ಸಮುದ್ರ ದರೋಡೆ ನಿಲ್ಲಿಸದಿದ್ದರೆ ಸರ್ವನಾಶ ನಿಶ್ಚಿತ!; ಅಮೆರಿಕ-ಇಸ್ರೇಲ್‌ಗೆ ಇರಾನ್ ಅಂತಿಮ ಎಚ್ಚರಿಕೆ | Middle East Crisis

ಕಳೆದ ಕೆಲವು ದಿನಗಳಿಂದ ಇರಾನಿನ ಬಂದರುಗಳ ಮೇಲೆ ಅಮೆರಿಕ ವಿಧಿಸಿರುವ ನೌಕಾ ದಿಗ್ಬಂಧನವು ಈ ಹೊಸ ಸಂಘರ್ಷಕ್ಕೆ ಪ್ರಮುಖ ಕಾರಣವಾಗಿದ್ದು, ಏಪ್ರಿಲ್ 24 ರಂದು ಇರಾನಿನ ಹಡಗೊಂದನ್ನು ಅಮೆರಿಕದ ಯುದ್ಧನೌಕೆ ಯುಎಸ್ಎಸ್ ರಾಫೆಲ್ ಪೆರಾಲ್ಟಾ ತಡೆಹಿಡಿದ ಘಟನೆಯನ್ನು ಇರಾನ್ ಅಂತರಾಷ್ಟ್ರೀಯ ದರೋಡೆ ಎಂದು ಕರೆದಿದೆ.

ಅಮೆರಿಕದ ಮಿಲಿಟರಿ ಈ ರೀತಿಯ ದರೋಡೆಕೋರತನವನ್ನು ಮುಂದುವರಿಸಿದರೆ, ಇರಾನ್‌ನ ಶಕ್ತಿಯುತ ಸಶಸ್ತ್ರ ಪಡೆಗಳಿಂದ ನಿರ್ಣಾಯಕ ಪ್ರತಿಕ್ರಿಯೆಯನ್ನು ಎದುರಿಸುವುದು ನಿಶ್ಚಿತ ಎಂದು ಕೇಂದ್ರ ಮಿಲಿಟರಿ ಕಮಾಂಡ್ ಎಚ್ಚರಿಸಿದೆ.

ಈ ವರ್ಷದ ಆರಂಭದಿಂದಲೂ ಇರಾನ್, ಅಮೆರಿಕ ಮತ್ತು ಇಸ್ರೇಲ್ ನಡುವೆ ನಡೆಯುತ್ತಿರುವ ಈ ಸಂಘರ್ಷವು ಈಗ ನಿರ್ಣಾಯಕ ಹಂತಕ್ಕೆ ತಲುಪಿದೆ. ಪಾಕಿಸ್ತಾನದ ಇಸ್ಲಾಮಾಬಾದ್‌ನಲ್ಲಿ ಶಾಂತಿ ಮಾತುಕತೆಗಳು ನಡೆಯುತ್ತಿದ್ದರೂ, ನೆಲದ ಮೇಲೆ ಮಾತ್ರ ಯುದ್ಧದ ವಾತಾವರಣವೇ ಮುಂದುವರಿದಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ ತನ್ನ ಪರಮಾಣು ಕಾರ್ಯಕ್ರಮವನ್ನು ಸಂಪೂರ್ಣವಾಗಿ ನಿಲ್ಲಿಸುವವರೆಗೆ ಈ ಆರ್ಥಿಕ ಮತ್ತು ನೌಕಾ ದಿಗ್ಬಂಧನ ಮುಂದುವರಿಯಲಿದೆ ಎಂದು ಸ್ಪಷ್ಟಪಡಿಸಿದ್ದಾರೆ.

ಈಗಾಗಲೇ ಇರಾನ್‌ನ ಕ್ಷಿಪಣಿ ದಾಳಿಗಳಿಂದ ಸೌದಿ ಅರೇಬಿಯಾದಲ್ಲಿರುವ ಅಮೆರಿಕದ ನೆಲೆಗಳಿಗೆ ಹಾನಿಯಾಗಿದ್ದು, ಪ್ರತಿಯಾಗಿ ಇಸ್ರೇಲ್ ಕೂಡ ಇರಾನ್‌ನ ಪ್ರಮುಖ ಮೂಲಸೌಕರ್ಯಗಳ ಮೇಲೆ ದಾಳಿ ನಡೆಸಿದೆ. ಇರಾನ್‌ನ ಇತ್ತೀಚಿನ ಈ ಬೆದರಿಕೆಯು ಕೇವಲ ಮಾತುಗಳಿಗೆ ಸೀಮಿತವಾಗದೆ, ಯಾವುದೇ ಕ್ಷಣದಲ್ಲಿ ದೊಡ್ಡ ಮಟ್ಟದ ಯುದ್ಧವಾಗಿ ಸ್ಫೋಟಗೊಳ್ಳುವ ಲಕ್ಷಣಗಳು ಕಂಡುಬರುತ್ತಿವೆ. ಜಾಗತಿಕ ಇಂಧನ ಮಾರುಕಟ್ಟೆಯು ಈ ಬೆಳವಣಿಗೆಯಿಂದಾಗಿ ನಡುಗುತ್ತಿದ್ದು, ತೈಲ ಬೆಲೆಗಳು ಏರಿಕೆಯಾಗುವ ಭೀತಿ ಎದುರಾಗಿದೆ(ಏಜೆನ್ಸೀಸ್​​).