ಜಕಾರ್ತ: ಹುಡುಗಿಯರು ಪೊಲೀಸ್ ಹುದ್ದೆಗೆ ಸೇರುವುದೆಂದರೆ ಅದು ಹೆಮ್ಮೆಯ ಸಂಗತಿ. ಪರಿಶ್ರಮ ಹಾಗೂ ಶ್ರದ್ಧೆಯಿಂದ ಓದಿ ಪರೀಕ್ಷೆ ಬರೆದರೆ ಯಶಸ್ಸು ಖಂಡಿತ ಸಿಗುತ್ತದೆ. ಆದರೆ, ಇಂಡೋನೇಷ್ಯಾದಲ್ಲಿ ಮಹಿಳೆಯರು ಪೊಲೀಸ್ ಆಗುವುದೆಂದರೆ ಸುಲಭದ ಮಾತಲ್ಲ.
ಹೌದು. ಇಂಡೋನೇಷ್ಯಾದಲ್ಲಿ ಪೊಲೀಸ್ ಹುದ್ದೆಗೆ ಸೇರ ಬಯಸುವ 17 ರಿಂದ 22ನೇ ವಯಸ್ಸಿನವರೆಗೆ ಯಾವುದೇ ಮಹಿಳಾ ಅಭ್ಯರ್ಥಿಯು ಮದುವೆ ಆಗುವಂತಿಲ್ಲ ಮತ್ತು ಉನ್ನತ ಶಿಕ್ಷಣವನ್ನು ಪೂರ್ಣಗೊಳಿಸಿರಬೇಕು. ಅದರಲ್ಲೂ ವಿಶೇಷವಾಗಿ ಪೊಲೀಸ್ ಆಗಬೇಕೆಂದರೆ ಮಹಿಳಾ ಅಭ್ಯರ್ಥಿಗಳು ಕನ್ಯತ್ವ ಪರೀಕ್ಷೆಯಲ್ಲಿ ಪಾಸ್ ಆಗಲೇ ಬೇಕು.
ಕನ್ಯತ್ವ ಪರೀಕ್ಷೆಯನ್ನು ಎರಡು ಬೆರಳು ಪರೀಕ್ಷೆ ಎಂದು ಕರೆಯಲಾಗುತ್ತದೆ. ಪೊಲೀಸರಿಗೆ ಪ್ರವೇಶ ಪಡೆಯಲು, ಮಹಿಳೆಯರು ತಮ್ಮ ಸೌಂದರ್ಯವನ್ನು ಆಯ್ಕೆ ಸಮಿತಿಯ ಮುಂದೆ ಪ್ರದರ್ಶಿಸಬೇಕಿದೆ.
ಒಳಗೆ ಪ್ರವೇಶಿಸಿದ ಬೆರಳುಗಳ ಸಂಖ್ಯೆಯಿಂದ, ಮಹಿಳೆಯು ಸಕ್ರಿಯ ಲೈಂಗಿಕ ಜೀವನದಲ್ಲಿದ್ದಾರೆಯೇ ಎಂದು ವೈದ್ಯರು ತಮ್ಮ ಅಭಿಪ್ರಾಯವನ್ನು ನೀಡುತ್ತಾರೆ. ವೈದ್ಯರ ವರದಿ ಮೇಲೆ ಮಹಿಳಾ ಅಭ್ಯರ್ಥಿಗಳ ಪೊಲೀಸ್ ಹುದ್ದೆಯ ಭವಿಷ್ಯ ನಿರ್ಧಾರವಾಗುತ್ತದೆ. ಹೀಗಾಗಿ ಪೊಲೀಸ್ ಹುದ್ದೆ ಬಯಸುವವರು ಕನ್ಯತ್ವ ಪರೀಕ್ಷೆಯನ್ನು ಎದುರಿಸಲೇಬೇಕಿದೆ. (ಏಜೆನ್ಸೀಸ್)