ಮಧುಮೇಹ ಬಂದರೆ ಸಮಸ್ಯೆ ಇಲ್ಲ. ಆದರೆ, ಆಹಾರಕ್ರಮ, ಉತ್ತಮ ಜೀವನಶೈಲಿ ಹಾಗೂ ನಿಯಮಿತ ಔಷಧ-ತಪಾಸಣೆ ಮೂಲಕ ಯಾರು ಎಚ್ಚರಿಕೆಯಿಂದ ಇರುತ್ತಾರೋ ಅಂತಹವರು ದೀರ್ಘಕಾಲ ಆರೋಗ್ಯಕರ ಜೀವನ ನಡೆಸಿರುವುದು ಅಧ್ಯಯನದಿಂದ ದೃಢಪಟ್ಟಿದೆ. ಆದ್ದರಿಂದ ಮಧುಮೇಹ ನಿಯಂತ್ರಣಕ್ಕೆ ಆರೋಗ್ಯಕರ ಜೀವನಶೈಲಿ ಬಹಳ ಮುಖ್ಯವಾಗುತ್ತದೆ. ಯಾರು ಮಧುಮೇಹವನ್ನು ಹತೋಟಿಯಲ್ಲಿ ಇಟ್ಟುಕೊಳ್ಳುತ್ತಾರೋ ಅಂತಹವರು ಆತಂಕ ಪಡುವ ಅಗತ್ಯವಿಲ್ಲ. ಹಾಗೆಯೇ ಯಾರು ಹತೋಟಿ ತಪು್ಪತ್ತಾರೋ ಅವರಿಗೆ ಅಪಾಯವೂ ತಪ್ಪಿದ್ದಲ್ಲ ಎಂದು ಆಯುರ್ವೆದ ತಜ್ಞ ಡಾ. ವೆಂಕಟರಮಣ ಹೆಗಡೆ ಎಚ್ಚರಿಸಿದ್ದಾರೆ.
ಭಾರತದಲ್ಲಿ ಟೈಪ್-1 ಡಯಾಬಿಟೀಸ್ ಹೊಂದಿರುವವರ ಸಂಖ್ಯೆ 1.79 ಲಕ್ಷ (ಶೇ.1 ರಿಂದ 2), ಟೈಪ್-2 ಡಯಾಬಿಟೀಸ್ ಹೊಂದಿದವರು 77 ದಶಲಕ್ಷ ಮಂದಿ ಇದ್ದಾರೆ. ಆದರೆ ಅರಿವಿನ ಕೊರತೆ ಹಾಗೂ ನಿರ್ಲಕ್ಷ್ಯದಿಂದಾಗಿ ಬಹಳಷ್ಟು ಮಂದಿ ಮಧುಮೇಹ ಗಂಭೀರ ಸ್ಥಿತಿ ತಲುಪಿದಾಗ ಬರುತ್ತಾರೆ. ಹಾಗಾಗಿ ಈ ಬಗ್ಗೆ ಜನರಲ್ಲಿ ಇನ್ನಷ್ಟು ಜಾಗೃತಿ ಮೂಡಿಸುವ ಅಗತ್ಯವಿದೆ. ಹಾಗೂ ಸರ್ಕಾರದಿಂದ ಎಲ್ಲರಿಗೂ ಉಚಿತ ಚಿಕಿತ್ಸೆ ಹಾಗೂ ಔಷಧ ಒದಗಿಸುವ ಕೆಲಸವಾಗಬೇಕು ಎಂದು ಕರ್ನಾಟಕ ಇನ್ಸ್ಟಿಟ್ಯೂಟ್ ಆಫ್ ಎಂಡೋಕ್ರೖೆನಾಲಜಿ ಆಂಡ್ ರಿಸರ್ಚ್ನ ಮಧುಮೇಹ ವಿಭಾಗದ ಮುಖ್ಯಸ್ಥರಾದ ಡಾ.ಆರ್.ಅನಿಲ್ ಕುಮಾರ್ ಹೇಳಿದರು.
