ಕೊಚ್ಚಿ: ಕರೊನಾ ಲಾಕ್ಡೌನ್ನಿಂದ ಬೇರೆ ದೇಶಗಳಲ್ಲಿ ಸಿಲುಕಿ ಪರದಾಡುತ್ತಿದ್ದ ಅದೆಷ್ಟೋ ಭಾರತೀಯರನ್ನು ಏರ್ ಇಂಡಿಯಾ ವಿಮಾಗಳ ಮೂಲಕ ವಾಪಸ್ ಕರೆತರಲಾಗಿದೆ.
ಇದೀಗ ಮತ್ತೊಂದು ಹಂತದಲ್ಲಿ ದ್ವೀಪ ರಾಷ್ಟ್ರ ಮಾಲ್ಡೀವ್ಸ್ನಲ್ಲಿ ಸಿಲುಕಿದ್ದ 588 ಭಾರತೀಯರನ್ನು ಭಾರತೀಯ ನೌಕಾಪಡೆ ಸುರಕ್ಷಿತವಾಗಿ ತಾಯ್ನಾಡಿಗೆ ಕರೆತಂದಿದೆ.
ನೇವಿಯ ಐಎನ್ಎಸ್ ಜಲಾಶ್ವ ಹಡಗಿನಲ್ಲಿ ಮಾಲ್ಡೀವ್ಸ್ನಿಂದ 588 ಜನರನ್ನು ಕರೆದುಕೊಂಡು ಬರಲಾಗಿದ್ದು, ಇಂದು ಕೊಚ್ಚಿಯನ್ನು ತಲುಪಿದ್ದಾರೆ. ಈ ಹಡಗು ಶನಿವಾರ ಮಾಲ್ಡೀವ್ಸ್ನ ಮೇಲ್ ಬಂದರಿನಿಂದ ಹೊರಟಿತ್ತು.
ಮಾಲ್ಡೀವ್ಸ್ನಿಂದ ಭಾರತಕ್ಕೆ ಬಂದ 588 ಮಂದಿಯಲ್ಲಿ 497 ಪುರುಷರು, 70 ಮಹಿಳೆಯರು, 21 ಮಕ್ಕಳು ಇದ್ದಾರೆ. 70 ಮಹಿಳೆಯರಲ್ಲಿ ಆರು ಗರ್ಭಿಣಿಯರು ಇದ್ದಾರೆ.
ಮಾಲ್ಡೀವ್ಸ್ನಿಂದ ಹೊರಡುವಾಗ ಗಾಳಿ, ಮಳೆ ಇತ್ತು. ಈ ಮಧ್ಯೆ ಎಲ್ಲರನ್ನೂ ಸುರಕ್ಷಿತವಾಗಿ ಭಾರತಕ್ಕೆ ತಲುಪಿಸಿದ್ದಾಗಿ ಇಂಡಿಯನ್ ನೇವಿ ಟ್ವೀಟ್ ಮೂಲಕ ತಿಳಿಸಿದೆ.
ಇದನ್ನೂ ಓದಿ: “ಆತ್ಮ ನಿರ್ಭರ್ ಭಾರತ್” ಪ್ಯಾಕೇಜ್ನ 5ನೇ ದಿನದ ಘೋಷಣೆ ಕುರಿತು ಸಿಎಂ ಯಡಿಯೂರಪ್ಪ ಪ್ರತಿಕ್ರಿಯೆ ಹೀಗಿದೆ…
ಹೀಗೆ ಬಂದವರಲ್ಲಿ 568 ಮಂದಿ ಕೇರಳದವರೇ ಇದ್ದಾರೆ. ಉಳಿದವರೆಲ್ಲ ತಮಿಳುನಾಡು, ತೆಲಂಗಾಣ, ಲಕ್ಷದ್ವೀಪದವರು. ಇದು ಜಲಾಶ್ವದ ಎರಡನೇ ಟ್ರಿಪ್ ಆಗಿದೆ. ಮೊದಲ ಬಾರಿ ಮೇ 12ರಂದು 698 ಮಂದಿಯನ್ನು ಕರೆದುಕೊಂಡು ಬಂದಿತ್ತು.
ಬೇರೆ ದೇಶಗಳಲ್ಲಿ ಸಿಲುಕಿರು ಭಾರತೀಯರನ್ನು ಸಮುದ್ರ ಮಾರ್ಗದ ಮೂಲಕ ಕರೆತರುವ ಕಾರ್ಯಾಚರಣೆಗೆ ಸಮುದ್ರ ಸೇತು ಎಂದು ಹೆಸರಿಡಲಾಗಿದೆ.
ಸಮುದ್ರ ಸೇತು ಕಾರ್ಯಾಚರಣೆಯಡಿ ಇದುವರೆಗೆ ಮಾಲ್ಡೀವ್ಸ್ನಿಂದ ಒಟ್ಟು 22 ರಾಜ್ಯಗಳ 1488 ಭಾರತೀಯರನ್ನು ಕರೆತರಲಾಗಿದೆ. ಅದರಲ್ಲಿ 205 ಮಹಿಳೆಯರು (133 ಗರ್ಭಿಣಿಯರು) 38 ಮಕ್ಕಳು ಎಂದು ನೇವಿ ತಿಳಿಸಿದೆ.
ಭಾರತವನ್ನು ಸಮುದ್ರ ಮಾರ್ಗದ ಮೂಲಕ ತಲುಪಿದ ಎಲ್ಲರಿಗೂ ಸ್ಕ್ರೀನ್ ಟೆಸ್ಟ್ ಮಾಡಲಾಗಿದೆ. ಕೊವಿಡ್ ಲಕ್ಷಣಗಳು ಇದ್ದವರನ್ನು ಆಸ್ಪತ್ರೆಗೆ ಸೇರಿಸಲಾಗಿದೆ. ಹಾಗೇ ಉಳಿದವರೆನ್ನಲ್ಲ ಕ್ವಾರಂಟೈನ್ಗೆ ಒಳಪಡಿಸಲಾಗಿದೆ. ಅವರವರ ಊರುಗಳಿಗೆ ತಲುಪಲು ಬಸ್ ವ್ಯವಸ್ಥೆಯನ್ನೂ ಮಾಡಲಾಗಿದೆ. (ಏಜೆನ್ಸೀಸ್)