ಹೈಟೆಕ್ ತಂತ್ರಜ್ಞಾನವೂ ಸೋತ ಸ್ಥಳದಲ್ಲಿ ಗೆದ್ದು ಬೀಗಿದ ಕತ್ತೆಗಳು! ಸ್ಪೇನ್ ಅರಣ್ಯ ರಕ್ಷಣೆಗೆ ನಿಂತ ಪ್ರಾಣಿ ಪ್ರೀತಿಯ ನೈಜ ಕಥೆ! Spain Wildfire Donkeys

ಲಾಭರಹಿತ ಸಂಸ್ಥೆಯಾದ ಟಿವಿಸ್ಸಾ ಡಾಂಕಿ ಫೈರ್‌ಫೈಟರ್ಸ್ ಎಂಬ ಸಂಘಟನೆ, ನಿರ್ಲಕ್ಷ್ಯ ಹಾಗೂ ಕಿರುಕುಳಕ್ಕೆ ಒಳಗಾಗಿದ್ದ ಕತ್ತೆಗಳನ್ನು ರಕ್ಷಿಸಿ ಅವುಗಳಿಗೆ ಹೊಸ ಜೀವನ ನೀಡುತ್ತಿದೆ. ಜೊತೆಗೆ ಕಾಡಿನ ಬೆಂಕಿಯನ್ನು ತಡೆಯುವ ಜವಾಬ್ದಾರಿಯನ್ನೂ ವಹಿಸಿದೆ. 2020ರಲ್ಲಿ ಟಿವಿಸ್ಸಾದ ಮೇಯರ್ ಜೋನ್ ಸಿಡೋ ಸಾನ್ಸ್ ಅವರು ಕೆಲವೇ ಕತ್ತೆಗಳಿಂದ ಆರಂಭಿಸಿದ ಈ ಪ್ರಾಜೆಕ್ಟ್‌ನಲ್ಲಿ, ಇಂದು 62 ಕತ್ತೆಗಳ ಬೃಹತ್ ಹಿಂಡಿದೆ. 2013ರಲ್ಲಿ ತಮ್ಮ ಜಮೀನಿಗೆ ಕಾಡಾಗ್ನಿ ಬೆದರಿಕೆ ಬಂದಾಗ ಸಿಡೋ ಅವರಿಗೆ ಈ ಆಲೋಚನೆ ಬಂದಿತ್ತು.

ಕಾಡಿನಲ್ಲಿ ಬೆಂಕಿ ವೇಗವಾಗಿ ಹರಡಲು 'ಫೈನ್ ಫ್ಯೂಯಲ್' ಅಂದರೆ ಒಣಹುಲ್ಲು ಮತ್ತು ಸಣ್ಣ ಗಿಡಗಂಟೆಗಳು ಮುಖ್ಯ ಕಾರಣ. ಕತ್ತೆಗಳು ಈ ಒಣಹುಲ್ಲನ್ನು ಸತತವಾಗಿ ತಿಂದು ಮುಗಿಸುವುದರಿಂದ ಬೆಂಕಿ ಮುಂಭಾಗಕ್ಕೆ ಹರಡಲು ನೈಸರ್ಗಿಕ ಇಂಧನವೇ ಸಿಗುವುದಿಲ್ಲ. ಆಡು ಅಥವಾ ಕುರಿಗಳಿಗೆ ಹೋಲಿಸಿದರೆ ಕತ್ತೆಗಳ ತೂಕ ಹೆಚ್ಚು. ಇವು ಕಾಡಿನಲ್ಲಿ ಸಂಚರಿಸುವಾಗ ತಮ್ಮ ಕಾಲುಗಳ ಬಲವಾದ ತುಳಿತದಿಂದ ಒಣ ಎಲೆಗಳ ದಪ್ಪ ಪದರಗಳನ್ನು ಪುಡಿಪುಡಿ ಮಾಡಿ ಬೆಂಕಿ ಶರವೇಗದಲ್ಲಿ ಹರಡುವುದನ್ನು ತಡೆಯುತ್ತವೆ. 

ಆದಾಗ್ಯೂ, ಇವು ಬೆಟ್ಟಗಳಲ್ಲಿ ಸಾಗುವಾಗ ನಿರ್ಮಾಣವಾಗುವ ಕಿರಿದಾದ ದಾರಿಗಳು, ಅಗ್ನಿಶಾಮಕ ಸಿಬ್ಬಂದಿಗೆ ತುರ್ತು ಸಂದರ್ಭದಲ್ಲಿ ನೀರಿನ ಪೈಪ್‌ಗಳನ್ನು ತೆಗೆದುಕೊಂಡು ಹೋಗಲು ರಸ್ತೆಯಂತೆ ನೆರವಾಗುತ್ತವೆ. ಬಾರ್ಸಿಲೋನಾ ವಿಶ್ವವಿದ್ಯಾಲಯದ ಸಂಶೋಧಕ ಡಾ. ಜೋರ್ಡಿ ಬಾರ್ಟೊಲೊಮು ಅವರ ಪ್ರಕಾರ, ಭಾರೀ ಯಂತ್ರಗಳನ್ನು ಬಳಸಿ ಕಾಡು ಶುಚಿಗೊಳಿಸುವುದಕ್ಕಿಂತ ಇಂತಹ ಸಸ್ಯಾಹಾರಿ ಪ್ರಾಣಿಗಳನ್ನು ಮೇಯಿಸುವುದು ಅತ್ಯಂತ ಪರಿಣಾಮಕಾರಿ ಎಂದು ಅಭಿಪ್ರಾಯಪಟ್ಟಿದ್ದಾರೆ. 

