ಕರೊನಾ ವೈರಸ್ ದಾಳಿ ಇಡೀ ವಿಶ್ವವನ್ನು ಕಾಡುತ್ತಿರುವ ವೇಳೆ ಎಲ್ಲರಲ್ಲೂ ಈ ವೈರಸ್ ನಾಶಪಡಿಸುವ ಚುಚ್ಚುಮದ್ದು ಇಲ್ಲವೇ ಎಂಬ ಪ್ರಶ್ನೆ ಎದುರಾಗಿದೆ. ಮಾನವನ ದೇಹ ಹೊಕ್ಕ ಈ ವೈರಸ್ ನಾಶ ಮಾಡುವ ಚುಚ್ಚುಮದ್ದನ್ನು ವೈದ್ಯ ಲೋಕ ಇನ್ನು ಸಂಶೋಧನೆ ಮಾಡಿಲ್ಲ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಕೆಲವರು ಸಾಮಾಜಿಕ ಜಾಲ ತಾಣದಲ್ಲಿ ಕರೊನಾ ವೈರಸ್ಗೆ ವಿವಿಧ ರೋಗಗಳಿಗೆ ತಯಾರಾಗಿರುವ ಚುಚ್ಚು ಮದ್ದು ಬಳಸಬಹುದು ಎಂಬ ಸುಳ್ಳು ಸುದ್ದಿಯನ್ನು ಹರಡಲು ಮುಂದಾಗಿದ್ದಾರೆ.
ಇದೇ ರೀತಿ ಕ್ಷಯ ರೋಗಕ್ಕೆ ಸಂಶೋಧನೆಯಾಗಿರುವ ಬ್ಯಾಸಿಲಸ್ ಕ್ಯಾಲ್ಮೆಟ್ ಗುಯಿರಿನ್ (ಬಿಸಿಜಿ) ಲಸಿಕೆ ವೈರಸ್ ಅನ್ನು ನಾಶಪಡಿಸುತ್ತದೆ ಎಂಬ ಸುದ್ದಿ ಸಾಮಾಜಿಕ ಜಾಲತಾಣಗಳಾದ ಫೇಸ್ಬುಕ್ ಹಾಗೂ ವ್ಯಾಟ್ಸಾಪ್ನಲ್ಲಿ ಹರಿದಾಡುತ್ತಿದೆ. ಈ ಸುದ್ದಿಯನ್ನು ಹಲವು ಮಂದಿ ಮರುಹಂಚಿಕೆ ಮಾಡುತ್ತಿದ್ದಾರೆ.
ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ (ಎಎಫ್ಡಬ್ಲ್ಯೂಎ) ಸಾಮಾಜಿಕ ಜಾಲ ತಾಣದಲ್ಲಿ ಹರಿದಾಡುತ್ತಿರುವ ಸುದ್ದಿ ಸುಳ್ಳು ಎಂಬುದನ್ನು ಪತ್ತೆ ಮಾಡಿದೆ.
ಕ್ಷಯ ರೋಗಕ್ಕೆ ಬಳಸುವ ಬಿಸಿಜಿ ಲಸಿಕೆಯಿಂದ ಕರೊನಾ ವೈರಸ್ ನಾಶಪಡಿಸಲು ಸಾಧ್ಯ ಇಲ್ಲ ಎಂದು ಈಗಾಗಲೇ ವಿಶ್ವ ಆರೋಗ್ಯ ಸಂಸ್ಥೆ ಸೇರಿದಂತೆ ಹಲವು ವೈದ್ಯಕೀಯ ಸಂಶೋಧಾನ ಕೇಂದ್ರಗಳು ಸ್ಪಷ್ಟಪಡಿಸಿವೆ.
ಲಂಡನ್ನ ಆಕ್ಸ್ಫರ್ಡ್ ವಿಶ್ವವಿದ್ಯಾಲಯದ ಸಂಶೋಧಕರು ಲಸಿಕೆ ಒಂದನ್ನು ತಯಾರಿಸಿ ಇಲಿಗಳ ಮೇಲೆ ಪ್ರಯೋಗ ಮಾಡಿ ಯಶಸ್ವಿಯಾಗಿ ಈಗ ಮಾನವರ ಮೇಲೆ ಪ್ರಯೋಗ ಮಾಡಿ ಫಲಿತಾಂಶಕ್ಕೆ ಕಾಯುತ್ತಿದ್ದಾರೆ. ಹೀಗಿರುವಾಗ ವೈರಸ್ಗೆ ಬಿಸಿಜಿ ಲಸಿಕೆ ಉಪಯೋಗಕ್ಕೆ ಬರುತ್ತದೆ ಎಂಬುದು ಸುಳ್ಳು ಎಂದು ಪತ್ತೆ ಮಾಡಿದೆ.
ಹೀಗಾಗಿ ಸಾಮಾಜಿಕ ಜಾಲತಾಣದಲ್ಲಿ ಕರೊನಾ ವೈರಸ್ಗೆ ಬಿಸಿಜಿ ಚುಚ್ಚುಮದ್ದು ಪರಿಹಾರ ಎಂದು ಹರಿದಾಡುತ್ತಿರುವ ಸುದ್ದಿ ಸುಳ್ಳು. (ಏಜೆನ್ಸೀಸ್)