ನವದೆಹಲಿ: ಗಂಡ ಮಾರ್ಕೆಟ್ನಲ್ಲಿ ಬೇರೆ ಹೆಂಗಸಿನ ಜತೆಗೆ ಇದ್ದಿದ್ದನ್ನು ಆಕಸ್ಮಿಕವಾಗಿ ಕಂಡ ಹೆಂಡತಿ ಬೀದಿರಂಪ ಮಾಡಿದ್ದಲ್ಲದೆ, ಗಂಡನ ಜತೆ ಕಿತ್ತಾಡಿಕೊಂಡಿದ್ದಾಳೆ. ಗಂಡ-ಹೆಂಡಿರ ಜಗಳವನ್ನು ಕಂಡ ಸ್ಥಳೀಯರು ಠಾಣೆಗೆ ಕರೆ ಮಾಡಿ ತಿಳಿಸಿ, ಇಬ್ಬರನ್ನೂ ಪೊಲೀಸರಿಗೆ ಒಪ್ಪಿಸಿದ್ದಾರೆ. ವಿಶೇಷವೆಂದರೆ ಇಬ್ಬರೂ ಮದುವೆಯಾಗಿ ಒಂದು ವರ್ಷವಷ್ಟೇ ಕಳೆದಿದ್ದು, ಅಷ್ಟರೊಳಗೆ ಸಂಸಾರದಲ್ಲಿ ಸಾಕಷ್ಟು ಭಿನ್ನಾಭಿಪ್ರಾಯ ಉಂಟಾಗಿದ್ದಲ್ಲದೆ, ಇದೀಗ ಬೀದಿರಂಪವೂ ನಡೆದುಹೋಗಿದೆ. ಪರಿಣಾಮ, ಪತಿ ಅದ್ನಾನ್ ಹಾಗೂ ಪತ್ನಿ ಆಯೇಷಾ ಇಬ್ಬರೂ ಪೊಲೀಸ್ ಠಾಣೆ ಮೆಟ್ಟಿಲೇರುವಂತಾಗಿದೆ.
ಅದ್ನಾನ್ ಹಾಗೂ ಆಯೇಷಾಗೆ 2020ರ ಫೆಬ್ರವರಿಯಲ್ಲಿ ಮದುವೆಯಾಗಿತ್ತು. ಆದರೆ ಆ ಬಳಿಕ ಇಬ್ಬರ ನಡುವೆ ಭಿನ್ನಾಭಿಪ್ರಾಯ ಉಂಟಾಗಿದ್ದು, ಅದ್ನಾನ್ ಆಯೇಷಾಳನ್ನು ಆಕೆಯ ತವರು ಮನೆಯಲ್ಲಿ ಬಿಟ್ಟಿದ್ದ. ಆದರೆ ಇಂದು ಪತಿ ಇನ್ನೊಬ್ಬಳೊಂದಿಗೆ ಮಾರುಕಟ್ಟೆಯಲ್ಲಿ ಕಾಣಿಸಿದ್ದೇ ಪತ್ನಿಯ ಸಿಟ್ಟು ನೆತ್ತಿಗೇರಲು ಕಾರಣವಾಗಿದೆ.
ಪೊಲೀಸ್ ಠಾಣೆಯಲ್ಲೂ ಗಂಡ-ಹೆಂಡತಿ ವಾಗ್ವಾದ ಮುಂದುವರಿದಿದೆ. ಇಬ್ಬರ ಮಧ್ಯೆ ವಿಚ್ಛೇದನದ ಅರ್ಜಿ ಪ್ರಕ್ರಿಯೆ ಜಾರಿಯಲ್ಲಿದೆ ಎಂದು ಗಂಡ ಹೇಳಿದರೆ, ಎಲ್ಲಿ ಡೈವೋರ್ಸ್ ಪೇಪರ್ ತೋರಿಸು ಎಂದು ಹೆಂಡತಿ ಪ್ರಶ್ನಿಸಿದ್ದಾಳೆ. ಡೈವೋರ್ಸ್ ಅರ್ಜಿ ಈಗಾಗಲೇ ನೀಡಲಾಗಿದೆ, ಆ ಬಗ್ಗೆ ನೀನಿನ್ನೂ ಸಹಿ ಹಾಕಿಲ್ಲ ಎಂದು ಗಂಡ ದಬಾಯಿಸಿದ್ದಾನೆ. ಇಬ್ಬರ ಮಧ್ಯೆ ಡೈವೋರ್ಸ್ಗೆ ನಿರ್ಧಾರವಾಗಿದ್ದು, ಪ್ರಕ್ರಿಯೆ ಜಾರಿಯಲ್ಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. (ಏಜೆನ್ಸೀಸ್)