ಮುಂಬೈ: ಭಾರತದ ಬಲಪಂಥೀಯರನ್ನು ತಾಲಿಬಾನಿಗಳಿಗೆ ಸಮೀಕರಿಸಿದ ಬಾಲಿವುಡ್ ರಚನಾಕಾರ ಮತ್ತು ಕವಿ ಜಾವೆದ್ ಅಕ್ತರ್ ಅವರ ಮೇಲೆ ಮಹಾರಾಷ್ಟ್ರದ ಬಿಜೆಪಿ ಶಾಸಕ ಹಾಗೂ ವಕ್ತಾರ ರಾಮ್ ಕದಮ್ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ತಮ್ಮ ಅಸಂಬದ್ಧ ಹೇಳಿಕೆ ಬಗ್ಗೆ ರಾಷ್ಟ್ರೀಯ ಸ್ವಯಂ ಸೇವಕ ಸಂಘ ಮತ್ತು ವಿಶ್ವ ಹಿಂದೂ ಪರಿಷತ್ನಂಥ ಸೇವಾ ಸಂಘಟನೆಗಳ ಕಾರ್ಯಕರ್ತರಲ್ಲಿ ಕೈಮುಗಿದು ಕ್ಷಮೆ ಕೇಳುವವರೆಗೆ ಅಕ್ತರ್ರ ಯಾವುದೇ ಸಿನಿಮಾಗೆ ದೇಶದಲ್ಲಿ ಬಿಡುಗಡೆಯಾಗುವ ಅವಕಾಶ ನೀಡುವುದಿಲ್ಲ ಎಂದು ಎಚ್ಚರಿಕೆ ನೀಡಿದ್ದಾರೆ.
ಶನಿವಾರ ಎನ್ಡಿಟಿವಿಯೊಂದಿಗಿನ ಸಂದರ್ಶನದಲ್ಲಿ ಬಲಪಂಥೀಯ ಜನಸಂಘಟನೆಗಳೂ ತಾಲಿಬಾನಿ ಮನಸ್ಥಿತಿ ಹೊಂದಿವೆ ಎಂದಿದ್ದಾರೆ. "ತಾಲಿಬಾನ್ ಇಸ್ಲಾಮಿಕ್ ರಾಜ್ಯ ಬಯಸುತ್ತಿರುವಂತೆಯೇ, ಹಿಂದೂ ರಾಷ್ಟ್ರವನ್ನು ಬಯಸುವ ಜನರಿದ್ದಾರೆ. ಈ ಜನರು ಅದೇ ಮನಸ್ಥಿತಿಯುಳ್ಳವರು - ಮುಸಲ್ಮಾನರಾಗಲಿ, ಕ್ರಿಶ್ಚಿಯನ್, ಜ್ಯೂಸ್ ಅಥವಾ ಹಿಂದೂಗಳಾಗಲಿ" ಎಂದಿದ್ದರು.
ಮುಂದುವರೆದು, "ತಾಲಿಬಾನ್ ಅನಾಗರಿಕವಾಗಿದ್ದು, ಅವರ ಕೃತ್ಯಗಳು ಖಂಡನೀಯವಾಗಿದೆ. ಆದರೆ, ಆರ್ಎಸ್ಎಸ್, ವಿಎಚ್ಪಿ ಮತ್ತು ಬಜರಂಗ್ ದಳ್ಗಳನ್ನು ಬೆಂಬಲಿಸುವ ಜನರೂ ಅದೇ ರೀತಿಯವರು" ಎಂದು ಮಾಜಿ ಸಂಸದರೂ ಆದ ಅಕ್ತರ್ ಹೇಳಿದ್ದರು ಎಂದು ಎನ್ಡಿಟಿವಿ ವರದಿ ಮಾಡಿದೆ.
ಜಾವೆದ್ ಅಕ್ತರ್ ಅವರ ಈ ಮಾತುಗಳು ನಾಚಿಕೆಗೇಡು. ಅಷ್ಟೇ ಅಲ್ಲ, ಸಂಘ ಪರಿವಾರದ ಪದಾಧಿಕಾರಿಗಳಾಗಿರುವ ಮತ್ತು ಅವುಗಳ ಸಿದ್ಧಾಂತವನ್ನು ಪಾಲಿಸುವ ಕೋಟ್ಯಂತರ ಜನರಿಗೆ ನೋವು ತರುವಂತಹುದೂ, ಅವಮಾನ ಮಾಡುವಂತಹುದೂ ಆಗಿದೆ ಎಂದು ಬಿಜೆಪಿಯ ರಾಮ್ ಕದಮ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಈ ಬಗ್ಗೆ ಟ್ವೀಟ್ ಮಾಡಿರುವ ವಿಡಿಯೋದಲ್ಲಿ ರಾಮ್ ಕದಮ್ ಅವರು, "ಹೇಳಿಕೆ ನೀಡುವ ಮುಂಚೆ ಸ್ವಲ್ಪವಾದರೂ ವಿಚಾರ ಮಾಡಬೇಕಿತ್ತು. ಅದೇ ಸಂಘ ಪರಿವಾರಕ್ಕೆ ಸೇರಿರುವ ಜನರು ಇಂದು ಈ ರಾಷ್ಟ್ರದ ಆಡಳಿತವನ್ನು ನಡೆಸುತ್ತಿದ್ದಾರೆ, ರಾಜಧರ್ಮದ ಪಾಲನೆ ಮಾಡುತ್ತಿದ್ದಾರೆ. ತಾಲಿಬಾನಿ ವಿಚಾರಧಾರೆ ಇದ್ದಿದ್ದರೆ, ಅವರು ಈ ರೀತಿ ಹೇಳಿಕೆ ನೀಡಲು ಸಾಧ್ಯವಾಗುತ್ತಿತ್ತೇ? ಈ ಪ್ರಶ್ನೆಯ ಉತ್ತರದಲ್ಲೇ ಅವರ ಹೇಳಿಕೆ ಎಷ್ಟು ಟೊಳ್ಳಾಗಿದೆ ಎಂಬುದು ಸ್ಪಷ್ಟವಾಗುತ್ತದೆ" ಎಂದಿದ್ದಾರೆ.
"ಎಲ್ಲಿಯವರೆಗೆ ಅವರು(ಜಾವೆದ್ ಅಕ್ತರ್) ಭಾರತಮಾತೆಯ ಸೇವೆಗೆ ಸಮರ್ಪಿತವಾಗಿರುವ ಸಂಘ ಕಾರ್ಯಕರ್ತರ ಕ್ಷಮೆ ಕೇಳುವುದಿಲ್ಲವೋ ಅಲ್ಲಿಯವರೆಗೆ ಅವರ ಅಥವಾ ಅವರ ಕುಟುಂಬದವರ ಯಾವುದೇ ಫಿಲ್ಮನ್ನು ಭಾರತಮಾತೆಯ ಭೂಮಿಯ ಮೇಲೆ ನಡೆಯಲು ನಾವು ಬಿಡುವುದಿಲ್ಲ" ಎಂದಿದ್ದಾರೆ. (ಏಜೆನ್ಸೀಸ್)