ಹರಿದ್ವಾರದಲ್ಲಿ ಬೃಹತ್‌ ಆಲಿಕಲ್ಲುಗಳ ರಣಮಳೆ
ಆಲಿಕಲ್ಲುಗಳಿಂದ ವಾಹನಗಳ ಗಾಜುಗಳು ಪುಡಿಪುಡಿ
ಮನೆಗಳ ಮೇಲ್ಛಾವಣಿ, ಸೋಲಾರ್‌ ಪ್ಯಾನಲ್‌ಗಳಿಗೆ ಹಾನಿ
Uttarakhand Rains: ಉತ್ತರಾಖಂಡದ ಹರಿದ್ವಾರದಲ್ಲಿ ಭಾರೀ ಗಾಳಿ-ಮಳೆಯ ಜೊತೆ ಬೃಹತ್‌ ಆಲಿಕಲ್ಲುಗಳು ಸುರಿದಿವೆ. ಕ್ರಿಕೆಟ್‌, ಟೆನಿಸ್‌ ಬಾಲ್‌ ಗಾತ್ರದ ಆಲಿಕಲ್ಲುಗಳು ಬಿದ್ದ ಪರಿಣಾಮ ಕೆಲವೇ ನಿಮಿಷಗಳಲ್ಲಿ ರಸ್ತೆಗಳೆಲ್ಲ ಹಿಮದಂತೆ ಬಿಳಿಯಾಗಿವೆ. ಈ ದಿಢೀರ್‌ ಹವಾಮಾನ ವೈಪರೀತ್ಯಕ್ಕೆ ವಾಹನಗಳು, ಮನೆಗಳು ಮತ್ತು ರೈತರ ಬೆಳೆಗಳು ಭಾರೀ ಹಾನಿಗೊಳಗಾಗಿವೆ.
ಬೆಳಗ್ಗೆ ಹರಿದ್ವಾರದಲ್ಲಿ ದಿಢೀರ್‌ ಹವಾಮಾನ ಬದಲಾಗಿದ್ದು, ಬಿರುಗಾಳಿ ಸಹಿತ ಭಾರೀ ಮಳೆಯಾಗಿದೆ. ಇದರ ಬೆನ್ನಲ್ಲೇ ಕ್ರಿಕೆಟ್‌ ಮತ್ತು ಟೆನಿಸ್‌ ಬಾಲ್‌ ಗಾತ್ರದ ಆಲಿಕಲ್ಲುಗಳು ಸುರಿದಿವೆ. ಜ್ವಾಲಾಪುರ, ಸಿಡ್ಕುಲ್‌ ಹಾಗೂ ರೂರ್ಕಿ-ಹರಿದ್ವಾರ ರಸ್ತೆಗಳ ಸುತ್ತಮುತ್ತ ಆಲಿಕಲ್ಲುಗಳ ಅಬ್ಬರ ಜೋರಾಗಿತ್ತು.
ಆಲಿಕಲ್ಲುಗಳು ಬಿದ್ದ ರಭಸಕ್ಕೆ ರಸ್ತೆ ಬದಿ ಮತ್ತು ಮನೆಗಳ ಮುಂದೆ ನಿಲ್ಲಿಸಿದ್ದ ನೂರಾರು ಕಾರು, ಬೈಕ್‌ಗಳ ಗಾಜುಗಳು ಒಡೆದುಹೋಗಿವೆ. ಮನೆಗಳ ಮೇಲ್ಛಾವಣಿ ಹಾಗೂ ಸೋಲಾರ್‌ ಪ್ಯಾನಲ್‌ಗಳಿಗೂ ಹಾನಿಯಾಗಿದೆ. ರಸ್ತೆಗಳ ಮೇಲೆ ಆಲಿಕಲ್ಲುಗಳು ರಾಶಿ ಬಿದ್ದಿದ್ದರಿಂದ ಕೆಲವೇ ನಿಮಿಷಗಳಲ್ಲಿ ಇಡೀ ಪ್ರದೇಶ ಹಿಮ ಬಿದ್ದಂತೆ ಬಿಳಿಯಾಗಿ ಕಾಣುತ್ತಿತ್ತು.
ಹರಿದ್ವಾರದ ಗ್ರಾಮೀಣ ಭಾಗಗಳಲ್ಲೂ ಆಲಿಕಲ್ಲು ಮಳೆಯ ಹೊಡೆತ ಜೋರಾಗಿತ್ತು. ಹೊಲಗಳಲ್ಲಿನ ಬೆಳೆಗಳು ಮತ್ತು ತರಕಾರಿ ತೋಟಗಳಿಗೆ ಹಾನಿಯಾಗಿದ್ದು, ರೈತರು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ದಿಢೀರ್‌ ಸುರಿದ ಆಲಿಕಲ್ಲು ಮಳೆಯಿಂದ ಕೃಷಿ ಚಟುವಟಿಕೆಗಳಿಗೂ ಹೊಡೆತ ಬಿದ್ದಿದೆ.
ಹರಿದ್ವಾರದಲ್ಲಿ ಉಂಟಾಗಿರುವ ಹಾನಿಯ ಬಗ್ಗೆ ಉತ್ತರಾಖಂಡ ಮುಖ್ಯಮಂತ್ರಿ ಪುಷ್ಕರ್‌ ಸಿಂಗ್‌ ಧಾಮಿ ಗಮನ ಹರಿಸಿದ್ದಾರೆ. ಆಲಿಕಲ್ಲು ಮಳೆಯಿಂದ ಹಾನಿಗೊಳಗಾದ ಪ್ರದೇಶಗಳಲ್ಲಿ ಬೆಳೆ ನಷ್ಟದ ಬಗ್ಗೆ ಪರಿಶೀಲನೆ ನಡೆಸುವಂತೆ ಅಧಿಕಾರಿಗಳಿಗೆ ಸೂಚನೆ ನೀಡಿದ್ದಾರೆ. ನಷ್ಟ ಅನುಭವಿಸಿದ ರೈತರಿಗೆ ಸೂಕ್ತ ಪರಿಹಾರ ನೀಡುವುದಾಗಿಯೂ ತಿಳಿಸಿದ್ದಾರೆ.
ಒಟ್ಟಿನಲ್ಲಿ, ದಿಢೀರ್‌ ಸುರಿದ ಆಲಿಕಲ್ಲು ಮಳೆಯಿಂದ ವಾಹನ ಮಾಲೀಕರು, ಮನೆಗಳ ನಿವಾಸಿಗಳು ಮತ್ತು ರೈತರು ನಷ್ಟ ಅನುಭವಿಸಿದ್ದಾರೆ. ಹಾನಿಯ ಸಂಪೂರ್ಣ ಪ್ರಮಾಣದ ಬಗ್ಗೆ ಅಧಿಕಾರಿಗಳ ಪರಿಶೀಲನೆಯ ಬಳಿಕ ಸ್ಪಷ್ಟ ಮಾಹಿತಿ ಸಿಗಬೇಕಿದೆ.