ನವದೆಹಲಿ : ತಮ್ಮ ಲಸಿಕೆಗಳಿಂದ ಅಡ್ಡಪರಿಣಾಮಗಳುಂಟಾದಲ್ಲಿ ಕಾನೂನು ಕ್ರಮದಿಂದ ವಿನಾಯಿತಿ ನೀಡಬೇಕೆಂದು ಭಾರತ ಸರ್ಕಾರಕ್ಕೆ ಫೈಜರ್ ಮತ್ತು ಮಾಡರ್ನ ಲಸಿಕೆ ಕಂಪೆನಿಗಳು ಬೇಡಿಕೆ ಇಡುತ್ತಿವೆ. ಇದೀಗ ಭಾರತೀಯ ಲಸಿಕೆ ಕೋವಿಶೀಲ್ಡ್ನ ಉತ್ಪಾದಕ ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯ(ಎಸ್ಐಐ) ತನಗೂ ಈ ರೀತಿಯ ವಿನಾಯಿತಿಯನ್ನು ವಿಸ್ತರಿಸಬೇಕೆಂದು ಕೋರಿದೆ ಎನ್ನಲಾಗಿದೆ.
ಭಾರತೀಯ ಕಂಪೆನಿಯಾಗಲಿ ಅಥವಾ ವಿದೇಶೀ ಕಂಪೆನಿಯಾಗಲಿ, ಎಲ್ಲಾ ಲಸಿಕೆ ಉತ್ಪಾದಕರಿಗೂ ಒಂದೇ ರೀತಿಯ ರಕ್ಷಣೆ ಒದಗಿಸಬೇಕು ಎಂದು ಆಡಾರ್ ಪೂನಾವಲ್ಲಾ ನೇತೃತ್ವದ ಎಸ್ಐಐ ಕೇಂದ್ರ ಸರ್ಕಾರಕ್ಕೆ ಹೇಳಿದೆ ಎಂದು ಮೂಲಗಳು ತಿಳಿಸಿವೆ. ಒಂದು ಪಕ್ಷ ವಿದೇಶೀ ಕಂಪೆನಿಗಳಿಗೆ ಇಂಡೆಮ್ನಿಟಿ ಪ್ರೊಟೆಕ್ಷನ್ ನೀಡಿದಲ್ಲಿ ಎಸ್ಐಐಗೆ ಮಾತ್ರವಲ್ಲ, ಎಲ್ಲ ಲಸಿಕೆ ಕಂಪೆನಿಗಳಿಗೂ ಈ ರಕ್ಷಣೆ ಸಿಗಬೇಕು; ನಿಯಮಗಳು ಎಲ್ಲರಿಗೂ ಒಂದೇ ತೆರನಾಗಿರಬೇಕು ಎಂದು ಸೀರಮ್ ಕಂಪೆನಿ ಆಶಿಸುತ್ತಿದೆ ಎನ್ನಲಾಗಿದೆ.
ಇದನ್ನೂ ಓದಿ: ಆಯುರ್ವೇದ ಕರೊನಾ ಔಷಧಕ್ಕೆ ಮುಗಿಬಿದ್ದ ವಿದೇಶಿಗರು- ಆನಂದಯ್ಯನವರಿಗೆ ಬಿಗಿ ಭದ್ರತೆ: ಹಳ್ಳಿಯಿಂದ ಶಿಫ್ಟ್!
