Haryana viral video: ತಂದೆಯೊಬ್ಬರು ಮಗಳ ನಿರ್ಧಾರದಿಂದ ಭಾವುಕರಾಗುವ ದೃಶ್ಯವಿರುವ ವಿಡಿಯೋವೊಂದು ಸದ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿದೆ. ಇದನ್ನು ನೈಜ ಕೌಟುಂಬಿಕ ಘಟನೆ ಎಂದು ಭಾವಿಸಿ ಹಲವರು ಶೇರ್ ಮಾಡಿದ್ದಾರೆ. ಆದರೆ ಈ ವೈರಲ್ ವಿಡಿಯೋ ಹಿಂದಿನ ಅಸಲಿ ಕಹಾನಿಯೇ ಬೇರೆ ಇದೆ.
ವೈರಲ್ ಆಗಿರುವ ವಿಡಿಯೋದಲ್ಲಿರುವ ದೃಶ್ಯ ಯಾವುದೇ ನೈಜ ಕೌಟುಂಬಿಕ ಘಟನೆಯಲ್ಲ. ಇದು ಹರಿಯಾಣದ ರೋಹ್ಟಕ್ ಜಿಲ್ಲೆಯ ಮೋಖ್ರಾದಲ್ಲಿರುವ ಸಾಕ್ಷಿ ಮಲಿಕ್ ಸರ್ಕಾರಿ ಕಾಲೇಜಿನಲ್ಲಿ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮದ ವೇಳೆ ಪ್ರದರ್ಶಿಸಲಾದ ಜಾಗೃತಿ ನಾಟಕದ ದೃಶ್ಯವಾಗಿದೆ.
ವಿಡಿಯೋದಲ್ಲಿ ಕಾಣಿಸುವ ಹಿನ್ನೆಲೆಯ ಬ್ಯಾನರ್‌ನಲ್ಲೂ ಕಾಲೇಜಿನ ಹೆಸರು ಹಾಗೂ ‘ವಂದೇ ಮಾತರಂ’ ಕಾರ್ಯಕ್ರಮಕ್ಕೆ ಸಂಬಂಧಿಸಿದ ವಿವರಗಳು ಕಾಣಿಸುತ್ತವೆ. ಇದರಿಂದ ವಿಡಿಯೋ ನೈಜ ಘಟನೆಯಲ್ಲ ಎಂಬುದು ಸ್ಪಷ್ಟವಾಗುತ್ತದೆ.
ವಿಡಿಯೋದಲ್ಲಿರುವ ತಂದೆಯ ಪಾತ್ರವನ್ನು ಹರಿಯಾಣದ ಪ್ರದರ್ಶನಕಾರ ಹಾಗೂ ಮೋಟಿವೇಷನಲ್ ಸ್ಪೀಕರ್ ಅಮರ್ ಕಟಾರಿಯಾ ನಿರ್ವಹಿಸಿದ್ದಾರೆ. ಅವರು ತಮ್ಮ ತಂಡದೊಂದಿಗೆ ಶಾಲಾ-ಕಾಲೇಜುಗಳಲ್ಲಿ ಸಾಮಾಜಿಕ ಸಂದೇಶಗಳನ್ನು ಸಾರುವ ನಾಟಕ ಹಾಗೂ ಸ್ಕಿಟ್‌ಗಳನ್ನು ಪ್ರದರ್ಶಿಸುತ್ತಾರೆ.
ವೈರಲ್ ಆಗಿರುವ ದೃಶ್ಯ ‘ಕೋರ್ಟ್ ಮೇ ಕನ್ಯಾದಾನ್’ ಎಂಬ ಹರಿಯಾನ್ವಿ ಪರಿಕಲ್ಪನೆಯ ನಾಟಕದ ಭಾಗವಾಗಿದೆ. ಮಗಳು ಹೆತ್ತವರ ವಿರೋಧದ ನಡುವೆಯೂ ತನ್ನ ಮದುವೆಯ ನಿರ್ಧಾರ ತಾನೇ ತೆಗೆದುಕೊಳ್ಳುವ ಸಂದರ್ಭದಲ್ಲಿ ತಂದೆ ಅನುಭವಿಸುವ ಭಾವನಾತ್ಮಕ ಸ್ಥಿತಿಯನ್ನು ಈ ನಾಟಕದಲ್ಲಿ ಅಭಿನಯಿಸಲಾಗಿದೆ.
ಹೀಗಾಗಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ವಿಡಿಯೋವನ್ನು ನೈಜ ಕೌಟುಂಬಿಕ ಘಟನೆ ಎಂದು ಹಂಚಿಕೊಳ್ಳುವುದು ತಪ್ಪು ಮಾಹಿತಿ. ನಾಟಕದ ಸಣ್ಣ ತುಣುಕನ್ನು ಮಾತ್ರ ತೆಗೆದುಕೊಂಡು, ಅದಕ್ಕೆ ಬೇರೆ ಹಿನ್ನೆಲೆ ನೀಡಲಾಗಿದೆ. ವಾಸ್ತವವಾಗಿ, ಇದು ನೈಜ ಘಟನೆ ಅಲ್ಲ; ವೇದಿಕೆಯಲ್ಲಿ ಪ್ರದರ್ಶಿಸಲಾದ ಸಾಮಾಜಿಕ ಜಾಗೃತಿ ನಾಟಕದ ದೃಶ್ಯವಾಗಿದೆ.