ಯುಎಇ: ಸೆಪ್ಟೆಂಬರ್ 30 ರಂದು ದುಬೈನಿಂದ ಇಸ್ರೇಲ್‌ಗೆ ಪ್ರಯಾಣ ಬೆಳಿಸಿದ್ದ ಫ್ಲೈದುಬೈ (flydubai) ವಿಮಾನ FZ1073 ರ ಕಾಕ್‌ಪಿಟ್‌ನಲ್ಲಿ ನಡೆದ ಕರಾಳ ಘಟನೆಯೊಂದು ಇಡೀ ವಿಶ್ವವೇ ಬೆಚ್ಚಿಬೀಳುವಂತೆ ಮಾಡಿದೆ. ವಿಮಾನದ ಕ್ಯಾಪ್ಟನ್ ಆಗಿದ್ದ ಭಾರತ ಮೂಲದ ಪೈಲಟ್ ಸ್ಮಿತ್ ಮಚ್ಚಾರ್ ಮೇಲೆ ಓಮನ್ ಮೂಲದ ಸಹ-ಪೈಲಟ್ ಚಾಕುವಿನಿಂದ ದಾಳಿ ಮಾಡಿ 9/11 ಮಾದರಿಯ ಉಗ್ರಕೃತ್ಯಕ್ಕೆ ಸಂಚನ್ನು ರೂಪಿಸಿದ್ದ ಎನ್ನಲಾಗುತ್ತಿದೆ.
ಸದ್ಯ, ಸೌದಿ ಅರೇಬಿಯಾದಿಂದ ಯುಎಇ ಗೆ ಹಸ್ತಾಂತರಗೊಂಡಿರುವ ಈ ಆಗಂತುಕ ಸಹ ಪೈಲಟ್ ಹೆಸರು ಮತ್ತು ಆತನ ಹಿನ್ನಲೆ ಬಹಿರಂಗಗೊಂಡಿದ್ದು, ಸದ್ಯ ಲಭ್ಯವಾಗಿರುವ ಮಾಹಿತಿ ಕೇಳಿದರೆ ಎಂತವರು ಬೆಚ್ಚಿ ಬೀಳಿಸುವಂತಿದೆ.
ಅಂತಾರಾಷ್ಟ್ರೀಯ ಮಾಧ್ಯಮಗಳಲ್ಲಿ ವರದಿಯಾಗುತ್ತಿರುವಂತೆ ಈ ಓಮನ್ ಮೂಲದ ಸಹ ಪೈಲಟ್ ಹೆಸರು ಹಮಾಮ್ ಅಲ್ಹಮ್ಮಮಿ (Hamam al-Hammami) ಎಂದು ಗುರುತಿಸಲಾಗಿದೆ. ಇತನ ತಂದೆ ಓಮನ್ ಮೂಲದವರಾಗಿದ್ದರೆ, ತಾಯಿ ಸಿರಿಯಾ ದೇಶದವಳೆಂದು ತಿಳಿದು ಬಂದಿದೆ. ವರದಿಗಳ ಪ್ರಕಾರ, ಈ ಅಲ್ಹಮ್ಮಮಿ ತಮ್ಮ ಹೆಚ್ಚಿನ ಸಮಯವನ್ನು ಯುಎಇ ದೇಶದಲ್ಲೇ ಕಳೆದಿದ್ದಾರೆ, ಆದರೆ ಓಮನ್ ದೇಶ ಇನ್ನುವರೆಗೆ ಇತನ ರಾಷ್ಟ್ರೀಯತೆ ಬಗ್ಗೆ ಮಾಹಿತಿ ಹಂಚಿಕೊಂಡಿಲ್ಲ. ಮಾಹಿತಿ ಪ್ರಕಾರ ಈತ ದ್ವೀಪೌರತ್ವ ಹೊಂದಿರುವ ಸಾಧ್ಯತೆಯಿದೆ ಎನ್ನಲಾಗುತ್ತಿದ್ದು, ತನಿಖೆ ಬಳಿಕ ಈ ಬಗ್ಗೆ ಸ್ಪಷ್ಟ ಮಾಹಿತಿ ಹೊರ ಬರಬೇಕಿದೆ.
2020 ರ ಬಳಿಕ ಯುಎಇ ಹಾಗೂ ಇಸ್ರೇಲ್ ನಡುವೆ ರಾಜತಾಂತ್ರಿಕ ಸಂಬಂಧ ಸುಗಮವಾದ ಹಿನ್ನಲೆ ಈ, ಅಲ್ಹಮ್ಮಮಿ ತನ್ನ ಯುಎಇ ಪೌರತ್ವವನ್ನು ಬಳಸಿಕೊಂಡು ಪೈಲಟ್ ಆಗಿದ್ದಾನೆ ಎಂಬ ವಾದ ಸಹ ಕೇಳಿ ಬರುತ್ತಿದೆ. ಇದಕ್ಕೆಲ್ಲಾ ತನಿಖೆ ನಂತರವೇ ನಿಖರ ಮಾಹಿತಿ ದೊರೆಯಲಿದೆ.
ಅಮೆರಿಕ ಇತಿಹಾಸದಲ್ಲಿ ಅಚ್ಚಳೀಯದಂತೆ ದಾಖಲಾಗಿರುವ 9/11 ದಾಳಿಯನ್ನು ನಡೆಸಿದ್ದ ಕುಖ್ಯಾತ ಭಯೋತ್ಪಾದನಾ ಸಂಘಟನೆಯಾದ ಅಲ್-ಖೈದಾ ಬಗ್ಗೆ ಈ ಅಲ್ಹಮ್ಮಮಿ ವಿಶೇಷ ಒಲವನ್ನು ಹೊಂದಿದ್ದ ಎಂದು ಇತನ ಸೋಷಿಯಲ್ ಮೀಡಿಯಾ ಖಾತೆಗಳಲ್ಲಿ ಹಂಚಿಕೊಂಡಿರುವ ಮಾಹಿತಿ ಬಹಿರಂಗ ಪಡಿಸಿವೆ ಎಂದು ತಿಳಿದು ಬಂದಿದೆ.
