ನವದೆಹಲಿ: ಕುದುರೆ ಜೂಜು, ಕ್ಯಾಸಿನೊ, ಆನ್ಲೈನ್ ಗೇಮ್ಳ ಮೇಲೆ ವಿಧಿಸಲಾಗುವ ಶೇ.28ರಷ್ಟು ತೆರಿಗೆಯ ವಿಚಾರದಲ್ಲಿ ಸರಕು ಮತ್ತು ಸೇವಾ ತೆರಿಗೆ (ಜಿಎಸ್ಟಿ) ಮಂಡಳಿ ಕೊಂಚ ಉದಾರತೆ ತೋರಿದೆ. ಈ ತೆರಿಗೆಯು ನಿಗದಿಯಂತೆ ಅಕ್ಟೋಬರ್ 1ರಿಂದ ಜಾರಿಯಾಗಲಿದ್ದು, ಆರು ತಿಂಗಳ ನಂತರ ಅಥವಾ 2024ರ ಏಪ್ರಿಲ್ನಲ್ಲಿ ನಡೆಯಲಿರುವ ಜಿಎಸ್ಟಿ ಸಭೆಯಲ್ಲಿ ಮರುಪರಿಶೀಲನೆಗೆ ಒಳಪಡಿಸಲಾಗುವುದು ಎಂದು ಮಂಡಳಿ ಭರವಸೆ ನೀಡಿದೆ.
ಬಾಜಿ ಕಟ್ಟಿ ಆಡುವವರು ಆರಂಭಿಕ ಹಂತದಲ್ಲಿ ಹೂಡುವ ಮೊತ್ತದ ಮುಖಬೆಲೆಯ ಮೇಲೆ ಜಿಎಸ್ಟಿ ಅನ್ವಯವಾಗಲಿದೆ ಎಂದು ಮಂಡಳಿ ತಿಳಿಸಿದೆ. ಈ ಸಂಬಂಧ ಜಿಎಸ್ಟಿ ಕಾಯ್ದೆಗೆ ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿಯೇ ತಿದ್ದುಪಡಿ ಮಂಡನೆಯಾಗಲಿದ್ದು, ಬಳಿಕ ಆಯಾ ರಾಜ್ಯಗಳು ವಿಧಾನಸಭೆಯಲ್ಲಿ ಇದನ್ನು ಅಂಗೀಕರಿ ಸಬೇಕಾಗುತ್ತದೆ. ಆದರೆ ಮಂಡಳಿಯ ಈ ನಿರ್ಧಾರಕ್ಕೆ ಕೆಲ ರಾಜ್ಯಗಳು ಅಸಮಾಧಾನ ವ್ಯಕ್ತಪಡಿಸಿವೆ.
ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅಧ್ಯಕ್ಷತೆಯಲ್ಲಿ ಬುಧವಾರ ವರ್ಚುವಲ್ ವೇದಿಕೆಯಲ್ಲಿ ನಡೆದ ಜಿಎಸ್ಟಿ ಮಂಡಳಿಯ 51ನೇ ಸಭೆಯಲ್ಲಿ ಶೇ.28ರ ತೆರಿಗೆಗೆ ದೆಹಲಿ, ಗೋವಾ, ಸಿಕ್ಕಿಂ ಸೇರಿ ಅನೇಕ ರಾಜ್ಯ ಸರ್ಕಾರಗಳು ವಿರೋಧ ವ್ಯಕ್ತ ಪಡಿಸಿದವು. ನಿರ್ಧಾರ ಮರುಪರಿಶೀಲಿಸುವಂತೆ ಆಗ್ರಹಿಸಿದವು. ಆದರೆ, ಕರ್ನಾಟಕ, ಗುಜರಾತ್, ಮಹಾರಾಷ್ಟ್ರ, ಉತ್ತರಪ್ರದೇಶ ಸರ್ಕಾರಗಳು ಶೇ.28ರ ದರದ ತೆರಿಗೆಯನ್ನು ಜಾರಿ ಮಾಡಬೇಕು ಎಂದು ಒತ್ತಾಯಿಸಿದವು.
ಆನ್ಲೈನ್ ಗೇಮಿಂಗ್ ತೆರಿಗೆ ಕುರಿತು ಕೇಂದ್ರ ಮತ್ತು ರಾಜ್ಯಗಳ ಹಣಕಾಸು ಇಲಾಖೆಗಳ ಹಿರಿಯ ಅಧಿಕಾರಿಗಳನ್ನು ಒಳಗೊಂಡ ಕಾನೂನು ಸಮಿತಿ ನಿಯಮಾವಳಿಯ ಕರಡನ್ನು ಸಿದ್ಧಪಡಿಸಿದೆ. ಆನ್ಲೈನ್ ಗೇಮಿಂಗ್ ಪೂರೈಕೆಯ ಮೌಲ್ಯವು ಆಟಗಾರ ತೊಡಗಿಸುವ ಹಣ ಅಥವಾ ವರ್ಚುವಲ್ ಸ್ವತ್ತಿನ ಠೇವಣಿಯ ಮೊತ್ತಕ್ಕೆ ಇರಬೇಕೆಂಬ ನಿಯಮವನ್ನು ಈ ಸಮಿತಿ ಶಿಫಾರಸು ಮಾಡಿದೆ. ಕ್ಯಾಸಿನೊಗಳಲ್ಲಿ ಇದು ಟೋಕನ್, ಚಿಪ್, ಕಾಯಿನ್ ಅಥವಾ ಟಿಕೆಟ್ ಖರೀದಿಯ ಮೊತ್ತಕ್ಕೆ ಅನ್ವಯವಾಗಬೇಕು ಎಂದು ಸಲಹೆ ನೀಡಿದೆ. ಈ ಅಂಶಗಳ ಬಗ್ಗೆ ಸಭೆಯಲ್ಲಿ ರ್ಚಚಿಸಲಾಯಿತು ಎಂದು ಸಭೆಯ ನಂತರ ಸುದ್ದಿಗಾರರಿಗೆ ಸಚಿವೆ ನಿರ್ಮಲಾ ಸೀತಾರಾಮನ್ ತಿಳಿಸಿದರು.
