ಹಂಬಲ್ ಪೊಲಿಟೀಶಿಯನ್ ನೊಗರಾಜ್’ ನಂತರ ದಾನಿಶ್ ಸೇಠ್ ಹೀರೋ ಆಗಿ ನಟಿಸಿರುವ ‘ಫ್ರೆಂಚ್ ಬಿರಿಯಾನಿ’ ಚಿತ್ರವು ಇದೇ 24ರಂದು ಅಮೆಜಾನ್ ಪ್ರೈಮ್ನಲ್ಲಿ ಬಿಡುಗಡೆಯಾಗುತ್ತಿದೆ. ಆ ಚಿತ್ರದ ಟ್ರೈಲರ್ ಸಹ ಇತ್ತೀಚೆಗೆ ಬಿಡುಗಡೆಯಾಗಿತ್ತು. ಅದಾದ ಬಳಿಕ ರ್ಯಾಪ್ ಶೈಲಿಯ ಹಾಡೊಂದು ಬಿಡುಗಡೆ ಆಗಿ ಸದ್ದು ಮಾಡಿತ್ತು. ಇದೀಗ ಪುನೀತ್ ರಾಜಕುಮಾರ್ ಎಂಟ್ರಿಕೊಟ್ಟಿದ್ದಾರೆ.
ಹೌದು, ಏನು ಮಾಡೋದು ಸ್ವಾಮಿ ಎಂಬ ಸಾಹಿತ್ಯವುಳ್ಳ ಹಾಡು ಯೂಟ್ಯೂಬ್ನಲ್ಲಿ ಬಿಡುಗಡೆಯಾಗಿದ್ದು, ವಿಶೇಷ ಎಂಬಂತೆ ಆ ಹಾಡಿಗೆ ಸ್ವತಃ ಪುನೀತ್ ಧ್ವನಿ ನೀಡಿದ್ದಾರೆ. ಈ ಹಿಂದೆ ಪುನೀತ್ ನಿರ್ಮಾಣದ ಮಾಯಾಬಜಾರ್ ಚಿತ್ರದಲ್ಲಿ ಲೋಕ ಮಾಯಾಬಜಾರು ಹಾಡಿಗೆ ಸ್ಟೆಪ್ ಹಾಕಿದ್ದ ಪವರ್ಸ್ಟಾರ್, ಈ ಸಲ ಫ್ರೆಂಚ್ ಬಿರಿಯಾನಿಯಲ್ಲಿ ಮೈಕ್ ಹಿಡಿದು ಹಾಡಿಗೆ ಧ್ವನಿಯಾಗಿದ್ದಾರೆ.
ಈ ಹಾಡಿಗೂ ಮೊದಲು ಅತಿಥಿ ದೇವೋ ಭವ ಸಾಲುಗಳಿಂದ ಶುರುವಾಗುವ ಹಾಡಿನಲ್ಲಿ, ಬೆಂಗಳೂರಿನ ಅವಸ್ಥೆ ಬಗ್ಗೆ ಬೆಳಕು ಚೆಲ್ಲಲಾಗಿತ್ತು. ಆ ಹಾಡಿಗೆ ರ್ಯಾಪ್ ಟಚ್ ನೀಡಿದ್ದು, ಸಖತ್ ಕಲರ್ಫುಲ್ ಆಗಿ ಹಾಡು ಮೂಡಿಬಂದಿತ್ತು. ಇದೀಗ ಎಣ್ಣೆ ಹಾಡಿಗೆ ಪುನೀತ್ ಧ್ವನಿ ನೀಡಿದ್ದಾರೆ.
ವಾಸುಕಿ ವೈಭವ್ ಸಂಗೀತ ನಿರ್ದೇಶನ ನೀಡಿರುವ ಈ ಹಾಡಿಗೆ ಸ್ವತಃ ಅವರೇ ಸಾಹಿತ್ಯ ಬರೆದಿದ್ದಾರೆ. ಅವಿನಾಶ್ ಬಲೇಕಲ್ಲ ಅವರೂ ಕೈ ಜೋಡಿಸಿದ್ದಾರೆ. ಕಾರ್ತಿಕ್ ಪಳನಿ ಛಾಯಾಗ್ರಹಣ ನಿಭಾಯಿಸಿದ್ದಾರೆ. ಈ ಚಿತ್ರದಲ್ಲಿ ದಾನಿಶ್ ಸೇಠ್ ಬೆಂಗಳೂರಿನ ಆಟೋಡ್ರೈವರ್ ಆಗಿ ಕಾಣಿಸಿಕೊಂಡರೆ, ಚಿತ್ರದ ನಿರ್ದೇಶನ ಜವಾಬ್ದಾರಿ ಪನ್ನಗಾ ಭರಣ ಅವರದ್ದು.
ಈ ಹಿಂದೆ ಪುನೀತ್ ನಿರ್ಮಿಸಿದ್ದ ‘ಕವಲು ದಾರಿ’ ಮತ್ತು ‘ಮಾಯಾ ಬಜಾರ್’ ಚಿತ್ರಗಳು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿ, ನಂತರ ಅಮೇಜಾನ್ ಪ್ರೈಮ್ನಲ್ಲಿ ಕಾಣಿಸಿಕೊಂಡಿದ್ದವು. ಈಗಾಗಲೇ ‘ಲಾ’ ಬಿಡುಗಡೆಯಾಗಿದ್ದು, ‘ಫ್ರೆಂಚ್ ಬಿರಿಯಾನಿ’ ಸಿನಿಮಾ ಬಿಡುಗಡೆಯ ಹೊಸ್ತಿಲಲ್ಲಿದೆ. ದಾನಿಶ್ ಜತೆಗೆ, ಸಾಲ್ ಯೂಸಫ್, ರಂಗಾಯಣ ರಘು, ದಿಶಾ ಮದನ್ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ.