುಹಿಸಲಾಗುತ್ತಿತ್ತು ಎನ್ನಲಾಗಿದೆ.
ಕ್ಯಾಮೆರಾ ಅಳವಡಿಕೆಗೆ 20,000 ರೂ. ಪಾವತಿಸಲಾಗಿದ್ದು, ಹಣ ದುಬೈ ಮೂಲದ ಚಾನೆಲ್ ಮೂಲಕ ಬಂದಿತ್ತು ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಮನ್‌ನ ಮೊಬೈಲ್ ಫೋನ್ ವಶಕ್ಕೆ ಪಡೆಯಲಾಗಿದ್ದು, ಫೊರೆನ್ಸಿಕ್ ವಿಶ್ಲೇಷಣೆ ನಡೆಯುತ್ತಿದೆ.
ಈ ಪ್ರಕರಣದೊಂದಿಗೆ ಜಮ್ಮು ಪ್ರದೇಶದಲ್ಲಿ ಕಳೆದ ನಾಲ್ಕು ತಿಂಗಳಲ್ಲಿ ಇಂತಹ ಎರಡನೇ ಐಎಸ್‌ಐ ಜಾಲ ಪತ್ತೆಯಾದಂತಾಗಿದೆ. ಮೇ ತಿಂಗಳಲ್ಲಿ ಕರಣ್ ಕುಮಾರ್ ಎಂಬಾತನನ್ನೂ ಇದೇ ರೀತಿಯ ಆರೋಪದಲ್ಲಿ ಬಂಧಿಸಲಾಗಿತ್ತು ಎಂದು ವರದಿಯಾಗಿದೆ.(ಏಜೆನ್ಸೀಸ್)