ಇಂದು (ನ.14) ವಿಶ್ವ ಮಧುಮೇಹ ದಿನವನ್ನು ಮಾತ್ರ ಆಚರಿಸುತ್ತಿಲ್ಲ. ಇನ್ಸುಲಿನ್ ಆವಿಷ್ಕಾರವಾಗಿ 100ನೇ ವರ್ಷದ ಆಚರಣೆಯೂ ಆಗಿದೆ. ಹಾಗಾಗಿ ಈ ದಿನ ಬಹಳ ಮಹತ್ವ ಪಡೆದುಕೊಂಡಿದೆ. ಇನ್ಸುಲಿನ್ ಕಂಡು ಹಿಡಿದ ಫ್ರೆಡೆರಿಕ್ ಬ್ಯಾಂಟಿಂಗ್ ಅವರ ಜನ್ಮದಿನದಂದೇ ವಿಶ್ವ ಮಧುಮೇಹ ದಿನ ಆಚರಿಸಲಾಗುತ್ತಿದೆ.
ಉಪವಾಸ ಸಲ್ಲ: ಮಧುಮೇಹಿಗಳು ಉಪವಾಸ ಮಾಡುವುದು ಒಳ್ಳೆಯದಲ್ಲ. ಊಟದ ಬದಲಿಗೆ ಹಣ್ಣು, ತರಕಾರಿ ಸೇವಿಸಬಹುದು. ಆದರೆ ಯಾವುದೇ ಕಾರಣಕ್ಕೂ ಉಪವಾಸ ಮಾಡಬಾರದು.
ಊಟಕ್ಕೆ ಮುಂಚೆ ರಕ್ತದಲ್ಲಿ ಸಕ್ಕರೆ ಅಂಶ 126 ಎಂಜಿ ಪರ್ ಡಿಲ್ ಅದಕ್ಕಿಂತ ಹೆಚ್ಚಿದ್ದರೆ, ಎಚ್ಬಿ ಎ1ಸಿ ಮೂರು ತಿಂಗಳ ಸರಾಸರಿ ಸಕ್ಕರೆ ಅಂಶ 6.5ಗಿಂತ ಹೆಚ್ಚಿದ್ದರೆ ಅಂತಹವರಲ್ಲಿ ಮಧುಮೇಹ ಇರುತ್ತದೆ. ಯಾರಲ್ಲಿ ಊಟಕ್ಕೆ ಮುಂಚೆ ರಕ್ತದಲ್ಲಿ ಸಕ್ಕರೆ ಅಂಶ 70-100 ಎಂಜಿ ಪರ್ ಡಿಲ್ ಹಾಗೂ ಊಟದ ನಂತರ 140 ಎಂಜಿ ಪರ್ ಡಿಲ್ ಇರುತ್ತದೋ ಅವರು ಆರೋಗ್ಯವಂತರು. ಮಧುಮೇಹದ ಸಮಸ್ಯೆ ಇರುವುದಿಲ್ಲ. ಮಧುಮೇಹಿಗಳು ಆಹಾರಕ್ರಮ, ಯೋಗ ಹಾಗೂ ಚಿಕಿತ್ಸೆ ಮತ್ತು ಔಷಧ ಸೇವನೆ ಮೂಲಕ ಎಚ್ಬಿ ಎ1ಸಿ 6.5 ಇರಬೇಕು. ರಕ್ತದ ಒತ್ತಡ 140/90 ಎಂ.ಎಂ. ಎಲ್ಡಿಎಲ್ ಆಥವಾ ಬ್ಯಾಡ್ ಕೊಲೆಸ್ಟ್ರಾಲ್ 100 ಎಂಜಿ ಪರ್ ಡಿಎಲ್ಗಿಂತ ಕಡಿಮೆ ಇರಬೇಕು. ಹೀಗೆ ಯಾರು ನಿಯಂತ್ರಣದಲ್ಲಿಟ್ಟುಕೊಳ್ಳುತ್ತರೋ ಅಂತಹವರಲ್ಲಿ ಹೃದಯ, ಕಿಡ್ನಿ, ಕಣ್ಣು, ನರ ಹಾನಿಯಾಗದಂತೆ ತಡೆಗಟ್ಟಬಹುದು.
ಮಧುಮೇಹದ ಪ್ರಮುಖ ರೋಗಲಕ್ಷಣಗಳು ಏನು?