ಇಲ್ಲಿರುವ ಹೆಚ್ಚಿನ ಕತ್ತೆಗಳು ಕಷ್ಟಕರ ಗತಕಾಲವನ್ನು ಹೊಂದಿದ್ದವು. ರೇಸಿಂಗ್‌ನಲ್ಲಿ ಸೋತಿದ್ದಕ್ಕೆ ಕಸಾಯಿಖಾನೆಗೆ ತಳ್ಳಲ್ಪಟ್ಟಿದ್ದ 'ರಾಬರ್ಟೋ' ಎಂಬ ಕತ್ತೆಗೆ ಇಲ್ಲಿ ಮರುಜೀವ ಸಿಕ್ಕಂತಾಗಿದೆ. ಆದಾಗ್ಯೂ, ಮಾಲೀಕರು ಸಕ್ಕರೆ ಅಚ್ಚು ಹಾಗೂ ಬಿಸ್ಕತ್ತುಗಳನ್ನು ತಿನ್ನಿಸಿ ವಿಪರೀತ ದಪ್ಪಗಾಗಿಸಿ ಕಿರುಕುಳ ನೀಡಿದ್ದ 'ಪಲೋಮಾ' ಎಂಬ ಕತ್ತೆಯನ್ನೂ ರಕ್ಷಿಸಿ ತರಲಾಗಿದೆ. ಇಂದು ಈ ಎಲ್ಲಾ ಪ್ರಾಣಿಗಳು ಸ್ವಯಂಸೇವಕರಿಂದ ಪಶುವೈದ್ಯಕೀಯ ಆರೈಕೆ ಪಡೆಯುತ್ತಾ, ಸ್ಥಳೀಯ ಫಾರ್ಮ್‌ಗಳು ನೀಡುವ ಆಹಾರವನ್ನು ತಿನ್ನುತ್ತಾ ಗೌರವಾನ್ವಿತ ಜೀವನ ನಡೆಸುತ್ತಿವೆ.

2025ರ ಸಾಲಿನಲ್ಲಿ ಯುರೋಪಿಯನ್ ಯೂನಿಯನ್ ಭೀಕರ ಕಾಡಾಗ್ನಿಗೆ ಸಾಕ್ಷಿಯಾಗಿತ್ತು. ಕೇವಲ ಸ್ಪೇನ್‌ನಲ್ಲಿ ಲಕ್ಷಾಂತರ ಎಕರೆ ನಾಶವಾಗಿ, 13 ಮಿಲಿಯನ್ ಟನ್ ಕಾರ್ಬನ್ ವಾತಾವರಣ ಸೇರಿತ್ತು. ಇದನ್ನು ತಡೆಯಲು ಸ್ಪೇನ್‌ನಲ್ಲಿ ಹಳೆಯ ನೈಸರ್ಗಿಕ ಪದ್ಧತಿಗಳು ಮರುಜೀವ ಪಡೆಯುತ್ತಿವೆ. 

ಗಲಿಷಿಯಾದಲ್ಲಿ ಕಾಡು ಕುದುರೆಗಳನ್ನು ಹಾಗೂ ಕ್ಯಾಟಲೋನಿಯಾದಲ್ಲಿ 'ರಾಮಾಟ್ಸ್ ಡಿ ಫೋಕ್' ಯೋಜನೆಯಡಿ ಕುರಿಗಳನ್ನು ಬಳಸಲಾಗುತ್ತಿದೆ. ಅನುದಾನದ ಕೊರತೆಯ ನಡುವೆಯೂ ಪ್ರಕೃತಿ ರಕ್ಷಣೆಗೆ ತಂತ್ರಜ್ಞಾನದ ಜೊತೆಗೆ ಪ್ರಾಣಿ ದಯೆಯೂ ಬೇಕು ಎಂಬುದನ್ನು ಈ ವಿಶಿಷ್ಟ 'ಕತ್ತೆಗಳ ಪಡೆ' ಇಡೀ ಜಗತ್ತಿಗೆ ತೋರಿಸಿಕೊಟ್ಟಿದೆ (ಏಜೆನ್ಸೀಸ್).