ಬೆಂಗಳೂರು: ಕರೊನಾ ತಂದ ಲಾಕ್ಡೌನ್ನಿಂದಾಗಿ ರಾಜ್ಯದ ಕೈಗಾರಿಕೆ ಕ್ಷೇತ್ರ ನಲುಗಿದೆ. ಮುಂದೇನು ಎಂಬ ಗೊಂದಲ ಸರ್ಕಾರ ಹಾಗೂ ಕೈಗಾರಿಕೆ ವಲಯದಲ್ಲಿ ಹೆಮ್ಮರವಾಗಿ ನಿಂತಿರುವ ಸಂದರ್ಭದಲ್ಲೇ ಕರೊನೋತ್ತರ ಕೈಗಾರಿಕೆ ಬೆಳವಣಿಗೆ ಬಗ್ಗೆ ಮಾಜಿ ಸಚಿವ ಮುರುಗೇಶ ನಿರಾಣಿ ಆತ್ಮಸ್ಥೈರ್ಯ ತುಂಬುವ ಮಾತುಗಳನ್ನಾಡಿದ್ದಾರೆ. ಸ್ವತಃ ಕೈಗಾರಿಕೋದ್ಯಮಿಯಾಗಿ, ಕೈಗಾರಿಕೆ ಇಲಾಖೆ ನಿಭಾಯಿಸಿದ ಅನುಭವ ಹೊಂದಿರುವ ನಿರಾಣಿ ಸವಾಲುಗಳನ್ನು ಎದುರಿಸುವ ಹಾಗೂ ಸರ್ಕಾರ ಅಗತ್ಯವಾಗಿ ಕೈಗೊಳ್ಳಬೇಕಿರುವ ಕ್ರಮಗಳ ಬಗ್ಗೆ ವಿಜಯವಾಣಿ ಜತೆ ಅಭಿಪ್ರಾಯ ಹಂಚಿ ಕೊಂಡಿದ್ದಾರೆ.
‘ಕೋವಿಡ್ ಸ್ವದೇಶಿ ಹಾಗೂ ಸ್ವಾವಲಂಬನೆಯ ಬಹು ದೊಡ್ಡ ಪಾಠ ಕಲಿಸಿದೆ. ವಿದೇಶಿ ಉತ್ಪನ್ನಗಳ ಬದಲು ದೇಶಿಯ ಉತ್ಪಾದನೆಗೆ ದಾರಿ ಮಾಡಿಕೊಟ್ಟಿದೆ. ಪರಾವಲಂಬಿ ಭಾವನೆ ಯಿಂದ ಹೊರಬರಲು ಇದು ಸಕಾಲ’ ಎಂದು ಅವರು ದೇಶದ ಮುಂದಿರುವ ಅವಕಾಶ ಗಳನ್ನು ತೆರೆದಿಡುತ್ತಾರೆ.
ಇದನ್ನೂ ಓದಿ: ತಾಯ್ನಡಿಗೆ ತೆರಳಿದ ವಲಸೆ ಕಾರ್ಮಿಕರು
‘ರಾಜ್ಯ ಸರ್ಕಾರ ವಿದೇಶಿ ಉದ್ಯಮಿಗಳನ್ನು ಆಕರ್ಷಿಸುವ ನಿಟ್ಟಿನಲ್ಲಿ ಹೊಸ ಕೈಗಾರಿಕಾ ನೀತಿ (2020-2025)ಯನ್ನು ಜಾರಿಗೆ ತರಬೇಕು. ಏಕಗವಾಕ್ಷಿ ಯೋಜನೆಯಡಿ ಪರವಾನಗಿ ನೀಡುವುದು, ತೆರಿಗೆ ರಿಯಾಯಿತಿ ಸೇರಿ ವಿಶೇಷ ಪ್ಯಾಕೇಜ್ ಘೋಷಿಸಿ ಬಂಡವಾಳ ಆಕರ್ಷಿಸಬೇಕು’ ಎಂದು ಸರ್ಕಾರಕ್ಕೆ ಸಲಹೆ ನೀಡಿದರು.
‘ನಾನು ಬೃಹತ್ ಕೈಗಾರಿಕಾ ಸಚಿವನಾಗಿದ್ದಾಗ ಉದ್ಯಮಗಳಿಗೆ ಹೈಲೆವಲ್ ಕಮಿಟಿ ಒಪ್ಪಿದ 24 ಗಂಟೆಯಲ್ಲೇ ಸರ್ಕಾರಿ ಆದೇಶ ಕೊಡುತ್ತಿದ್ದೆವು. ಅಂತಹ ಪದ್ಧತಿ ಜಾರಿಗೆ ತರಬೇಕಾಗಿದೆ. ಈ ವಾತಾವರಣದಲ್ಲಿ ಕೈಗಾರಿಕೆಗಳಿಗೆ ಸಬ್ಸಿಡಿ ಬೇಡ, 2 ವರ್ಷ ಮೆರಿಟೋರಿಯಂ ಕೊಡಬೇಕು, ಅನುತ್ಪಾದಕ ಆಸ್ತಿ ನಿಯಮ ಅಡ್ಡಿ ಬಾರದಂತೆ ಸಾಲ ಮರು ಹೊಂದಾಣಿಕೆ ಮಾಡಬೇಕು. ಆಗ ಕೈಗಾರಿಕೆಗಳು ಉಸಿರಾಡಲು ಅನುಕೂಲವಾಗುತ್ತದೆ. ಕೋವಿಡ್ನಿಂದಾಗಿ ಮೇಕ್ ಇನ್ ಇಂಡಿಯಾಕ್ಕೆ ಹೆಚ್ಚು ಆದ್ಯತೆ ಸಿಗುತ್ತಿದೆ. ವಿದೇಶಿ ವಸ್ತುಗಳ ಅವಲಂಬನೆ ಕಡಿಮೆ ಮಾಡುವ ಬಗ್ಗೆ ಚರ್ಚೆ ನಡೆಯುತ್ತಿರುವಾಗ ಕೈಗಾರಿಕೆಗಳೂ ಈ ಅವಕಾಶ ಬಳಸಿಕೊಳ್ಳಬಹುದಾಗಿದೆ’ ಎಂದು ಮುರುಗೇಶ ನಿರಾಣಿ ಅಭಿಪ್ರಾಯಪಟ್ಟರು.