-ಅತಿಯಾದ ಮೂತ್ರವಿಸರ್ಜನೆ, ಬಾಯಾರಿಕೆ, ಹಸಿವು, ದೃಷ್ಟಿ ಮಂಜಾಗುವಿಕೆ, ತೂಕ ಇಳಿಕೆಯಾಗುವುದು, ಬೆವರು, ಸುಸ್ತು, ಗಾಯ ಆದಲ್ಲಿ ಬೇಗ ವಾಸಿಯಾಗದಿರುವುದು, ಗಡಸುಚರ್ಮ, ಕೈ ಕಾಲುಗಳು ಜುಮ್ ಎನ್ನುವುದು ಪ್ರಮುಖ ಲಕ್ಷಣಗಳಾಗಿವೆ. ಆದರೆ ಶೇ.50 ಮಂದಿಯಲ್ಲಿ ಈ ಯಾವ ಲಕ್ಷಣಗಳು ಇರುವುದೇ ಇಲ್ಲ. ಅಂತಹವರಿಗೆ ಸಾಮಾನ್ಯ ರಕ್ತ ಪರೀಕ್ಷೆಯಿಂದ ಪತ್ತೆ ಆಗುತ್ತದೆ. ಹಾಗಾಗಿ 35 ವರ್ಷ ಮೇಲ್ಪಟ್ಟವರು ವರ್ಷಕ್ಕೆ 2 ಬಾರಿ ಪರೀಕ್ಷೆ ಮಾಡಿಸಿಕೊಳ್ಳುವುದು ಒಳ್ಳೆಯದು.
ಲಾಕ್ಡೌನ್ ಸಂದರ್ಭದಲ್ಲಿ ಮಧುಮೇಹ ಪ್ರಕರಣ ಹೆಚ್ಚಾಗಲು ಕಾರಣವೇನು?
-ಹೌದು, ದುರ್ದೈವದ ಸಂಗತಿ ಎಂದರೆ ದೇಶ ಈಗಾಗಲೇ ಮಧುಮೇಹದ ರಾಜಧಾನಿ ಆಗುತ್ತಿದೆ. ಲಾಕ್ಡೌನ್ ಸಂದರ್ಭದಲ್ಲಿ ಇದು ಇನ್ನಷ್ಟು ಹೆಚ್ಚಿದೆ. ಹೆಚ್ಚು ಕಾಲ ಮನೆಯಲ್ಲೇ ಇದ್ದು, ವ್ಯಾಯಾಮ ಸೇರಿದಂತೆ ದೈಹಿಕ ಚಟುವಟಿಕೆಗಳಿಲ್ಲ, ಅನಿಯಮಿತ ಆಹಾರ ಸೇವನೆಯಿಂದ ಲಾಕ್ಡೌನ್ ಸಂದರ್ಭದಲ್ಲಿ ಮಧುಮೇಹ ಪ್ರಕರಣಗಳು ಹೆಚ್ಚಾಗಿವೆ. ಇದಲ್ಲದೆ ಕೋವಿಡ್ ಸೋಂಕಿತರಿಗೆ ಚಿಕಿತ್ಸೆ ನೀಡುವ ಮೇಳೆ ಹೆಚ್ಚು ಸ್ಟಿರಾಯಿಡ್ ಬಳಕೆಯಿಂದಲೂ ಮಧುಮೇಹ ಪ್ರಕರಣಗಳು ಹೆಚ್ಚಾಗಿವೆ.
ಮಧುಮೇಹ ಯಾರಲ್ಲಿ ಬರುತ್ತದೆ? ಕಾರಣವೇನು?
-ಬದಲಾದ ಜೀವನಶೈಲಿ, ಸರಿಯಾದ ಆಹಾರಕ್ರಮ, ದೈಹಿಕ ಶ್ರಮದ ಶಿಸ್ತು ಇಲ್ಲದವರಲ್ಲಿ ಮಧುಮೇಹ ಬರುವ ಸಾಧ್ಯತೆಗಳು ಹೆಚ್ಚು. ಇದಲ್ಲದೆ ವಂಶವಾಹಿನಿಯಿಂದಲೂ ಮಧುಮೇಹ ಬರುತ್ತದೆ. ಹಿಂದೆಲ್ಲ 60-70 ವರ್ಷ ಮೇಲ್ಪಟ್ಟವರಲ್ಲಿ ಬರುತ್ತಿತ್ತು. ಇಂದು ಯುವಜನರಲ್ಲೂ ಬರುತ್ತಿದೆ. ಕಾರಣ ಜೀವನಕ್ರಮದಲ್ಲಿನ ಬದಲಾವಣೆ. ನಗರ ಪ್ರದೇಶ ಅಲ್ಲದೆ ಗ್ರಾಮೀಣ ಪ್ರದೇಶದ ಜನರಲ್ಲೂ ಮಧುಮೇಹ ಹೆಚ್ಚುತ್ತಿದೆ. ಹಾಗಾಗಿ ನಗರ ಪ್ರದೇಶದಲ್ಲಿ ಮಾತ್ರವಲ್ಲದೆ ರಾಜ್ಯದ ಎಲ್ಲ ಭಾಗಗಳಲ್ಲೂ ಮಧುಮೇಹ ಆರೈಕೆಯ ಅಗತ್ಯವಿದೆ. ಈ ನಿಟ್ಟಿನಲ್ಲಿ ಸರ್ಕಾರ ಕ್ರಮ ಕೈಗೊಳ್ಳುವ ಮೂಲಕ ದೇಶವನ್ನು ಮಧುಮೇಹ ಅರೈಕೆಯ ರಾಜಧಾನಿಯನ್ನಾಗಿ ಮಾಡಬೇಕಿದೆ.