ಆಕ್ಸ್ಫರ್ಡ್ ಆಸ್ಟ್ರಾಜೆನೆಕಾದ ಕರೊನಾ ಲಸಿಕೆಗೆ ಕೋವಿಶೀಲ್ಡ್ ಎಂಬ ಭಾರತೀಯ ಹೆಸರು ನೀಡಿ ಎಸ್ಐಐ ಉತ್ಪಾದನೆ ಮಾಡುತ್ತಿದೆ. ಜೊತೆಗೆ ಇನ್ನೂ ಮೂರು ಹೊಸ ಆ್ಯಂಟಿ ಕೋವಿಡ್ ಲಸಿಕೆಗಳ ಟ್ರಯಲ್ಗಳನ್ನೂ ಕಂಪೆನಿ ನಡೆಸುತ್ತಿದೆ. ನೊವೊವಾಕ್ಸ್ ಔಷಧ ಕಂಪೆನಿಯ ಸಹಯೋಗದೊಂದಿಗೆ ‘ಕೊವೊವಾಕ್ಸ್’ ಅನ್ನು ಅಭಿವೃದ್ಧಿಪಡಿಸಲು ಅಡ್ವಾನ್ಸಡ್ ಟ್ರಯಲ್ಸ್ ನಡೆಯುತ್ತಿದೆ. ಸಿಂಗಲ್-ಡೋಸ್ ನೇಸಲ್ ವ್ಯಾಕ್ಸಿನ್ ಆದ ‘ಕೊಡಜೆನಿಕ್ಸ್’ ಇಂಗ್ಲೆಂಡಿನಲ್ಲಿ 1/2 ಹಂತದ ಪ್ರಯೋಗಗಳಲ್ಲಿದೆ. ಮೂರನೆಯದಾಗಿ, ‘ಸ್ಪೈಬಯೋಟೆಕ್’ ಎಂಬ ಪಾರ್ಟಿಕಲ್ ವ್ಯಾಕ್ಸಿನ್ ಕೂಡ ಪ್ರಯೋಗದಲ್ಲಿದೆ ಎನ್ನಲಾಗಿದೆ.
ಲೀಗಲ್ ಇನ್ಡೆಮ್ನಿಟಿ : ಲೀಗಲ್ ಇನ್ಡೆಮ್ನಿಟಿ ನೀಡಿದರೆ ಲಸಿಕೆ ತೆಗೆದುಕೊಂಡಾಗ ಯಾರಿಗಾದರೂ ಗಂಭೀರ ಅಡ್ಡಪರಿಣಾಮ ಉಂಟಾದರೆ ಉತ್ಪಾದಕನ ವಿರುದ್ಧ ಕಾನೂನು ಕ್ರಮ ತೆಗೆದುಕೊಳ್ಳಲು ಸಾಧ್ಯವಾಗುವುದಿಲ್ಲ. ಈ ರೀತಿಯ ರಕ್ಷಣೆಯನ್ನು ಭಾರತ ಸರ್ಕಾರ ಈವರೆಗೆ ಯಾವುದೇ ಕಂಪೆನಿಗೆ ನೀಡಿಲ್ಲ. ಆದರೆ ಭಾರತಕ್ಕೆ ಲಸಿಕೆ ಪೂರೈಸಬೇಕೆಂದರೆ ಈ ರಕ್ಷಣೆ ಒದಗಿಸಲೇಬೇಕೆಂದು ಫೈಜರ್ ಮತ್ತು ಮಾಡರ್ನ ಕಂಪೆನಿಗಳು ಪಟ್ಟು ಹಿಡಿದಿವೆ. ಅಮೆರಿಕ ಮತ್ತು ಇತರ ದೇಶಗಳಲ್ಲಿ ನೀಡಲಾಗಿರುವ ಈ ವಿನಾಯಿತಿಯನ್ನು ಭಾರತದಲ್ಲೂ ನೀಡಲು ಯಾವುದೇ ಸಮಸ್ಯೆ ಇಲ್ಲ ಎಂಬುದಾಗಿ ನಿನ್ನೆ ಕೇಂದ್ರ ಸಚಿವಾಲಯದ ಮೂಲಗಳು ಹೇಳಿದ್ದವು ಎನ್ನಲಾಗಿದೆ. (ಏಜೆನ್ಸೀಸ್)
ಸೈಬರ್ ಕಳ್ಳರ ಬ್ಯಾಂಕ್ ಖಾತೆಗೆ ಖಾಕಿ ಲಾಕ್! 112 ಅಥವಾ 100 ಗೆ ಕರೆ ಮಾಡಿ, ಹಣ ಉಳಿಸಿಕೊಳ್ಳಿ!