ವಾಷಿಂಗ್ಟನ್ : ಕರೊನಾ ವೈರಸ್ ಚೀನಾದ ವುಹಾನ್ ಲ್ಯಾಬ್ನಿಂದ ಹೊರಬಂದಿರುವುದೆಂದು ನಾನು ಸರಿಯಾಗಿಯೇ ಹೇಳಿದ್ದೆ ಎಂದು ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿಕೆ ನೀಡಿದ್ದಾರೆ. ಚೀನಾದಲ್ಲಿ ವೈರಸ್ ಉಗಮದ ಸರಿಯಾದ ಮೂಲ ತಿಳಿಯುವ ಬಗ್ಗೆ ನಡೆಯುತ್ತಿರುವ ಮತ್ತೊಂದು ಸುತ್ತಿನ ವಿವಾದದ ಹಿನ್ನೆಲೆಯಲ್ಲಿ ಟ್ರಂಪ್ ಈ ಮಾತು ಹೇಳಿದ್ದಾರೆ.
ಅಧ್ಯಕ್ಷನಾಗಿದ್ದಾಗ ತಾವು ಕರೊನಾ ವೈರಸ್ ವುಹಾನ್ ಲ್ಯಾಬ್ನಿಂದ ಬಂದಿದೆ ಎಂದು ಹೇಳಿದ್ದರ ಬಗ್ಗೆ ಈಗ ಎಲ್ಲರೂ ಸಹಮತ ವ್ಯಕ್ತಪಡಿಸುತ್ತಿದ್ದಾರೆ ಎಂದಿರುವ ಟ್ರಂಪ್, ಈ ಲ್ಯಾಬ್ ಲೀಕ್ನಿಂದ ಸಂಭವಿಸಿರುವ ಸಾವು ಮತ್ತು ನಷ್ಟಗಳಿಗಾಗಿ ಚೀನಾದ ಮೇಲೆ ದಂಡ ವಿಧಿಸಬೇಕು ಎಂದು ಆಗ್ರಹಿಸಿದ್ದಾರೆ.
"ಅಮೆರಿಕದ ಕರೊನಾ ವೈರಸ್ ಕುರಿತ ಸಲಹೆಗಾರ ಡಾ. ಅಂಥೋನಿ ಫಾಸಿ ಮತ್ತು ಚೀನಾದ ನಡುವಿನ ಮಾತುಕತೆಗಳನ್ನು ಕಡೆಗಣಿಸುವಂತಿಲ್ಲ. ತಾನು ಉಂಟುಮಾಡಿರುವ ಸಾವು ಮತ್ತು ಹಾನಿಗಾಗಿ ಅಮೆರಿಕಕ್ಕೆ ಮತ್ತು ಜಗತ್ತಿಗೆ 10 ಟ್ರಿಲಿಯನ್ ಡಾಲರ್ಗಳನ್ನು ಚೀನಾ ಪಾವತಿಸಬೇಕು" ಎಂದಿದ್ದಾರೆ ಟ್ರಂಪ್.
2020 ರ ಜನವರಿಯಿಂದ ಜೂನ್ವರೆಗಿನ ಅವಧಿಯ ಡಾ.ಫಾಸಿ ಅವರ 3000 ಕ್ಕೂ ಹೆಚ್ಚು ಪುಟಗಳ ಖಾಸಗಿ ಈಮೇಲ್ಗಳನ್ನು ಮಾಧ್ಯಮದವರು ಇದೀಗ ಹೊರಗೆಳೆದಿದ್ದಾರೆ. ಅದರಲ್ಲಿ ಕೋವಿಡ್ 19 ವೈರಾಣು, ಚೀನಾದ ವುಹಾನ್ನಲ್ಲಿರುವ ಲ್ಯಾಬ್ನಿಂದ ಲೀಕ್ ಆದ ಬಗ್ಗೆ ಮಾತನಾಡಿದ್ದಾರೆ ಎನ್ನಲಾಗಿದೆ. ಕಳೆದ ವರ್ಷ ಯಾವುದೇ ಪುರಾವೆ ಸಿಕ್ಕಿಲ್ಲ ಎಂದು ಈ ವಾದವನ್ನು ತಳ್ಳಿಹಾಕಲಾಗಿತ್ತು.
ಆದರೆ ಇತ್ತೀಚಿನ ದಿನಗಳಲ್ಲಿ, ಅಧಿಕೃತವಾಗಿ ಕರೊನಾ ವೈರಸ್ ಗುರುತಿಸಲ್ಪಡುವುದಕ್ಕೆ ವಾರಗಳ ಮೊದಲು ವುಹಾನ್ ಸಂಶೋಧಕರಲ್ಲಿ ಕೋವಿಡ್-ಸಂಬಂಧಿತ ಕಾಯಿಲೆ ಕಂಡುಬಂದಿದ್ದವೆಂಬ ವರದಿಗಳು ಬಂದಿವೆ. ಜೊತೆಗೆ ವೈರಸ್ನ ಉಗಮದ ಬಗ್ಗೆ ಡಬ್ಲ್ಯೂಎಚ್ಒ ನೇತೃತ್ವದಲ್ಲಿ ನಡೆದ ಅಂತರರಾಷ್ಟ್ರೀಯ ತನಿಖೆಯ ಫಲಿತಾಂಶವು ನಿರ್ಣಾಯಕವಾಗಿ ಏನನ್ನೂ ಹೇಳಿಲ್ಲ. ಆದ್ದರಿಂದ ಕರೊನಾ ವೈರಸ್ ವುಹಾನ್ ಲ್ಯಾಬ್ನಿಂದ ಲೀಕಾಗಿದೆ ಎಂಬ ವಾದ ಮತ್ತೊಮ್ಮೆ ಮಹತ್ವ ಪಡೆದಿದೆ. (ಏಜೆನ್ಸೀಸ್)