ಕೋಲ್ಕತ: ಗಂಡನ ಜತೆ ಹೋಟೆಲ್ ರೂಂ ಒಳಗೆ ಬಂದವಳು ಬರ್ಬರವಾಗಿ ಹತ್ಯೆಯಾಗಿರುವ ಘಟನೆ ಪಶ್ಚಿಮ ಬಂಗಾಳದ ಕೋಲ್ಕತದಲ್ಲಿ ನಡೆದಿದೆ. ಈ ವಿಚಾರದಲ್ಲಿ ಹೆಚ್ಚಿನ ತನಿಖೆ ನಡೆಸಲು ಪೊಲೀಸರ ತಂಡ ಸಿದ್ಧವಾಗಿದೆ.
ಅಮಿತ್ ಘೋಷ್ ಮತ್ತು ಚುಮ್ಕಿ ಘೋಷ್ ಹೆಸರಿನ ದಂಪತಿ ಮಂಗಳವಾರ ಮಧ್ಯಾಹ್ನ ನಗರದ ಹೋಟೆಲ್ಗೆ ಬಂದಿದ್ದಾರೆ. ಸಂಜೆ 7ರವರೆಗೆ ಇರುತ್ತೇವೆ ಎಂದು ಹೇಳಿ ಹೋಟೆಲ್ ರೂಂನ್ನು ಬುಕ್ ಮಾಡಿದ್ದಾರೆ. ಪಶ್ಚಿಮ ಮಿಡ್ನಾಪೋರ್ ನಿವಾಸಿಗಳು ಎನ್ನುವ ದಾಖಲೆ ಇದ್ದ ಐಡಿ ಪ್ರೂಫ್ನ್ನು ಕೊಟ್ಟಿದ್ದಾರೆ. ಹೆಂಡತಿಯನ್ನು ರೂಂ ಒಳಗೆ ಬಿಟ್ಟು ಸ್ವಲ್ಪ ಸಮಯದ ನಂತರ ಹೊರ ಬಂದ ಅಮಿತ್, ಕೆಲ ಸಮಯದಲ್ಲೇ ವಾಪಾಸು ಬರುವುದಾಗಿ ರಿಸಪ್ಷನಿಷ್ಟ್ಗೆ ಹೇಳಿ, ಅಲ್ಲಿಂದ ಹೊರಟು ಹೋಗಿದ್ದಾನೆ.
ಸಂಜೆ ಏಳು ಗಂಟೆಗೆ ಚೆಕ್ ಔಟ್ ಆಗಬೇಕಿದ್ದ ದಂಪತಿ ಎಷ್ಟು ಹೊತ್ತಾದರೂ ರೂಂನಿಂದ ಹೊರ ಬಂದಿಲ್ಲ. ಚುಮ್ಕಿ ಒಬ್ಬಳೇ ರೂಂನಲ್ಲಿದ್ದು, 8 ಗಂಟೆಯಾದರೂ ಚೆಕ್ ಔಟ್ ಮಾಡಿರಲಿಲ್ಲ. ಡೆಡ್ ಲೈನ್ ಮೀರಿದ ಹಿನ್ನೆಲೆಯಲ್ಲಿ ಹೋಟೆಲ್ನ ಸಿಬ್ಬಂದಿ ರೂಂನ ಬಾಗಿಲು ತಟ್ಟಿದ್ದಾರೆ. ಒಳಗಡೆ ಟಿವಿ ಆನ್ನಲ್ಲಿದ್ದು, ದೊಡ್ಡದಾಗಿ ಸೌಂಡ್ ಕೊಡಲಾಗಿತ್ತು. ಎಷ್ಟು ಹೊತ್ತು ಬಾಗಿಲು ತಟ್ಟಿದರೂ ಬಾಗಿಲು ತೆರೆಯದಿದ್ದರಿಂದಾಗಿ, ಸಿಬ್ಬಂದಿ ಡೂಪ್ಲಿಕೇಟ್ ಕೀ ಬಳಸಿ ಬಾಗಿಲು ತೆರೆದಿದ್ದಾರೆ.
ರೂಂನ ಒಳಗಡೆ ಚುಮ್ಕಿ ಅವರ ಮೃತದೇಹ ಪತ್ತೆಯಾಗಿದೆ. ದೇಹದ ಹಲವು ಭಾಗಗಳಲ್ಲಿ ಚಾಕುವಿನಿಂದ ಕೊಯ್ಯಲಾಗಿದ್ದು, ಬೆಡ್ಶೀಟ್ನಿಂದ ಮೃತ ದೇಹವನ್ನು ಸುತ್ತಿಡಲಾಗಿದೆ. ಇದನ್ನು ಕಂಡ ಸಿಬ್ಬಂದಿ ಗಾಬರಿಯಾಗಿದ್ದು, ಕೂಡಲೇ ಪೊಲೀಸರಿಗೆ ಕರೆ ಮಾಡಿ ವಿಚಾರ ತಿಳಿಸಿದ್ದಾರೆ. ಸ್ಥಳಕ್ಕೆ ಬಂದ ಪೊಲೀಸರು ಮಹಿಳೆಯ ದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ಇದೀಗ ಅಮಿತ್ ಯಾರು, ಆತನಿಗೂ ಚುಮ್ಕಿಗೂ ನಿಜವಾಗಿಯೂ ಮದುವೆಯಾಗಿದೆಯೇ? ಅವರಿಬ್ಬರ ನಡುವೆ ಯಾವ ರೀತಿಯ ಸಂಬಂಧವಿತ್ತು ಎನ್ನುವುದರ ಕುರಿತಾಗಿ ಪೊಲೀಸರು ವಿಚಾರಣೆ ಆರಂಭಿಸಿದ್ದಾರೆ. (ಏಜೆನ್ಸೀಸ್)