Indore Unique Ganesh Jhanki: ಇಂದೋರ್ನಲ್ಲಿ ಗಣೇಶ ಹಬ್ಬಕ್ಕೆ ಈ ಬಾರಿ ವಿಭಿನ್ನ ಅಲಂಕಾರ ಮಾಡಲಾಗಿದೆ. ಇಲ್ಲಿ ಗಣಪತಿ ಬಪ್ಪನ ಕಲ್ಪಿತ ದಿನಚರಿಯನ್ನೇ ದೃಶ್ಯ ರೂಪದಲ್ಲಿ ತೋರಿಸಲಾಗಿದೆ. ಟಿವಿ ನೋಡುವುದು, ಕುಟುಂಬದ ಜತೆ ಊಟ ಮಾಡುವುದು, ಜಿಮ್ನಲ್ಲಿ ವರ್ಕೌಟ್ ಮಾಡುವುದು ಸೇರಿದಂತೆ ಹಲವು ದೃಶ್ಯಗಳು ಗಮನ ಸೆಳೆಯುತ್ತಿವೆ.
ಗಣೇಶನನ್ನು ಹಾಸಿಗೆಯ ಮೇಲೆ ಕುಳಿತು ಟಿವಿ ನೋಡುತ್ತಿರುವಂತೆ, ಕುಟುಂಬದ ಜತೆ ಅಡುಗೆಮನೆಯಲ್ಲಿ ಊಟ ಮಾಡುತ್ತಿರುವಂತೆ ತೋರಿಸಲಾಗಿದೆ. ಜಿಮ್ನಲ್ಲಿ ಟ್ರೆಡ್ಮಿಲ್ ಮೇಲೆ ವರ್ಕೌಟ್ ಮಾಡುತ್ತಿರುವ ಬಪ್ಪನ ದೃಶ್ಯವೂ ಇದೆ. ಡ್ರಾಯಿಂಗ್ ರೂಮ್ನಲ್ಲಿ ಶಿವ, ಪಾರ್ವತಿ ಮತ್ತು ಕಾರ್ತಿಕೇಯರ ಜೊತೆ ಟೀ ಕುಡಿಯುತ್ತಿರುವ ದೃಶ್ಯವೂ ವಿಶೇಷವಾಗಿದೆ.
ಈ ಮೂಲಕ ವ್ಯಾಯಾಮ, ಕುಟುಂಬದ ಜತೆ ಸಮಯ ಕಳೆಯುವುದು ಮತ್ತು ಆರೋಗ್ಯಕರ ಜೀವನಶೈಲಿಯ ಮಹತ್ವವನ್ನು ಸಾರಲಾಗಿದೆ.
ಬಪ್ಪನ ದಿನಚರಿ ಮಾತ್ರವಲ್ಲ, ಇಂದೋರ್ನ ಅಭಿವೃದ್ಧಿಯ ಪಯಣವನ್ನೂ ಇಲ್ಲಿ ತೋರಿಸಲಾಗಿದೆ. ಎತ್ತಿನ ಗಾಡಿಯಂತಹ ಹಳೆಯ ಸಾರಿಗೆ ವ್ಯವಸ್ಥೆಯಿಂದ ಇಂದಿನ ಮೆಟ್ರೋವರೆಗಿನ ಬದಲಾವಣೆಯನ್ನು ವಿವಿಧ ಮಾದರಿಗಳ ಮೂಲಕ ಚಿತ್ರಿಸಲಾಗಿದೆ. ರಾಜವಾಡ ಅರಮನೆ, ಮೆಟ್ರೋ, ಸ್ವಚ್ಛತಾ ಕಾರ್ಮಿಕರು, ಐಡಿಎ ಕಟ್ಟಡ, ಇಂದೋರ್ ಮುನ್ಸಿಪಲ್ ಕಾರ್ಪೊರೇಷನ್ ಮತ್ತು ಮಹೇಶ್ವರದ ಪ್ರಮುಖ ಅಂಶಗಳನ್ನೂ ಅಲಂಕಾರದಲ್ಲಿ ಸೇರಿಸಲಾಗಿದೆ.
ಈ ಬೃಹತ್ ಅಲಂಕಾರ ಸಿದ್ಧಪಡಿಸಲು ಸುಮಾರು ಎರಡೂವರೆ ತಿಂಗಳು ಬೇಕಾಗಿದೆ. ಪೇಪರ್, ಪ್ಲಾಸ್ಟರ್ ಆಫ್ ಪ್ಯಾರಿಸ್, ಲೈಟಿಂಗ್, ಪೇಂಟಿಂಗ್, ಪ್ಲಂಬಿಂಗ್ ಸೇರಿದಂತೆ ಹಲವು ಕೆಲಸಗಳನ್ನು ಮಾಡಲಾಗಿದೆ. ಸುಮಾರು 7ರಿಂದ 8 ಏಜೆನ್ಸಿಗಳು ಕೆಲಸದಲ್ಲಿ ಕೈಜೋಡಿಸಿದ್ದು, ಕೇಶವ್, ಮೋಹಿತ್ ಮತ್ತು ವಿಶಾಲ್ ಪ್ರಮುಖವಾಗಿ ವಿನ್ಯಾಸ ಹಾಗೂ ನಿರ್ಮಾಣದ ಜವಾಬ್ದಾರಿ ವಹಿಸಿದ್ದರು.
ಭಕ್ತಿ, ಕ್ರಿಯೇಟಿವಿಟಿ ಮತ್ತು ಸಾಮಾಜಿಕ ಸಂದೇಶವನ್ನು ಒಟ್ಟಿಗೆ ಕಟ್ಟಿಕೊಟ್ಟಿರುವ ಈ ವಿಶೇಷ ಗಣೇಶ ಅಲಂಕಾರ ಇಂದೋರ್ನ ಗಣೇಶೋತ್ಸವದ ಪ್ರಮುಖ ಆಕರ್ಷಣೆಯಾಗಿದೆ. (ಏಜೆನ್ಸೀಸ್)