ಬೆಂಗಳೂರು: ಎಲಾನ್ ಮಸ್ಕ್ ಟ್ವಿಟರ್ ಮಾಲೀಕತ್ವ ಹೊಂದಿದ ಮೇಲೆ ಟ್ವಿಟರ್ ಭಾರಿ ಸದ್ದಿನಲ್ಲಿದ್ದು, ಈ ಮೈಕ್ರೋಬ್ಲಾಗಿಂಗ್ ಸೈಟ್ನಲ್ಲಿ ಬಹಳಷ್ಟು ಬದಲಾವಣೆಗಳೂ ಆಗಲಾರಂಭಿಸಿವೆ. ಅದರಲ್ಲೂ ಎರಡು ಬಹುನಿರೀಕ್ಷಿತ ಸೌಲಭ್ಯವನ್ನು ನೀಡಲಿರುವುದಾಗಿ ಮಸ್ಕ್ ಘೋಷಿಸಿರುವುದು ಕುತೂಹಲ ಮೂಡಿಸಿದೆ.
ಪ್ರಪಂಚದ ನಿಖರ ಮಾಹಿತಿಯ ಮೂಲವಾಗಬೇಕು ಎಂಬ ನಿಟ್ಟಿನಲ್ಲಿ ಟ್ವಿಟರ್ ರೂಪುಗೊಳಿಸಲಾಗುತ್ತಿದೆ ಎಂದಿರುವ ಮಸ್ಕ್, ವ್ಯಾಪಕ ವೆರಿಫಿಕೇಷನ್ನಿಂದ ಪತ್ರಿಕೋದ್ಯಮದ ಪ್ರಜಾಪ್ರಭುತ್ವಕ್ಕೆ ಮತ್ತು ಸಾವರ್ಜನಿಕರ ಧ್ವನಿ ಎತ್ತಿ ಹಿಡಿಯಲು ಸಹಕಾರಿಯಾಗಲಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
ಇನ್ನು ಟ್ವಿಟರ್ ಬಗ್ಗೆ ಇರುವ ದೊಡ್ಡ ನಿರೀಕ್ಷೆ ಎಂದರೆ ಟೆಕ್ಸ್ಟ್ ಲಿಮಿಟ್. ಆರಂಭದಲ್ಲಿ 140 ಕ್ಯಾರೆಕ್ಟರ್ಗೆ ಸೀಮಿತವಾಗಿದ್ದ ಟ್ವಿಟರ್ ನಂತರ ಆ ಸಾಮರ್ಥ್ಯವನ್ನು ದುಪ್ಟಟ್ಟುಗೊಳಿಸಿದ್ದರಿಂದ, ಈಗ 280 ಕ್ಯಾರೆಕ್ಟರ್ ವರೆಗೆ ಬರೆಯಬಹುದಾಗಿದೆ. ಶೀಘ್ರದಲ್ಲೇ ಲಾಂಗ್ಫಾರ್ಮ್ ಟೆಕ್ಸ್ಟ್ಗೂ ಅವಕಾಶ ಕೊಡುವುದಾಗಿ ಮಸ್ಕ್ ಹೇಳಿರುವುದು, ಇನ್ನುಮುಂದೆ ಉದ್ದುದ್ದದ ಬರಹಗಳಿಗೂ ಟ್ವಿಟರ್ನಲ್ಲಿ ವೇದಿಕೆ ಸಿಗಲಿದೆ. ಸದ್ಯ ಜಾಸ್ತಿ ಬರೆದವರು ಅವನ್ನು ಒಂದೇ ಟ್ವೀಟ್ನಲ್ಲಿ ಹಾಕಲಾಗದೆ ಸ್ಕ್ರೀನ್ಶಾಟ್ ತೆಗೆದು ಇಲ್ಲವೇ ಫೋಟೋ ಮಾದರಿಯಲ್ಲಿ ಬರಹವನ್ನು ಪೋಸ್ಟ್ ಮಾಡುತ್ತಿದ್ದಾರೆ.
ಇನ್ನೊಂದೆಡೆ ಸದ್ಯದ ಬಹುತೇಕ ಸೋಷಿಯಲ್ ಮೀಡಿಯಾಗಳಲ್ಲಿ ಕ್ರಿಯೇಟರ್ ಮಾನಿಟೈಸೇಷನ್ ಎಂದರೆ ಅದು ವಿಡಿಯೋ ಕಂಟೆಂಟ್ ಕ್ರಿಯೇಟರ್ಸ್ಗೆ ಮಾತ್ರ ಎನ್ನುವಂತಿದೆ. ಆದರೆ ಎಲ್ಲ ಥರದ ಕಂಟೆಂಟ್ಗಳಿಗೂ ಕ್ರಿಯೇಟರ್ ಮಾನಿಟೈಸೇಷನ್ ಕೊಡುವುದಾಗಿ ಮಸ್ಕ್ ಹೇಳಿರುವುದು, ಬರೀ ಬರವಣಿಗೆಯಲ್ಲೇ ಹೆಚ್ಚು ತೊಡಗಿಸಿಕೊಳ್ಳುವವರಲ್ಲಿ ನಿರೀಕ್ಷೆ ಮೂಡಿಸಿದೆ. ಮುಂದೆ ಬರಹಕ್ಕೂ ಮಾನಿಟೈಸೇಷನ್ ಇರಬಹುದೇ ಎಂಬ ಕುತೂಹಲ ಮೂಡಿದೆ.