ನವದೆಹಲಿ: ಉತ್ತರ ಕೊರಿಯಾದ ಸರ್ವಾಧಿಕಾರಿ ಕಿಮ್ ಜಾಂಗ್ ಅನ್ ನಿಧನದ ಸುದ್ದಿ ಇನ್ನೂ ಖಚಿತ ಪಟ್ಟಿಲ್ಲ. ಆದರೆ, ಆತನ ನಂತರದ ಸ್ಥಾನದಲ್ಲಿರುವ ಸಹೋದರಿ ಕಿಮ್ ಯೋ ಜಾಂಗ್ ಆಡಳಿತ ಹೇಗಿರಬಹುದು ಎಂಬ ಚರ್ಚೆ ವಿಶ್ವದೆಲ್ಲೆಡೆ ಈಗಾಗಲೇ ಶುರುವಾಗಿದೆ.
ಕಿಮ್ ಜಾಂಗ್ ಅನ್ ಆರೋಗ್ಯ ಸಂಪೂರ್ಣ ಬಿಗಡಾಯಿಸಿದ್ದು, ಕೋಮಾಗೆ ಜಾರಿದ್ದಾನೆ. ಈ ಕಾರಣಕ್ಕೆ ಜಾಗತಿಕ ತಜ್ಞರು ಉತ್ತರ ಕೊರಿಯಾದ ಭವಿಷ್ಯವೇನು ಎಂದು ಚರ್ಚೆ ನಡೆಸಿದ್ದಾರೆ. ಜತೆಗೆ, ಇಲ್ಲಿ ಆಳ್ವಿಕೆ ಬದಲಾಗುವುದೆಂದರೆ ಜಗತ್ತು ಅದನ್ನು ಹೇಗೆ ಅರ್ಥೈಸಬೇಕು ಎಂದೆಲ್ಲ ವಿಶ್ಲೇಷಿಸಲಾಗುತ್ತಿದೆ. ಕಿಮ್ ತನ್ನ ಸಹೋದರಿಗೆ ಅಧಿಕಾರ ಹಸ್ತಾಂತರಿಸಿದ್ದಾನೆ ಎಂದು ಹೇಳಲಾಗುತ್ತಿರುವುದು ಕೂಡ ಕಳವಳಕ್ಕೆ ಕಾರಣವಾಗಿದೆ.
ಕುಟುಂಬದ ಹಿನ್ನೆಲೆ ಹಾಗೂ ಈವರೆಗಿನ ಇತಿಹಾಸವನ್ನು ಗಮನಿಸುವುದಾದರೆ ಈಕೆಯೂ ಕೂಡ ದಬ್ಬಾಳಿಕೆಯ ಸರ್ವಾಧಿಕಾರವನ್ನೇ ನಡೆಸಲಿದ್ದಾಳೆ ಎನ್ನುತ್ತಾರೆ ಅಮೆರಿಕದ ನಿವೃತ್ತ ಸೇನಾಧಿಕಾರಿ ಕರ್ನಲ್ ಡೇವಿಡ್ ಮ್ಯಾಕ್ಸ್ವೆಲ್.
ಉತ್ತರ ಕೊರಿಯಾದ ಉತ್ತರಾಧಿಕಾರಿ ಮಹಿಳೆಯಾಗಿದ್ದರೂ, ಆಡಳಿತ ಸ್ವರೂಪವನ್ನು ಗಮಿಸಿದರೆ, ಆಕೆ ಆರಂಭದ ಕೆಲ ವರ್ಷಗಳ ಕಾಲವಾದರೂ ನಿಷ್ಕರುಣಿಯಾಗಬೇಕಾಗುತ್ತದೆ ಎಂದು ವಿಶ್ಲೇಷಿಸುತ್ತಾರೆ ಅಮೆರಿಕದ ಟಫ್ಟ್ಸ್ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಸಂಗ್ ಯೂನ್ ಲೀ.
ಅಲ್ಲಿನ ಈವರೆಗಿನ ಆಳ್ವಿಕೆಯಲ್ಲಿ ಅತ್ಯಂತ ಕಠಿಣ ಕ್ರಮಗಳನ್ನು ಜಾರಿಗೊಳಿಸಲಾಗಿದೆ. ಜತೆಗೆ, ನಿಯಮ ಉಲ್ಲಂಘಿಸಿದವರ ವಿರುದ್ಧ ಕಠೋರವಾಗಿ ನಡೆಸಿಕೊಂಡ ಉದಾಹರಣೆಗಳಿವೆ.
ಈ ನಡುವೆ ಕಿಮ್ ಜಾಂಗ್ ಅನ್ ಈಗಾಗಲೇ ಮೃತಪಟ್ಟಿದ್ದಾನೆ ಎಂದು ಹಲವು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಪ್ರಾಮಾಣಿಕವಾಗಿ ಹೇಳುವುದಾದರೆ, ಕಿಮ್ ಮೃತಪಟ್ಟಿದ್ದಾನೆ. ಆದರೆ, ನೀವು ಪ್ರಸ್ತುತ ಉತ್ತರ ಕೊರಿಯಾದಲ್ಲಿದ್ದರೂ ಅದನ್ನು ಖಚಿತಪಡಿಸಲು ಸಾಧ್ಯವಿಲ್ಲ ಎನ್ನುವುದು ಕೂಡ ಸತ್ಯ ಎಂದು ಬಿಬಿಸಿಯ ಮಾಜಿ ಪತ್ರಕರ್ತ ಹೇಳಿದ್ದಾನೆ. ಆದರೆ, ಇನ್ನೊಂದು ಮೂಲದ ಪ್ರಕಾರ, ಕಿಮ್ ಕೋಮಾಗೆ ಜಾರಿರುವುದು ಹಾಗೂ ಸಾವಿನ ಸಂಗತಿ ಎರಡೂ ಸುಳ್ಳಾಗಿರಬಹುದು ಎಂದೇ ಹೇಳಲಾಗುತ್ತಿದೆ.