ತೆರಿಗೆಯ ಅನ್ವಯದ ಬಗ್ಗೆ ಉದಾಹರಣೆ ನೀಡಿದ ಸಚಿವೆ, ಆಟಗಾರನು ಮೊದಲು ಹೂಡುವ ಮೊತ್ತವನ್ನು ತೆರಿಗೆಗೆ ಪರಿಗಣಿಸಲಾಗುತ್ತದೆ. 1,000 ರೂ. ಬಾಜಿಕಟ್ಟಿ 300 ರೂ. ಗೆದ್ದರೆ, ಮುಂದಿನ ಹಂತದಲ್ಲಿ 1,300 ರೂ. ಬಾಜಿ ಕಟ್ಟಿ ಗೆಲ್ಲುವ ಮೊತ್ತಕ್ಕೆ ಮತ್ತೆ ತೆರಿಗೆ ಇರುವುದಿಲ್ಲ ಎಂದು ವಿವರಿಸಿದರು.
ಆರಂಭಿಕ ಹಂತದ ಹೂಡಿಕೆಗೆ ಮಾತ್ರ ಜಿಎಸ್ಟಿ ವಿಧಿಸುವ ಮಂಡಳಿಯ ನಿರ್ಧಾರವನ್ನು ಅಖಿಲ ಭಾರತ ಗೇಮಿಂಗ್ ಒಕ್ಕೂಟ (ಎಐಜಿಎಫ್) ಸ್ವಾಗತಿಸಿದೆ.
ಆನ್ಲೈನ್ ಗೇಮಿಂಗ್ ಮೇಲಿನ ಶೇ. 28 ಜಿಎಸ್ಟಿ ಅಕ್ಟೋಬರ್ ಒಂದರಿಂದ ಜಾರಿಗೆ ಬರಲಿದೆ. ಆದರೆ, ಆರು ತಿಂಗಳ ಬಳಿಕ ಮರುಪರಿಶೀಲಿಸಲು ಸಭೆ ಒಪ್ಪಿಗೆ ನೀಡಿದೆ. | ನಿರ್ಮಲಾ ಸೀತಾರಾಮನ್, ಕೇಂದ್ರ ವಿತ್ತ ಸಚಿವೆ ಮತ್ತು ಜಿಎಸ್ಟಿ ಮಂಡಳಿ ಅಧ್ಯಕ್ಷೆ
ಆನ್ಲೈನ್ ಗೇಮಿಂಗ್, ಆನ್ಲೈನ್ ಮನಿ ಗೇಮಿಂಗ್, ಹಣ ಪಾವತಿಗೆ ಬಳಸುವ ವರ್ಚುವಲ್ ಡಿಜಿಟಲ್ ಅಸೆಟ್ ಹಾಗೂ ಆನ್ಲೈನ್ ಗೇಮಿಂಗ್ ವಿಚಾರದಲ್ಲಿ ಯಾರು ಪೂರೈಕೆದಾರರು ಎನ್ನುವುದನ್ನು ಈ ತಿದ್ದುಪಡಿಯಲ್ಲಿ ವ್ಯಾಖ್ಯಾನಿಸಲಾಗುತ್ತದೆ.
ನೋಂದಣಿ ಅಗತ್ಯ: ವಿದೇಶಿ ಆನ್ಲೈನ್ ಗೇಮಿಂಗ್ಗಳು ಸಕ್ಷಮ ಪ್ರಾಧಿಕಾರದಲ್ಲಿ ನೋಂದಣಿ ಮಾಡಿಕೊಂಡು ತೆರಿಗೆ ಪಾವತಿಸಿದರಷ್ಟೇ ಭಾರತದಲ್ಲಿ ಕಾರ್ಯನಿರ್ವಹಿಸಬಹುದು. ಇಲ್ಲದಿದ್ದರೆ ಅವುಗಳ ವಿರುದ್ಧ ಐಟಿ ಕಾಯ್ದೆ ಅನ್ವಯ ಕ್ರಮಕೈಗೊಳ್ಳಲಾಗುವುದು ಎಂದು ಕಂದಾಯ ಕಾರ್ಯದರ್ಶಿ ಸಂಜಯ್ ಮಲ್ಹೋತ್ರಾ ತಿಳಿಸಿದರು. ಪ್ರತಿಯೊಂದು ಆಟದ ಮುಖಬೆಲೆಗೆ ಬದಲಾಗಿ, ಒಟ್ಟಾರೆ ಆಟದ ಆದಾಯಕ್ಕೆ (ಜಿಜಿಆರ್) ತೆರಿಗೆ ಅನ್ವಯಿಸುವುದು ಸೂಕ್ತ ಎಂದು ಗೋವಾ ಹಾಗೂ ಸಿಕ್ಕಿಂ ಸರ್ಕಾರಗಳು ಒತ್ತಾಯಿಸಿದವು ಎಂದು ಹೇಳಿದರು.