ನವದೆಹಲಿ: ಪಾಕಿಸ್ತಾನ ಪ್ರಾಯೋಜಿತ ಸುಳ್ಳು ಸುದ್ದಿ ಜಾಲ ಬಯಲುಗೊಳಿಸಿರುವ ಕೇಂದ್ರ ಸರ್ಕಾರ, 20 ಯೂಟ್ಯೂಬ್ ಚಾನೆಲ್ಗಳು, ಎರಡು ವೆಬ್ಸೈಟ್ಗಳನ್ನು ಬ್ಲಾಕ್ ಮಾಡಿ ಅವುಗಳಲ್ಲಿ ಪ್ರಸಾರವಾಗಿರುವ ಸುಳ್ಳು ಸುದ್ದಿ, ವಿಶ್ಲೇಷಣೆಗಳ ಶೀರ್ಷಿಕೆಗಳ ಪಟ್ಟಿಯನ್ನು ಸರ್ಕಾರ ಪ್ರಕಟಿಸಿದೆ. ಇವೆಲ್ಲವೂ ಭಾರತ ವಿರೋಧಿ ಪ್ರಚಾರದಲ್ಲಿ ತೊಡಗಿದ್ದವು.
ಗುಪ್ತಚರ ಸಂಸ್ಥೆಗಳು ಮತ್ತು ವಾರ್ತಾ ಮತ್ತು ಪ್ರಸಾರ ಸಚಿವಾಲಯ ಜಂಟಿಯಾಗಿ ನಡೆಸಿದ ಕಾರ್ಯಾಚರಣೆಯಲ್ಲಿ ಇವುಗಳ ಮಾಹಿತಿ ಸಂಗ್ರಹವಾಗಿದೆ. ಸಾಕ್ಷಿ ಸಹಿತವಾಗಿ ಯೂಟ್ಯೂಬ್ಗೆ, ವೆಬ್ಸೈಟ್ ಸರ್ವೀಸ್ ಪ್ರೊವೈಡರ್ಗಳಿಗೆ ಟಲಿಕಾಂ ಇಲಾಖೆ ಮೂಲಕ ಅವುಗಳನ್ನು ಬ್ಲಾಕ್ ಮಾಡಲು ಸರ್ಕಾರ ನಿರ್ದೇಶನ ನೀಡಿದೆ. ಈ ಚಾನೆಲ್ಗಳು ಮತ್ತು ವೆಬ್ಸೈಟ್ಗಳಲ್ಲಿ ಕಾಶ್ಮೀರ, ಭಾರತೀಯ ಸೇನೆ, ಅಲ್ಪಸಂಖ್ಯಾತ ಸಮುದಾಯ, ರಾಮಮಂದಿರ, ಜನರಲ್ ಬಿಪಿನ್ ರಾವತ್ ಮುಂತಾದ ವಿಷಯಗಳನ್ನು ಪ್ರಚೋದನಾತ್ಮಕವಾಗಿ ಬಳಸಿಕೊಳ್ಳಲಾಗಿದೆ.
ಭಾರತದ ವಿರುದ್ಧ ವ್ಯವಸ್ಥಿತ ಪಿತೂರಿ: ಎನ್ಪಿಜಿಯ ಕೆಲವು ಚಾನೆಲ್ಗಳ ನಿರೂಪಕರು ಪಾಕಿಸ್ತಾನದ ನ್ಯೂಸ್ ಚಾನೆಲ್ಗಳಲ್ಲಿ ಕೆಲಸ ಮಾಡುವಂಥವರು. ಈ ಚಾನೆಲ್ಗಳು, ವೆಬ್ಸೈಟ್ಗಳು ರೈತರ ಪ್ರತಿಭಟನೆ, ಪೌರತ್ವ ತಿದ್ದುಪಡಿ ಕಾಯ್ದೆ ವಿರುದ್ಧದ ಪ್ರತಿಭಟನೆ ಸೇರಿ ವಿವಿಧ ವಿಚಾರಗಳನ್ನು ಮುಂದಿಟ್ಟುಕೊಂಡು ಅಲ್ಪ ಸಂಖ್ಯಾತರನ್ನು ಪ್ರಚೋದಿಸುವ ಕೆಲಸವನ್ನು ಮಾಡುತ್ತ ಬಂದಿವೆ. ಪಾಕ್ ಮತ್ತು ಚೀನಾದ ಹಿತಾಸಕ್ತಿಗೆ ವಿರುದ್ಧವಾಗಿ ಭಾರತ ಸರ್ಕಾರ ಯಾವುದೇ ನಿರ್ಣಯ ತೆಗೆದುಕೊಳ್ಳಲಾಗದಂತೆ ಜನರನ್ನು ಪ್ರಚೋದಿಸುವ ವ್ಯವಸ್ಥಿತ ಪಿತೂರಿ ಇದರಲ್ಲಿ ಅಡಗಿದೆ ಎಂದು ಮೂಲಗಳು ತಿಳಿಸಿವೆ.
ನಯಾ ಪಾಕಿಸ್ತಾನ ಗ್ರೂಪ್: ಭಾರತದ ವಿರುದ್ಧ ಸುಳ್ಳು ಸುದ್ದಿ ಹಬ್ಬಿಸುವಲ್ಲಿ ಪಾಕಿಸ್ತಾನ ಮೂಲದ ನಯಾ ಪಾಕಿಸ್ತಾನ ಗ್ರೂಪ್ (ಎನ್ಪಿಜಿ) ನೇರವಾಗಿ ಇದರಲ್ಲಿ ಭಾಗಿ ಆಗಿದೆ. ಇದು ಯೂಟ್ಯೂಬ್ ಚಾನೆಲ್ಗಳ ನೆಟ್ವರ್ಕ್ ಹೊಂದಿದೆ. ಆದರೆ ಈ ಚಾನೆಲ್ಗಳ್ಯಾವುದರ ಮಾಲೀಕತ್ವ ಈ ಗ್ರೂಪ್ಗೆ ಸೇರಿದ್ದಲ್ಲ. ಈ ಚಾನೆಲ್ಗಳ ಒಟ್ಟು ವೀಕ್ಷಕರ ಸಂಖ್ಯೆ 35 ಲಕ್ಷಕ್ಕೂ ಹೆಚ್ಚು. ಇವುಗಳಲ್ಲಿರುವ ವಿಡಿಯೋಗಳ ಒಟ್ಟು ವ್ಯೂವ್ಸ್ 55 ಕೋಟಿಗೂ ಅಧಿಕ.