ಆಹಾರದಲ್ಲಿ ಕಾರ್ಬೆಹೈಡ್ರೇಟ್ಸ್ ಪ್ರಮಾಣ ಕಡಿಮೆಗೊಳಿಸಿ ನಿಧಾನವಾಗಿ ಜೀರ್ಣವಾಗುವ ಅಹಾರವನ್ನು ತೆಗೆದುಕೊಳ್ಳಬೇಕು. ಅದರಂತೆ ಹೆಚ್ಚು ಪ್ರೋಟಿನ್ ಹಾಗೂ ಫೈಬರ್ಯುುಕ್ತ ಆಹಾರ ಸೇವಿಸಬೇಕು. ಸಿಹಿಪದಾರ್ಥಗಳನ್ನು ತ್ಯಜಿಸುವುದು ಉತ್ತಮ. ಎಲ್ಲ ಬಗೆಯ ದ್ವಿದಳ ಧಾನ್ಯಗಳು, ಹಣ್ಣು ಮತ್ತು ತರಕಾರಿ ಹಾಗೂ ಒಣಹಣ್ಣುಗಳನ್ನು ಸೇವಿಸುವುದು ಒಳ್ಳೆಯದು. ಸಿಹಿಅಂಶ ಹೆಚ್ಚಿರುವ ಮಾವು, ಹಲಸು, ಸಪೋಟದಂತಹ ಹಣ್ಣುಗಳನ್ನು ತಿನ್ನುವುದಾದರೆ ಒಂದು ಹೊತ್ತಿನ ಊಟ ತ್ಯಜಿಸಿ ತಿನ್ನಬಹುದು. ಬೆಳಗ್ಗೆ ಎದ್ದಾಗ ನೀರು ಕುಡಿಯಬೇಕು. ಮೆಂತ್ಯೆಕಾಳನ್ನು ನೆನೆಸಿ ಬಿಸಿಲಿನಲ್ಲಿ ಒಣಗಿಸಿ ಪುಡಿ ಮಾಡಿ ಮಜ್ಜಿಗೆಯೊಂದಿಗೆ ದಿನಕ್ಕೆ ಎರಡು ಬಾರಿ ಸೇವಿಸುವುದು ಉತ್ತಮ. ಗೋಧಿ, ರಾಗಿ, ಜೋಳ, ಅಕ್ಕಿ ಪ್ರಮಾಣ ಕಡಿಮೆ ಮಾಡಿ ಹೆಚ್ಚು ಹೆಚ್ಚು ಪ್ರಮಾಣದಲ್ಲಿ ತರಕಾರಿ, ಸೊಪು್ಪ, ಸಕ್ಕರೆ ಅಂಶ ಕಡಿಮೆ ಇರುವ ಹಣ್ಣುಗಳನ್ನು (ಸೇಬು, ಕಿತ್ತಳೆ, ಮೂಸಂಬಿ, ಪರಂಗಿ, ಕರಬೂಜ ಇತ್ಯಾದಿ) ಸೇವಿಸುವುದು ಒಳ್ಳೆಯದು. ಮಾಂಸಹಾರಿಗಳಾದರೆ ಬೇಯಿಸಿದ ಕೋಳಿಮಾಂಸ, ಮೀನು ಹಾಗೂ ಮೊಟ್ಟೆಯ ಬಿಳಿ ಭಾಗವನ್ನು ಸೇವಿಸಬಹುದು. ಕುರಿ ಮೇಕೆ ಮಾಂಸ ಉತ್ತಮವಲ್ಲ. ಎಣ್ಣೆಯಲ್ಲಿ ಕರಿದ ಪದಾರ್ಥ ಸೇವಿಸಬಾರದು. ತುಪ್ಪ, ತೆಂಗಿನಎಣ್ಣೆ ಬಳಕೆ ಉತ್ತಮ.