ಒಸಾಮಾ ಬಿನ್ ಲಾಡೆನ್ ಜೊತೆಗೂಡಿ ಅಮೆರಿಕದಲ್ಲಿ 9/11 ದಾಳಿಗಳ ಸಂಚು ರೂಪಿಸಿದ್ದ ಅಲ್-ಖೈದಾ ಉಗ್ರ ಐಮನ್ ಅಲ್-ಜವಾಹಿರಿಯ ಭಾವಚಿತ್ರ ಹೊಂದಿರುವ ವಿಡಿಯೋವೊಂದನ್ನು ಈ ಅಲ್ಹಮ್ಮಮಿ, ಹಂಚಿಕೊಂಡಿರುವುದು ಪತ್ತೆಯಾಗಿದೆ.
ಹಾಗೆಯೇ, ಘಟನೆ ದಿನ ಪ್ರಯಾಣಿಕರು ನೀಡಿರುವ ಮಾಹಿತಿಯಂತೆ, ಇವನು ವಿಮಾನದಲ್ಲಿ ಅತೀಯಾಗಿ ದೇವರ ಪ್ರಾರ್ಥನೆ ಮಾಡುತ್ತಿದ್ದ, ಹಾಗೂ ಮಹಿಳೆಯರೊಂದಿಗೆ ಮಾತನಾಡುತ್ತಿರಲಿಲ್ಲ ಹಾಗೆಯೇ ನೋಡಲು ಬಹಳ ಒರಟನಂತೆ ಕಾಣುತ್ತಿದ್ದ ಎಂದು ಹೇಳಿದ್ದರು.
ಇದೇ ರೀತಿಯ ಮಾಹಿತಿಯನ್ನು ಇಸ್ರೇಲ್ ಪ್ರಧಾನಿ ಬೆಂಜಾಮಿನ್ ನೆತನ್ಯಾಹು ಕೂಡ ಹಂಚಿಕೊಂಡಿದ್ದು, ಬಂಧಿತ ಆರೋಪಿ ಇಸ್ಲಾಮಿಕ್ ತೀವ್ರಗಾಮಿಯಾಗಿದ್ದಾನೆ. ಅವನೊಬ್ಬ ಬ್ರೇನ್ವಾಶ್ ಆಗಿರುವ ಪೈಲಟ್ ಎಂದು ಹೇಳಿಕೆ ನೀಡಿದ್ದು, ತನಿಖೆ ನಂತರ ಈ ಕುರಿತು ಅಧಿಕ ಮಾಹಿತಿ ಹಂಚಿಕೊಳ್ಳುವುದಾಗಿ ನೆತನ್ಯಾಹು ತಿಳಿಸಿದ್ದರು.
ಕೇವಲ ಅಲ್ಖೈದಾ ಉಗ್ರನ ಮಾತ್ರವಲ್ಲ, ದುಡಿಯುವ ಮಹಿಳೆಯರ ಬಗ್ಗೆ ಹಾಗೂ ಸ್ತ್ರೀ ಪ್ರಧಾನ ವ್ಯವಸ್ಥೆ ಬಗ್ಗೆ ಕೂಡ ಈ ಅಲ್ಹಮ್ಮಮಿ ವಿರೋಧ ಹೊಂದಿದ್ದ ಎಂದು ಆತನ ಸೋಷಿಯಲ್ ಮೀಡಿಯಾ ಪೋಸ್ಟ್ಗಳು ತಿಳಿಸಿವೆ ಎನ್ನಲಾಗುತ್ತಿದೆ.
ದುಡಿಯುವ ಮಹಿಳೆಯರು ಸಂಪ್ರದಾಯವನ್ನು ಧಿಕ್ಕರಿಸುತ್ತಾರೆ, ಇದರಿಂದ ಸಮಾಜ ಕೆಳಮುಖವಾಗಿ ಸಾಗುತ್ತಿದೆ ಎಂದು ಇವನು 2022 ರಲ್ಲಿ ಬರೆದುಕೊಂಡಿದ್ದಾಗಿ ಹೇಳಲಾಗುತ್ತಿದೆ. ಸ್ತ್ರೀ ಮತ್ತು ಪುರುಷರು ಒಟ್ಟಿಗೆ ಕೆಲಸಮಾಡಿದರೆ, ಆ ಸ್ಥಳದಲ್ಲಿ ಪುರುಷರ ಏಕಾಗ್ರತೆ ಹದಗೆಡುತ್ತದೆ ಎಂಬೆಲ್ಲಾ ಕಟ್ಟರ್ ಸಂಪ್ರದಾಯವಾದಿ ನಿಲುವನ್ನು ಇವನು ಹೊಂದಿದ್ದ ಎಂದು ತಿಳಿದು ಬಂದಿದೆ. ಆದರೆ, ಈ ಎಲ್ಲಾ ಪೋಸ್ಟ್ಗಳು ಹಾಗೂ ನಿಖರತೆ ಬಗ್ಗೆ, ತನಿಖೆ ನಡೆದು ವರದಿ ಪ್ರಕಟಗೊಂಡ ನಂತರವೇ ಸ್ಪಷ್ಟನೆ ದೊರೆಯಲಿದೆ, (ಏಜೆನ್ಸೀಸ್).