ಪಾಕಿಸ್ತಾನದ ನಗರಗಳಲ್ಲಿ ಅದ್ಧೂರಿಯಾಗಿ ನಡೆದ ಹ್ಯಾಲೋವಿನ್ ಆಚರಣೆ
ಮಾಲ್‌ಗಳು, ವಿಶ್ವವಿದ್ಯಾಲಯಗಳಲ್ಲಿ ಭೂತದ ವೇಷ ಧರಿಸಿ ಸಂಭ್ರಮಿಸಿದ ಯುವಜನತೆ
'ಇದು ಸೈತಾನನ ಸಂಸ್ಕೃತಿ, ಇಸ್ಲಾಂ ತತ್ವಗಳಿಗೆ ವಿರುದ್ಧ' ಎಂದು ಕಿಡಿಕಾರಿದ ನೆಟ್ಟಿಗರು
Pakistan Halloween Celebration: ವಿಶ್ವದಾದ್ಯಂತ ನಿನ್ನೆ ಆಚರಿಸಲಾಗುವ ಹ್ಯಾಲೋವಿನ್ ಹಬ್ಬದ ಹವಾ ಪಾಕಿಸ್ತಾನಕ್ಕೂ ತಟ್ಟಿದೆ. ಪಾಕಿಸ್ತಾನದ ಪ್ರಮುಖ ನಗರಗಳಾದ ಕರಾಚಿ, ಲಾಹೋರ್ ಮತ್ತು ಇಸ್ಲಾಮಾಬಾದ್‌ನ ಶಾಪಿಂಗ್ ಮಾಲ್‌ಗಳು ಹಾಗೂ ಪ್ರಸಿದ್ಧ ಶಿಕ್ಷಣ ಸಂಸ್ಥೆಗಳಲ್ಲಿ ಹ್ಯಾಲೋವಿನ್ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿತ್ತು.
ಲಾಹೋರ್‌ನ ಯೂನಿವರ್ಸಿಟಿ ಆಫ್ ಇಂಜಿನಿಯರಿಂಗ್ ಅಂಡ್ ಟೆಕ್ನಾಲಜಿ (UET) ಸೇರಿದಂತೆ ಹಲವು ಸಂಸ್ಥೆಗಳ ವಿದ್ಯಾರ್ಥಿಗಳು ಭಯಾನಕ ವೇಷಭೂಷಣಗಳನ್ನು ಧರಿಸಿ ಸಂಭ್ರಮಿಸಿದ್ದರು. ಲಾಹೋರ್‌ನ ಎಂಪೋರಿಯಮ್ ಮಾಲ್‌ನಲ್ಲಿ ಭೀಕರ ಮಾದರಿಯ 'ಹೌಸ್ ಆಫ್ ಹಾರರ್' ಆಕರ್ಷಣೆಗಳನ್ನು ಯುವಜನತೆಗಾಗಿ ಸೃಷ್ಟಿಸಲಾಗಿತ್ತು.
ಆಚರಣೆಯ ವಿಡಿಯೋಗಳು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿದ್ದಂತೆ ಸಾಂಪ್ರದಾಯಿಕ ಮನಸ್ಥಿತಿಯ ನೆಟ್ಟಿಗರು ತೀವ್ರ ವಿರೋಧ ವ್ಯಕ್ತಪಡಿಸಿದ್ದಾರೆ. "ಪಾಕಿಸ್ತಾನದಲ್ಲಿ ಯಾವ ಸಂಸ್ಕೃತಿಯನ್ನು ಉತ್ತೇಜಿಸಲಾಗುತ್ತಿದೆ? ಇದು ಸೈತಾನನ ಆಚರಣೆ" ಎಂದು ಹಲವರು ಕಿಡಿಕಾರಿದ್ದಾರೆ. ಇನ್ನು ಕೆಲವರು, "ಹಿನ್ನೆಲೆಯೇ ತಿಳಿಯದೆ ಕೇವಲ ಟ್ರೆಂಡಿಂಗ್‌ಗಾಗಿ ಇಂತಹ ಹಬ್ಬಗಳನ್ನು ಅನುಕರಿಸುತ್ತಿದ್ದಾರೆ" ಎಂದು ಅಸಮಾಧಾನ ಹೊರಹಾಕಿದ್ದಾರೆ.
ಹ್ಯಾಲೋವಿನ್ ಪ್ರಾಚೀನ ಸೆಲ್ಟಿಕ್ ಪರಂಪರೆಯ 'ಸ್ಯಾಮ್‌ಹೇನ್' ಎಂಬ ಕೃಷಿ ಹಬ್ಬದಿಂದ ಬಂದಿದೆ. ಕೆಟ್ಟ ಆತ್ಮಗಳನ್ನು ಓಡಿಸಲು ಜನರು ವಿಚಿತ್ರ ವೇಷ ಧರಿಸಿ ಬೆಂಕಿ ಹಾಕುತ್ತಿದ್ದರು. ಆದರೆ ಮೂಢನಂಬಿಕೆ ಹಾಗೂ ಅನ್ಯಧರ್ಮದ ಆಚರಣೆ ಎಂಬ ಕಾರಣಕ್ಕೆ ಪಾಕಿಸ್ತಾನ ಸೇರಿದಂತೆ ಇಸ್ಲಾಮಿಕ್ ರಾಷ್ಟ್ರಗಳ ಧರ್ಮಗುರುಗಳು ಇದನ್ನು ತೀವ್ರವಾಗಿ ವಿರೋಧಿಸುತ್ತಾರೆ.
ಅನ್ಯಧರ್ಮದ ಆಚರಣೆಗಳನ್ನು ಅನುಕರಿಸುವುದು, ಮೂಢನಂಬಿಕೆ ಹಾಗೂ ಮಾಟ-ಮಂತ್ರದ ಸಂಕೇತಗಳನ್ನು ಉತ್ತೇಜಿಸುವುದು ಇಸ್ಲಾಂ ಧರ್ಮಕ್ಕೆ ವಿರುದ್ಧ ಎಂಬುದು ಅಲ್ಲಿನ ಕನ್ಸರ್ವೇಟಿವ್ ಗುಂಪುಗಳ ವಾದವಾಗಿದೆ.