ಬೆಂಗಳೂರು: ಮಿಕ್ಸಿ ಹಾಗೂ ಟಿವಿ ಬಿಡಿ ಭಾಗಗಳಿಂದ ಸುಮಾರು 600 ಡ್ರೊನ್ಗಳನ್ನು ತಯಾರಿಸಿದ್ದೇನೆಂದು ಹೇಳಿ ಜನಮನ್ನಣೆ ಗಳಿಸಿದ್ದ ಡ್ರೋನ್ ಪ್ರತಾಪ್ ಓರ್ವ ನಕಲಿ ವಿಜ್ಞಾನಿ ಎಂಬುದು ಗೊತ್ತಾಗುತ್ತಿದ್ದಂತೆ ಸಾಮಾಜಿಕ ಜಾಲತಾಣದಲ್ಲಿ ಭಾರಿ ಆಕ್ರೋಶ ವ್ಯಕ್ತವಾಗುತ್ತಲೇ ಇದೆ.
ಡ್ರೋನ್ ಪ್ರತಾಪ್ ಫ್ಯಾನ್ಸ್ ಕ್ಲಬ್ ಹೆಸರಿನಲ್ಲಿ ಫೇಸ್ಬುಕ್ನಲ್ಲಿ ತೆರೆಯಲಾಗಿರುವ ಖಾತೆ ಬಗ್ಗೆಯೂ ಸಂಶಯ ವ್ಯಕ್ತವಾಗಿದೆ. ಮೇ-ಜೂನ್ವರೆಗೆ ಆಗೊಂದು ಈಗೊಂದು ಪೋಸ್ಟ್ ಅಪ್ಡೇಟ್ ಆಗುತ್ತಿತ್ತು. ಇದೀಗ ಸಾಕಷ್ಟು ಪೋಸ್ಟ್ಗಳು ಅಪ್ಡೇಟ್ ಆಗುತ್ತಿದ್ದು, ಅವರೇ ಅಕೌಂಟ್ ಓಪನ್ ಮಾಡಿ ತಮ್ಮನ್ನು ಸಮರ್ಥನೆ ಮಾಡಿಕೊಳ್ಳುತ್ತಿದ್ದಾರೆ ಎಂಬ ಆರೋಪ ಕೇಳಿಬಂದಿದೆ.
ಹೀಗಿದ್ದರೂ ಫ್ಯಾನ್ಸ್ ಕ್ಲಬ್ನಲ್ಲಿ ಪ್ರತಿನಿತ್ಯ ಸಾಕಷ್ಟು ಪೋಸ್ಟ್ ಮಾಡಲಾಗುತ್ತದೆ. ಸರ್ಕಾರದ ಕೋವಿಡ್ ಸಲಹೆಗಳನ್ನು ಹಂಚಿಕೊಳ್ಳಲಾಗುತ್ತಿದೆ. ಇದರೊಂದಿಗೆ ಪ್ರತಾಪ್ ಅವರ ಕೆಲವು ವಿಡಿಯೋಗಳು ಅಪ್ಲೋಡ್ ಆಗಿವೆ. ಆದರೆ, ಎಲ್ಲ ಪೋಸ್ಟ್ಗಳಿಗೂ ಬೆಂಬಲಕ್ಕಿಂತ ಆಕ್ರೋಶವೇ ಹೆಚ್ಚಾಗಿ ಕಂಡುಬಂದಿದೆ.
ಇದರ ನಡುವೆ ಕಳೆದ ವರ್ಷ ಉತ್ತರ ಕರ್ನಾಟಕದಲ್ಲಿ ಸಂಭವಿಸಿದ ಪ್ರವಾಹದ ವೇಳೆ ನಡೆದ ರಕ್ಷಣಾ ಕಾರ್ಯಾಚರಣೆಯ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ವಿಡಿಯೋದಲ್ಲಿ ಅಜ್ಜಿಯೊಬ್ಬರು ನೀಡಿದ ಹಾಲಿಗೆ ಸೆಕ್ಕರೆ ಬೆರೆಸಿ ಕುಡಿದು ಚೆನ್ನಾಗದೆ ಎಂದು ಹೇಳಿದ ದೃಶ್ಯವಿದೆ. ಇದೀಗ ಈ ವಿಡಿಯೋ ಕುರಿತು ಅನೇಕರು ಕಿಡಿಕಾರಿದ್ದಾರೆ. ಇಂತಹ ವಿಡಿಯೋಗಳನ್ನು ಹಾಕುವ ಬದಲು ಡ್ರೋನ್ ತಯಾರಿಸಿದ ವಿಡಿಯೋಗಳನ್ನು ಪೋಸ್ಟ್ ಮಾಡಿ ಎಂದು ಸವಾಲು ಹಾಕಿದ್ದಾರೆ.
ನಿಮ್ಮ ಪ್ರಮಾಣ ಪತ್ರ, ಸ್ಪರ್ಧೆಗಳು, ಸಮಿನಾರ್ ಹಾಗೂ ಮೆಡಲ್ಗಳನ್ನು ಜನರ ಮುಂದೆ ಬಹಿರಂಗಪಡಿಸಿ, ಈಗಲಾದರೂ ಜನತೆಯ ಮುಂದೆ ಕ್ಷಮೆಯಾಚಿಸಿ ಎಂದು ಜಾಲತಾಣದಲ್ಲಿ ನೆಟ್ಟಿಗರು ಸಿಕ್ಕಾಪಟ್ಟೆ ತರಾಟೆಗೆ ತೆಗೆದುಕೊಂಡಿದ್ದಾರೆ. (ಏಜೆನ್ಸೀಸ್)